នេនទុំ ជួបគ្រោះថ្នាក់ក្រឡាប់រថយន្តផ្ងារជើង

មហាជន និងអ្នកប្រើប្រាស់បណ្តាញសង្គមហ្វេសប៊ុកមានការភ្ញាក់ផ្អើលគ្រប់គ្នាបន្ទាប់ពីតារាចម្រៀងរ៉េប នេនទុំ បានបង្ហោះពីហេតុការណ៍គ្រោះថ្នាក់ចរាចរណ៍ដ៏រន្ធត់មួយបណ្តាលឲ្យរថយន្តក្រឡាប់ផ្ងារជើង។

យោងតាមការបង្ហោះនៅលើទំព័រហ្វេសប៊ុលរបស់តារាចម្រៀង នេនទុំ នៅល្ងាចថ្ងៃទី២៤ ខែមិថុនា ឆ្នាំ២០២៣នេះបានបង្ហោះវីដេអូភ្ញាក់ផ្អើលអមជាមួយខ្លឹមសារថា “អស់ពីបុកក្របី​ បុកគោ​ អស់ពីគោ​គេចឆ្កែ​ដេីម្បីជីវិតសត្វឆ្កែមួយ​ក្បាលសុខចិត្តចូលពេទ្យ​ខ្លួនឯង​ទាំងរហេមរហាម​ជីវិតខ្ញុំអេីយ…..ជិះល្បឿន៦០សោះក៏ជួបគ្រោះដែរ។

ផ្អែកតាមរយ:វីដេអូដដែលនោះបានឲ្យដឹងដែរថា រថយន្ត​ដែលប្រឡាប់ផ្ងារជើងនោះ គឺបាន​រង​ការ​ខួច​ខាតខ្ទេច​​ផ្នែក​ខាង​ដំបូលពីលើ និងខាងមុខប៉ុន្តែ​​មិន​បណ្ដាលគ្រោះថ្នាក់​ដល់​ជីវិត​ឡើយ។

តាមរយ:ដំណឹងនៃគ្រោះថ្នាក់ចរាចរណ៍នេះបានធ្វើឲ្យអ្នកគាំទ្រជាច្រើនរួមទាំងមិត្តភក្តិរួមអាជីពសិល្ប:មួយចំនួនធំបានបង្ហាញការព្រួយបារម្ភ និងជូនពរឲ្យតារាចម្រៀង នេនទុំ មានសុវត្ថិភាពល្អ និងជៀសផុតពីគ្រោះថ្នាក់ធ្ងន់ធ្ងរផងដែរ។កម្ពុជាថ្មី នៅល្ងាចថ្ងៃទី២៤ ខែមិថុនានេះមិនទាន់អាចទាក់ទងដើម្បីសូមការសួរនាំពី នេនទុំ បាននៅឡើយទេជុំវិញហេតុការណ៍នេះ។

គួររម្លឹកដែរថា នេះមិនមែនទើបជាលើកទី១នោះទេ ខណ:កាលពីអំឡុងដើមខែមីនា ឆ្នាំ២០២០កន្លងទៅតារាចម្រៀងនិងរ៉េបដែលមានប្រជាប្រិយភាព នេន ទុំ ក៏ធ្លាប់បានជួបគ្រោះថ្នាក់ចរាចរណ៍ដោយបើករថយន្តបុកក្របីក្នុងពេលធ្វើដំណើរទៅថតបទចម្រៀងនៅខេត្តព្រះសីហនុផងដែរ ប៉ុន្តែកាលនោះគឺបានធ្វើឲ្យរថយន្តរបស់ នេនទុំ ផ្នែកខាងមុខ​ខូចខាតយ៉ាងខ្លាំង ចំណែក នេន ទុំ មិនមានរបួសអ្វីធ្ងន់ធ្ងរឡើយ៕

អត្ថបទ៖ ចាន់រ៉ា