នេះចំណុច​ពិសេសកម្រមាន ធ្វើឱ្យ​ចាត់ទុក Yuji Nishida ជា​ស្តេច​នាគ​​បាល់ទះជប៉ុន

កីឡាករ Yuji Nishida ជាឈ្មោះតារាបាល់ទះជប៉ុន ដែលមានកិត្តិនាមល្បីខ្ទរខ្ទារ​ពេញតំបន់អាស៊ី និងពិភពលោក ខណៈរូបគេមានសមត្ថភាពល្អខ្លាំង រហូតត្រូវបានគេចាត់ទុក​ជាស្តេចបាល់ទះជប៉ុន និង​ត្រូវ​បាន​គេដាក់រហស្សនាម​ជាស្តេចនាគជប៉ុន ឬ (Dragon God of Japan)។

Yuji Nishida ជាក្មេងប្រុសម្នាក់ ដែលបានកើតនៅថ្ងៃទី ៣០ ខែ មករា ឆ្នាំ ២០០០ នៅទីក្រុង Inabe ក្នុងប្រទេស ជប៉ុន។ នៅពេលរៀនថ្នាក់ទី ៦ យុវជន​រូប​នេះ​បានចាប់ផ្តើមលេងបាល់ទះ ហើយរូបគេបានក្លាយជាប្រធានក្រុមសាលា​បឋម​សិក្សា និងបានដឹកនាំក្រុមខ្លួនឱ្យឈ្នះពាន President’s Cup of Mie Prefecture ១ គ្រឿង។

យុវជន Yuji Nishida បានក្លាយជាកីឡាករបាល់ទះអាជីព និងបានបង្ហាញខ្លួនដំបូងនៅលីគបាល់ទះជប៉ុន ជាមួយក្លិប JTEKT Stings នៅឆ្នាំ ២០១៨។ នៅក្នុងឆ្នាំនោះដដែល នៅពេលគាត់មានវ័យ ១៨ ឆ្នាំ។ គាត់ត្រូវបានកោះហៅចូលក្រុមជម្រើសជាតិ ជប៉ុន ហើយរឿងដ៏អស្ចារ្យមួយ គឺនៅពេលជួបជាមួយក្រុមជម្រើសជាតិ អាហ្សង់ទីន ក្នុងពានរង្វាន់ World Championships គាត់ធ្វើបានកំណត់ត្រាមួយ ដោយក្លាយជាកីឡាករវ័យក្មេងបំផុត ដែលអាចរកពិន្ទុបានដល់ ៣០ គ្រាប់។

បច្ចុប្បន្នស្មាត់ស្តាំកម្ពស់ ១.៨៧ ម៉ែត្រ រូបនេះ កំពុងត្រូវបានគេចាត់ទុក​ជាស្តេចបាល់ទះរបស់ប្រទេស ជប៉ុន ដោយសារគាត់ជាកីឡាករម្នាក់ ដែលមានសមត្ថភាពពិសេសកម្ររកមាន។ ចំណុចពិសេសរបស់គាត់ ដែលធ្វើឱ្យគេស្ងើចសរសើរមិនដាច់ពីមាត់ គឺគាត់មានកម្លាំងដៃឆ្វេងធ្ងន់ ការចេញសេវាលឿន និងខ្លាំង ហើយ​លោត​ក៏​បាន​ខ្ពស់​ថែម​ទៀត។

ក្នុងអាជីពជាកីឡាករបាល់ទះ Yuji Nishida ធ្លាប់លេងនៅក្លិប JTEKT Stings (ជប៉ុន), Volley Callipo (អ៉ីតាលី) និងសព្វថ្ងៃកំពុងលេងនៅក្លិប Panasonic Panthers (ជប៉ុន)។ បើនិយាយអំពីស្នាដៃល្អៗជាមួយជម្រើសជាតិ ជប៉ុនវិញ តារាបាល់ទះវ័យ ២៥ ឆ្នាំរូបនេះ ធ្លាប់ជួយឱ្យក្រុមសាំមូរ៉ៃ ឈ្នះមេដាយប្រាក់ព្រឹត្តិការណ៍ អូឡាំពិក ២០២៤ នៅបារាំង, មេដាយប្រាក់ FIVB Nations League ២០២៤ និងមេដាយសំរឹទ្ធ FIVB Nations League ២០២៣៕

អត្ថបទ៖ សេម កុសល