អ្នកជំនាញ៖ កំណើនសេដ្ឋកិច្ចកម្ពុជានៅឆមាសទី១កើនទាបជាងការរំពឹងទុក

លោក Stephen Higgins សហនាយកគ្រប់គ្រងនៃក្រុមហ៊ុន Mekong Strategy បានលើកឡើងថា សេដ្ឋកិច្ចរបស់ប្រទេសកម្ពុជាចាប់ផ្តើមថមថយកំណើនចាប់តាំងប៉ុន្មានឆ្នាំមុន ហើយកំណើនយឺតនៅតែបន្តនៅឆមាសទី១​ឆ្នាំ២០២៤នេះ ដែលកើនតិចជាងការរំពឹងទុកដោយសារតែស្ថានភាពសេដ្ឋកិច្ចទាំងក្នុងតំបន់និងសកលហាក់មានសភាពមិនប្រាកដប្រជានៅឡើយ។

យោងតាមលោក Stephen Higgins បានសរសេរនៅលើបណ្តាញសង្គមផ្លូវការរបស់ខ្លួនកាលពីពេលថ្មីៗនេះថាការធ្លាក់ចុះសេដ្ឋកិច្ចបានចាប់ផ្តើមនៅ​ឆមាសទីពីរនៃឆ្នាំ ២០២២ ប្រហែលមួយឆ្នាំមុនការបោះឆ្នោតជាតិឆ្នាំ 2023។ ការធ្លាក់ចុះនេះដោយសារ​លក្ខខណ្ឌសាច់ប្រាក់ងាយស្រួលសកលកាន់តែតឹងរ៉ឹង និងការថមថយ​យ៉ាងខ្លាំងនៃការនាំចេញសម្លៀកបំពាក់ ដែលជាលទ្ធផលបានរួមចំណែកដល់ការធ្លាក់ចុះនៃតម្រូវការក្នុងស្រុក។

​លោកបានថ្លែងអះអាថា៖«ខ្ញុំនៅតែគិតថាកំណើនផលិតផលក្នុងស្រុកសរុបមានប្រហែល ២% ក្នុងឆ្នាំ ២០២៣ ជាជាងការប៉ាន់ប្រមាណជាផ្លូវការក្នុងអត្រា៥% ។ ជាមួយគ្នានេះដែរ កម្រិតនៃការចំណាយក្នុងស្រុក ការបង់ពន្ធ ការផ្តល់ប្រាក់កម្ចីពីធនាគារ ការជំពាក់ប្រាក់កម្ចី និងការនាំចេញសុទ្ធ ​ គឺមិនស៊ីសង្វាក់គ្នាជាមួយនឹងកំណើនសេដ្ឋកិច្ចក្នុងអត្រា ៥% នោះទេ»។

​«ខ្ញុំគិតថាកំណើនសេដ្ឋកិច្ចកម្ពុជាធ្លាក់ចុះខ្លាំង​ នៅក្នុងឆមាសទី១ឆ្នាំ២០២៤នេះ ហើយយើងរំពឹងថានឹងមានកំណើនតិចតួចនៅក្នុងឆមាសទី១ឆ្នាំនេះ»។ នេះបើយោងតាមលោក Stephen។

លោកបានគូសបញ្ជាក់កំណើននេះត្រូវបានគាំទ្រដោយ​​កំណើនខ្ពស់នៃការនាំចេញ ដែលក្នុងនោះគឺការនាំចេញសម្លៀកបំពាក់កាត់ដេរ និងវាយនភ័ណ្ឌដោយកើនឡើងជាង ២២% នៅឆ្នាំ ២០២៣ ​។ ខណៈពេលដែល​ផលិតផលក្នុងស្រុកសរុបក៏បានចូលរួមបំពេញតម្រូវការក្នុងស្រុកផងដែរ។

