សម្តេចតេជោ ហ៊ុន សែន៖ កំណើនសេដ្ឋកិច្ចកម្ពុជានឹងកើនឡើង ៥,៦ % ក្នុងឆ្នាំ២០២៣

សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជាបានថ្លែងថា កំណើនសេដ្ឋកិច្ចកម្ពុជាក្នុងឆ្នាំ២០២៣នេះ នឹងកើនឡើង ៥,៦ % ខណៈឆ្នាំ២០២៤ នឹងកើនឡើងចំនួនឡើងក្នុងរង្វង់ ៦,៦%។ ថ្លែងក្នុងឱកាសអញ្ជើញចុះជួបកម្មករ កម្មការិនី ជាង២ម៉ឺននាក់ នៅតំបន់សេដ្ឋកិច្ចពិសេស មេនហាតធេន (MANHATTAN) ក្រុងបាវិត ខេត្តស្វាយរៀង នាព្រឹកថ្ងៃទី២៥ ខែមិថុនា នេះ សម្តេចបានបន្ថែមថា កំណើនទាំងនេះបានផ្តល់ផលប្រយោជន៍ដល់ប្រទេសជាតិ និងប្រជាជនកម្ពុជាគ្រប់ៗគ្នា។

ធនាគារអភិវឌ្ឍន៍អាស៊ី( ADB) បានព្យាករណ៍ថា ឆ្នាំ២០២៣ សេដ្ឋកិច្ចកម្ពុជានឹងមានកំណើនក្នុងអត្រា ៥,៥ ភាគរយនៅឆ្នាំនេះ ដោយសារការស្ទុះងើបឡើងវិញដ៏រឹងមាំនៃវិស័យទេសចរណ៍ និងកំណើនកាន់តែខ្ពស់ក្នុងវិស័យសេវាកម្ម។ ទិន្នផលឧស្សាហកម្មត្រូវបានរំពឹងថានឹងកើន ៥,៨ ភាគរយក្នុងឆ្នាំ ២០២៣ មុននឹងហក់ឡើងដល់ ៧,៨ ភាគរយនៅឆ្នាំ ២០២៤។ កំណើនវិស័យសំណង់ត្រូវរំពឹងថា នឹងនៅតែយឺត ចំណែកឯវិស័យកសិកម្មត្រូវព្យាករថា នឹងកើន ១,១ ភាគ​រយនៅឆ្នាំនេះ និង ១,២ ភាគរយក្នុងឆ្នាំ ២០២៤ ដែលជំរុញដោយទិន្នផលសម្រាប់ការនាំចេញ។

យ៉ាងណាមិញសេដ្ឋកិច្ចកម្ពុជាសម្រេចបាន ៥,១% កាលពីឆ្នាំ២០២២ ដោយសារប្រសិទ្ធភាពនៃគោលនយោបាយសុខភាព និងការគ្រប់គ្រងការរីករាលដាលជំងឺកូវីដ ១៩ បានធានាដល់ការចាប់ផ្ដើមឡើងវិញនូវសកម្មភាពសេដ្ឋកិច្ចក្នុងស្រុក និងការកើនឡើងតម្រូវការខាងក្រៅ ទោះបីមានភាពតានតឹងដោយសារតែការប្រកួតប្រជែងភូមិសាស្ត្រនយោបាយ ដែលកើតចេញពីសង្គ្រាមអ៊ុយក្រែនក៏ដោយ។

ត្រង់ចំណុចនេះក្នុងឱកាសជួបកម្មករកម្មការិនីកាលពីព្រឹកមិញ សម្តេចតេជោ បានសង្កត់ធ្ងន់ថា ដរាបណាសង្រ្គាមរុស្ស៊ី-អ៊ុយក្រែន និងនយោបាយដាក់ទណ្ឌកម្មសេដ្ឋកិច្ចជាឯកតោភាគីមិនទាន់ចប់ នោះភាពមិនច្បាស់លាស់នៃសេដ្ឋកិច្ច​សកល គឺនៅតែមាន ហើយសេដ្ឋកិច្ចកម្ពុជា ក៏រងផលប៉ះពាល់ដូចគ្នា ដោយសារការបញ្ជាទិញក្នុងវិស័យកាត់ដេរបានធ្លាក់ចុះ និងកត្តាផ្គត់ផ្គង់វត្ថុធាតុដើម៕