ឱកាសបុណ្យចូលឆ្នាំថ្មី ពលរដ្ឋចង់ឃើញការលេងល្បែងប្រជាប្រិយជាងការបាញ់ទឹក និងប៉ាតម្សៅ

ក្នុងឱកាសបុណ្យចូលឆ្នាំប្រពៃណីជាតិខ្មែរដែលខិតជិតចូលមកដល់ខាងមុខនេះ ប្រជាពលរដ្ឋចង់ឃើញការលេងល្បែងប្រជាប្រិយឱ្យបានច្រើន ជាជាងការនាំគ្នាលេងបាញ់ទឹក គប់ទឹក ឬប៉ាតម្សៅតាមដងផ្លូវសាធារណៈនាំឱ្យបាត់បង់របៀបរៀបរយសង្គម។

លោក យាន ចំរើន ប្រជាពលរដ្ឋបានលើកឡើងថា ការលេងបាញ់ទឹក ឬប៉ាតម្សៅនេះ បើលេងនៅក្នុងបរិវេណ ឬទីតាំងដែលមានការរៀបចំត្រឹមត្រូវ គឺមិនខុសឆ្គងប៉ុន្មាននោះទេ ប៉ុន្តែបើបងប្អូនទូទៅ ពិសេសប្អូនៗយុវជននាំគ្នាចេញទៅលេងគប់ទឹក ឬបាញ់ទឹកតាមដងផ្លូវសាធារណៈវាប្រាកដណាស់ នឹងធ្វើឱ្យមានការប៉ះពាល់ដល់ការធ្វើដំណើររបស់អ្នកដំណើរ ប៉ះពាល់ដល់សណ្តាប់ធ្នាប់ និងរបៀបរៀបរយសាធារណៈក្នុងសង្គមជាតិ ព្រោះនេះមិនមែនជាល្បែងប្រជាប្រិយប្រពៃណីរបស់ខ្មែរនោះទេ។ លោកបានបន្ថែមថា ការលេងប៉ាតម្សៅនេះ អាចជាឱកាសសម្រាប់ជនឆ្លៀតឱកាស លូកលន់ បៀតបៀន ឬបាត់បង់គ្រឿងអលង្ការជាដើម។

សូមជម្រាបថា ក្នុងឱកាសបុណ្យចូលឆ្នាំប្រពៃណីជាតិខ្មែរខាងមុននេះ រដ្ឋបាលរាជធានីភ្នំពេញនឹងរៀបចំសង្ក្រាន្តវត្តភ្នំ ព្រមទាំងភ្ជាប់ជាមួយផ្លូវថ្មើរជើងថ្មី (Walk-Street) រយៈពេល៥ថ្ងៃដើម្បីអបអរសាទរពិធីបុណ្យចូលឆ្នាំថ្មីប្រពៃណីជាតិ ជូនបងប្អូនចូលរួមលេងកម្សាន្តទាំងអស់គ្នា។

ជារៀងរាល់ឆ្នាំនៅតាមបណ្តាភូមិឋាន ទីវត្តអារាម ឬសាលារៀននានា តែងមានការរៀបចំប្រារព្ធកម្មវិធីសង្ក្រាន្ត ដើម្បីជាការអបអរសាទរបុណ្យចូលឆ្នាំថ្មីប្រពៃណីជាតិខ្មែរ ដោយមានកម្មវិធីកម្សាន្តជាច្រើន លក្ខណៈសម័យផង និងប្រពៃណីតាមទំនៀមទំលាប់របស់ខ្មែរផង ដែលនេះជាពេលវេលាអាចឱ្យប្រជាពលរដ្ឋមកពីទីជិតទីឆ្ងាយ អាចចូលរួមទៅលេងកម្សាន្តបានដោយសេរី៕

អត្ថបទ៖ សុភា