កម្ពុជារកឃើញករណី​​សង្ស័យ​ជំងឺ​អុតស្វា​បន្តបន្ទាប់ តែអវិជ្ជមានទាំងអស់

លោកវេជ្ជបណ្ឌិត លី សូវ៉ាន់ ប្រធាននាយកដ្ឋានប្រយុទ្ធ និងជំងឺឆ្លង និងជាអ្នកនាំពាក្យក្រសួងសុខាភិបាលមានបានឱ្យដឹងនៅរសៀលថ្ងៃទី០៦កក្កដានេះថា កម្ពុជាបានរកឃើញករណីសង្ស័យជំងឺអ៊ុតស្វាជាបន្តបន្ទាប់ ប៉ុន្តែក្រោយពីយកវត្ថុវិភាគទៅពិនិត្យនៅវិទ្យាស្ថានប៉ាស្ទ័រកម្ពុជា លទ្ធផលបង្ហាញថាអវិជ្ជមានទាំងអស់។

លោកវេជ្ជបណ្ឌិតបានបន្តថា រហូតមកដល់ពេលនេះ កម្ពុជានៅមិនទាន់មានអ្នកដំណើរមកពីក្រៅប្រទេសណាម្នាក់ត្រូវបានរកឃើញថាមានឆ្លងជំងឺអ៊ុតស្វានៅឡើយទេ ពោលគឺមានតែករណីសង្ស័យនៅក្នុងស្រុកប៉ុណ្ណោះ ដោយពួកគាត់មានរោគសញ្ញាកន្ទួលនៅលើស្បែកហើយត្រូវបានក្រុមការងារឆ្លើយតបបន្ទាន់យកវត្ថសំណាកទៅវិភាគនៅវិទ្យាស្ថានប៉ាស្ទ័រកម្ពុជា ហើយជាលទ្ធផលអវិជ្ជមានទាំងអស់មិនមែនជាជំងឺអ៊ុតស្វាទេ វាគ្រាន់តែជាជំងឺផ្សេងដែលចេញរោគសញ្ញាកន្ទួលនៅលើស្បែកដែរ។

លោកវេជ្ជបណ្ឌិតបានឱ្យដឹងទៀតថា« ប្រព័ន្ធតាមដាននៅតែបន្តរុករកជំងឺអ៊ុតស្វាហើយយើងបានរកឃើញ ករណីសង្ស័យជាបន្តបន្ទាប់តែលទ្ធផលតេស្តអវិជ្ជមានទាំងអស់ដោយករណី ដែលសង្ស័យទាំងនោះមានមួយចំនួនជាជំងឺពងបែកដៃជើងលើកុមារនិងមួយចំនួនទៀតជាជំងឺសើរស្បែកផ្សេងៗទៀត»។

លោកវេជ្ជបណ្ឌិតបានបន្តទៀតថា ការរកឃើញករណីសង្ស័យជំងឺអ៊ុតស្វាជាបន្តបន្ទាប់​នេះសបញ្ជាក់ថា កម្ពុជាមានសមត្ថភាពគ្រប់គ្រាន់ក្នុងការស្វែងរកជំងឺឆ្លងថ្មីៗបានរហ័សនិងទាន់ពេលវេលា ពិសេសជំងឺកូវីដ១៩ដែលយើងបានរកឃើញជាលើកដំបូងនៅថ្ងៃទី២៧ខែមករាឆ្នាំ២០២០បន្ទាប់ពីជំងឺនេះបានផ្ទុះនៅទីក្រុងអ៊ូហានប្រទេសចិនរួចមក។

​យ៉ាងណាក៏ដោយលោកវេជ្ជបណ្ឌិត បានណែនាំដល់ក្រុមការងារឆ្លើយតបបន្ទាន់ប្រមាណ៥ពាន់នាក់ ដែលបានកំពុងដាក់ពង្រាយនៅនៅទូទាំងប្រទេស បន្តខិតខំស្វែងរកនិងស្រាវជ្រាវរកករណីសង្ស័យជំងឺឆ្លងអ៊ុតស្វានិងជំងឺឆ្លងផ្សេងៗទៀតឱ្យបានលឿន ដើម្បីអាចមានវិធានការទប់ស្កាត់ការឆ្លងរាលដាលបានទាន់ពេលវេលា ។

​លោក វេជ្ជបណ្ឌិតបានលើកទឹកចិត្ត​ដល់បងប្អូនប្រជាពលរដ្ឋដែលឃើញករណីសង្ស័យ​មានជំងឺអ៊ុត​ស្វា ដែលមានរោគសញ្ញាដូចជាក្តៅខ្លួនឈឺក្បាលខ្លាំង ហើមកូនកណ្ដុរឈឺសាច់ដុំនិងចេញ​កន្ទួលដែល​មាន​ពងបែកកន្តួលមានទំនោរប្រមូលផ្ដុំនៅលើមុខ​បាតដៃនិងបាតជើង​មាត់ត្រូវប្រញាប់​រាយ​ការណ៍ទៅអាជ្ញាធរសុខាភិបាលឬតេទៅលេខ ១១៥ ​ជាបន្ទាន់ដើម្បីយកវត្ថុវិភាគ​ទៅធ្វើរោគ​វិនិច្ឆ័យ​រកជំងឺអ៊ុតស្វាឱ្យបានទាន់ពេលវេលា។

លោក វេជ្ជបណ្ឌិតបានលើកឡើងទៀតថាជំងឺអ៊ុតស្វានេះ ត្រូវបានគេរកឃើញនៅប្រទេសអាហ្វ្រិកខាងលិចនិងអាហ្វ្រិកកណ្តាលដែលបច្ចុប្បន្ននេះបានឆ្លងនៅក្នុងសហគមន៍នៃបណ្តាប្រទេសអឺរ៉ុបមួយចំនួន កាណាដា អូស្ត្រាលី អាមេរិកនិងប្រទេសនៅអាស៊ានមួយចំនួន៕

អត្ថបទ៖ សំអឿន​