​សម្រាប់វិស័យទេសចរណ៍នៅឆមាសទីមួយឆ្នាំ ២០២៤ មានកំណើនយឺតជាងការរំពឹងទុក ប៉ុន្តែយើងរំពឹងថានឹងមានកំណើនខ្ពស់នៅត្រីមាសទី ៤ ​ដោយសារតែតម្លៃនៃជើងហោះហើរថោកជាងមុន និងសមត្ថភាពហោះហើរកាន់តែច្រើនទិសដៅ។ ជាមួយគ្នានេះដែរ សម្រាប់សាច់ប្រាក់ងាយស្រួលមានភាពប្រសើរជាងមុន​នៅក្នុងវិស័យធនាគារ​។ ជាមួយគ្នានេះដែរ អត្រា​ការ​ប្រាក់​បានកំពុង​ធ្លាក់​ចុះ ហើយការផ្តល់​កម្ចី​អាចនឹងបន្ត​ធ្លាក់​ចុះ​រហូត​ដល់​ចុង​ឆ្នាំ។

​លោកបានថ្លែងបន្តទៀតថា៖«កម្ពុជា​បន្ត​វិនិយោគ​លើ​ហេដ្ឋារចនាសម្ព័ន្ធ​ដែល​នឹង​ជួយ​គាំទ្រដល់​កំណើនសេដ្ឋកិច្ច។ រដ្ឋាភិបាលកម្ពុជាថ្មីបន្តចាប់អារម្មណ៍លើការផ្តល់បរិយាកាសធុរកិច្ចល្អ ប៉ុន្តែរដ្ឋាភិបាលក៏ត្រូវពិចារណាលើការលើកទឹកចិត្តផ្នែកសារពើពន្ធបន្ថែមទៀត។ ជាមួយគ្នានេះដែរ យើងក៏មើលឃើញថាស្ថានភាពសកលអាចនៅតែបន្តមានភាពមិនប្រាកដប្រជានៅក្នុងរយៈពេល៦ទៅមុខទៀត»។

យោងតាមរបាយការណ៍ចេញផ្សាយដោយក្រសួងសេដ្ឋកិច្ចនិងហិរញ្ញវត្ថុកាលពីពាក់កណ្តាលខែសីហា​ តាមរយៈសកម្មភាពសេដ្ឋកិច្ចក្នុងរយៈពេល ៦ ខែ ដើមឆ្នាំ ២០២៤ នេះ, សេដ្ឋកិច្ចកម្ពុជា ត្រូវបានវាយតម្លៃថាអាចនឹងសម្រេចបានក្នុងអត្រាកំណើន ៦% ក្នុងឆ្នាំ ២០២៤ ជាមួយនឹងអត្រាអតិផរណាប្រមាណ ២.៧១%។

ជាមួយនឹងអត្រាកំណើន​គាំទ្រដោយមានវិស័យខ្លះបានងើបឡើងវិញ, វិស័យខ្លះមានកំណើនយឺត និងវិស័យខ្លះបន្តកំណើនទាប ខណៈដែលភាពមិនប្រាកដប្រជានៃលក្ខខណ្ឌសេដ្ឋកិច្ចសកលលោកបន្តនៅខ្ពស់ហើយស្លាកស្នាមនៃវិបត្តិកូវីដ-១៩ នៅបន្តបង្កផលប៉ះពាល់អវិជ្ជមាន។ ​

«ទស្សនវិស័យសេដ្ឋកិច្ចកម្ពុជា សម្រាប់ឆ្នាំ ២០២៤ នៅតែបន្តហ៊ុមព័ទ្ធដោយភាពមិនប្រាកដប្រជាខ្ពស់នៃបរិការណ៍ខាងក្រៅដោយសារការកើនឡើងនូវភាពតានតឹងភូមិសាស្ត្រនយោបាយតំបន់ និងសកល, ជាពិសេសការអាចផ្ទុះឡើងក្នុងទ្រង់ទ្រាយធំនូវជម្លោះនៅតំបន់សមុទ្រក្រហម ដែលអាចធ្វើឱ្យប៉ះពាល់ដល់ច្រវាក់ផ្គត់ផ្គង់សកលអាចរុញច្រានថ្លៃទំនិញអន្តរជាតិឱ្យហក់ឡើងវិញ«​។ល។ នេះបើយោងតាមក្រសួងសេដ្ឋកិច្ចនិងហិរញ្ញវត្ថុ៕

​​

​