ព័ត៌មានជាតិ

ខេត្តចំនួន៥ បានបិទបញ្ចប់យុទ្ធនាការចាក់វ៉ាក់សាំងការពារជំងឺកូវីដ-១៩

បានផុស

៣ ខែ មុន

នៅ

ថ្ងៃសុក្រ ៦ សីហា ២០២១

ដោយ

រាជធានីខេត្តចំនួន៥ បានបិទបញ្ចប់យុទ្ធនាការចាក់វ៉ាក់សាំងការពារជំងឺកូវីដ-១៩ ជូនដល់ប្រជាពលរដ្ឋអាយុចាប់ពី១៨ឆ្នាំឡើងទៅ ខណៈខេត្តចំនួន២០ទៀត កំពុងដំណើរការចាក់ដូសទី១ និងដូសទី២នៅឡើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកជំទាវវេជ្ជបណ្ឌិត ឱ វណ្ណឌីន រដ្ឋលេខាធិការក្រសួងសុខាភិបាល និងជាប្រធានគណៈកម្មការចំពោះកិច្ចចាក់វ៉ាក់សាំងក្នុងក្របខណ្ឌទូទាំងប្រទេស បានមានប្រសាសន៍នៅព្រឹកថ្ងៃទី៦ ខែសីហានេះថា រហូតមកដល់ពេលនេះ មានរាជធានីខេត្តចំនួន៥ហើយ បានបិទបញ្ចប់យុទ្ធនាការចាក់វ៉ាក់សាំងការពារជំងឺកូវីដ១៩ដល់ប្រជាពលរដ្ឋដែលមានអាយុចាប់ពី១៨ឆ្នាំឡើងទៅ រួមមានរាជធានីភ្នំពេញ ខេត្តកណ្តាល កំពង់ស្ពឺ ព្រះសីហនុ និងខេត្តកោះកុង។

លោកជំទាវបានបន្តថា ចំណែកខេត្ត២០ទៀតកំពុងដំណើរការចាក់វ៉ាក់សាំងដូសទី១ និងដូសទី២ជូនដល់ប្រជាពលរដ្ឋនៅឡើយ។

យ៉ាងណាក៏ដោយ លោកជំទាវបានបន្តទៀតថា តាមផែនការរដ្ឋាភិបាលគ្រោងនឹងចាក់វ៉ាក់សាំងជូនដល់ប្រជាពលរដ្ឋអាយុចាប់ពី១៨ឆ្នាំឡើងទៅ ឱ្យរួចរាល់នៅចុងឆ្នាំ២០២១នេះ ខណៈគិតត្រឹមថ្ងៃទី៥ ខែសីហា ឆ្នាំ២០២១នេះ ក្រុមគ្រូពេទ្យចាក់បានចំនួន៧,៧០៤,៩៨២នាក់ ស្មើនឹង៧៤.៤២ភាគរយ បើធៀបនឹងគោលដៅ១០លាននាក់។

លោកជំទាវបានបន្ថែមទៀតថា បន្ទាប់ពីបិទបញ្ចប់ការចាក់ដល់មនុស្សពេញវ័យ រាជធានីខេត្តទាំង៥នោះបានបន្តចាក់ជូនដល់កុមារនិងយុវវ័យដែលមានអាយុ១២ឆ្នាំដល់អាយុ១៧ឆ្នាំ ដែលបានបើកយុទ្ធនាការកាលពីថ្ងៃទី០១ ខែសីហា ឆ្នាំ២០២១ ។

លោកជំទាវបានបញ្ជាក់ថា ចាប់ពីថ្ងៃទី០១ រហូតមកដល់ថ្ងៃទី៥ ខែសីហា ឆ្នាំ២០២១នេះ មានកុមារនិងយុវវ័យចំនួន១៦៣,១១៣នាក់ ស្មើនឹង៨.២៩ភាគរយ ទទួលបានការចាក់វ៉ាក់សាំងលើគោលដៅចាក់ទូទាំងប្រទេសជិត២លាននាក់។

គួរបញ្ជាក់ថា បច្ចុប្បន្ននេះរដ្ឋាភិបាលបានកំពុងដំណើរការចាក់វ៉ាក់សាំងការពារជំងឺកូវីដ១៩ជូនដល់ប្រជាពលរដ្ឋចំនួន៤ប្រភេទ រួមមានវ៉ាក់សាំងស៊ីណូហ្វាម វ៉ាក់សាំងស៊ីណូវ៉ាក់ របស់ប្រទេសចិន វ៉ាក់សាំងអាស្ត្រាហ្សេណេកា និងវ៉ាក់សាំង ចនសាន់ចនសាន់ របស់អាមេរិក៕

អត្ថបទ ៖ សំអឿន

Related Topics:យុទ្ធនាការចាក់វ៉ាក់សាំង

Up Next

ការនាំចូលវ៉ាក់សាំងកូវីដ១៩របស់ក្រុមហ៊ុនឯកជន នឹងជួយសម្រាលបន្ទុករបស់រដ្ឋ

Don't Miss

កម្លាំងជំនាញឃាត់ខ្លួនជនសង្ស័យចំនួន៤ និងគ្រឿងញៀនជិត៤គីឡូ