កម្ពុជា-បង់ក្លាដេស ប្តេជ្ញាបង្កើនទំនាក់ទំនង​វិនិយោគពាណិជ្ជកម្មនិងពង្រីក​ការនាំចេញវិស័យកសិកម្ម

កម្ពុជា និងបង់ក្លាដេស ប្តេជ្ញាបង្កើនទំនាក់ទំនង និងវិនិយោគជាមួយគ្នាលើវិស័យពាណិជ្ជកម្ម និងការនាំចេញ​ផលិតផលកសិកម្មរបស់កម្ពុជា ជាដើម។

ការប្តេជ្ញាបង្កើនទំនាក់ទំនងលើវិស័យពាណិជ្ជកម្ម និងការនាំចេញផលកសិកម្មនេះ ធ្វើឡើងនៅក្នុងជំនួប​ពិភាក្សាការងាររវាងសម្តេចតេជោ ហ៊ុន សែន នាយករដ្ឋមន្រ្តីកម្ពុជា និងលោកស្រី Sheikh HASINA នាយករដ្ឋមន្រ្តីបង់ក្លាដេស នៅយប់ថ្ងៃទី ២២ ខែ កញ្ញា នៅទីក្រុងញូយ៉កសហរដ្ឋអាមេរិក។

លោក កៅ គឹមហួន រដ្ឋមន្ត្រីប្រតិភូអមនាយករដ្ឋមន្ត្រី បានថ្លែងថា ឆ្លៀតឱកាសនេះ សម្តេចតេជោបានសាទរ នូវការសាងសង់ស្ពានមួយដ៏វែងឈ្មោះថា ផាន់ម៉ា ដែលមានប្រវែង ៦.៥គីឡូម៉ែត្រ នៅបង់ក្លាដេស ក្រោមការដឹកនាំរបស់លោកស្រីនាយករដ្ឋមន្រ្តី ដែលផ្លូវនេះ នឹងបម្រើទាំងរថយន្ត និងរថភ្លើង។

សម្តេចតេក៏បានថ្លែងអំណរគុណដល់នាយករដ្ឋមន្រ្តីបង់ក្លាដេស បានសម្ពោធផ្លូវមួយខ្សែ ដែលដាក់ព្រះនាមសម្តេចឪ នៅក្នុងប្រទេសបង់ក្លាដេសផងដែរ។ ទន្ទឹមនឹងនេះ កម្ពុជា ក៏បានដាក់ឈ្មោះផ្លូវ ដើម្បីជាការផ្តល់កិត្តិសដល់​ឪពុកលោកស្រីនាយករដ្ឋមន្រ្តី ដែលចាត់ទុកជាបិតាស្ថាបនិក នៃប្រទេសបង់ក្លាដេស និងបានក្លាយជាប្រធានាធិបតីទី១ និងក្រោយមកក្លាយជានាយករដ្ឋមន្រ្តី នៃប្រទេសបង់ក្លាដេស។

ពាក់ព័ន្ធនឹងការវិនិយោគ សម្តេចក៏បានលើកឡើងអំពីការនាំចេញអង្ករពីកម្ពុជា ទៅបង់ក្លាដេសផងដែរ។ កន្លងមក បង់ក្លាដេស បានការចរចាទិញអង្ករប្រមាណ ២០ម៉ឺនតោនពីកម្ពុជា។ ដោយសម្តេចតេជោ ចង់ឱ្យមានស្ថេរភាពនៃការ​នាំចេញអង្ករពីកម្ពុជា ទៅបង់ក្លាដេសផងដែរ។ ជាមួយគ្នានេះ សម្តេចនាយករដ្ឋមន្រ្តីកម្ពុជា បានជំរុញឱ្យក្រុមហ៊ុន ឬវិនិយោគិនបង់ក្លាដេសចូលមកវិនិយោគក្នុងការធ្វើឃ្លាំង និងកែច្នៃអង្ករ ដើម្បីនាំចេញទៅបង់ក្លាដេសបន្ថែមទៀត។

ក្រោមការដឹកនាំរបស់សម្តេចតេជោ សព្វថ្ងៃកម្ពុជា មានស្រូវស្តុកទុកប្រមាណ ៦,៦លានតោន និងអង្ករ ៤,២លានតោន ហើយបច្ចុប្បន្នបាននាំចេញទៅប្រទេសវៀតណាម និងប្រទេសអារ៉ាប់រួមផងដែរ។

ជាការឆ្លើយតប លោកស្រី Sheikh HASINA នាយករដ្ឋមន្រ្តីបង់ក្លាដេស គាំទ្រចំពោះផែនការបង្កើន​ទំនាក់ទំនាក់ពាណិជ្ជកម្មរវាងប្រទេសទាំងពីរ ជាពិសេសនាំចេញអង្ករពីកម្ពុជា ទៅបង់ក្លាដេស។

លោកស្រី បានឱ្យដឹងថា ប្រទេសបង់ក្លាដេស មានទំហំដីតូច ប្រជាជនច្រើន។ បង់ក្លាដេស ងាយទទួលរងគ្រោះដោយ​ទឹកជំនន់ ដូច្នេះបង់ក្លាដេស ត្រូវការនាំចូលស្បៀងដូចជាអង្ករជាច្រើន ដើម្បីផ្គត់ផ្គង់ក្នុងប្រទេស។

ជាមួយគ្នានេះ លោកស្រី បានលើកឡើងអំពីកិច្ចព្រមព្រៀង ដោយអនុញ្ញាតឱ្យក្រសួងការបរទេសប្រទេសទាំងពីរ ធ្វើការរួមគ្នា បង្កើនការតភ្ជាប់ទៅលើវិស័យធុរកិច្ចពាណិជ្ជជាមួយគ្នា។

លោកស្រី ក៏ជំរុញឱ្យមានកិច្ចព្រមព្រៀងទីផ្សារសេរី រវាងប្រទេសទាំងពីរ ដើម្បីបង្កើនឱ្យកាសផលិតនាំចេញបន្ថែមទៀត។

ពាក់ព័ន្ធនឹងការលើកឡើងនេះ សម្តេចមានប្រសាសន៍ថា គឺជាការចាំបាច់ដែលត្រូវបង្កើតកិច្ចព្រមព្រៀង​ទីផ្សារសេរីរវាង​ប្រទេស​ទាំងពីរ ដើម្បីឱ្យមានកំណើននៃការនាំចេញកាន់តែច្រើនរវាងប្រទេសទាំងពីរ។ ស្របពេលដែលកម្ពុជា បានបង្កើតកិច្ចព្រមព្រៀងទីផ្សារសេរីជាមួយចិន និងកូរ៉េ រួចហើយដែរ។

បច្ចុប្បន្នកម្ពុជា កំពុងស្វែងរងដៃគូវិនិយោគពីប្រទេសផ្សេងទៀត ដើម្បីបង្កើនទីផ្សារពាណិជ្ជនាំចេញផលិតផលផ្សេងៗ។

កម្ពុជា បង់ក្លាដេស ក៏បានប្តេជ្ញារក្សាទំនាក់ទំនង និងចែករំលែកបទពិសោធន៍គ្នាទៅវិញទៅមក រវាងប្រទេសទាំងពីរផងដែរ៕