ខ្ញុង បង្ហាញទំហំទឹកប្រាក់ទទួលបានពីសប្បុរជនជួយតាម ABA រយៈពេលពីរថ្ងៃ

រឿងរ៉ាវរបស់តារាកំប្លែងអ្នកនាង ខ្ញុង ដែលទម្លាយថា ជំពាក់បំណុលគេជាងកន្លះលានដុល្លារនោះ មកដល់ពេលនេះនៅតែប្រធានបទក្តៅនៃការជជែកវែកញែករបស់មហាជន និងអ្នកគាំទ្រនៅលើបណ្តាយសង្គមហ្វេសប៊ុក។

បើតាមការកត់សម្គាល់ភាមៗនៃការផ្ទុះរឿងរ៉ាវនេះ គេសង្កេតឃើញមានទស្សនិកជនមួយចំនួនបានបង្ហាញការអាណិត និងខ្លះទៀតលើកទឹកចិត្ត។ ចំណែកមួយចំនួនទៀត ក៏បានរិះគន់ដល់នាងថា ជាការសម្តែងឬការរៀបចំ។

ដោយសារហេតុផលនេះហើយ ទើបនៅព្រឹកថ្ងៃទី២០ ខែតុលា ឆ្នាំ២០២១នេះ តារាកំប្លែង ខ្ញុង បានចេញមុខបកស្រាយនិងបញ្ជាក់ការពិតតាមរយ:សន្និសីទសារព័ត៌មានជាថ្មីនៅផ្ទះរបស់នាងផ្ទាល់។

ខ្ញុង បានបញ្ជាក់ថា អ្វីដែលខ្លួនទម្លាយរឿងជំពាក់លុយគេជាងកន្លះលាននោះ មិនមែនជាការសម្តែង ឬបោកប្រាស់មហាជនទេ។

ជាមួយគ្នានេះ ខ្ញុង ក៏បានបញ្ជាក់ និងបង្ហាញចំនួនទឹកប្រាក់ដែលទទួលបានពីសប្បុរសជនតាមរយ: Acount ABA ដែលគិតត្រឹកព្រឹកថ្ងៃទី២០ ខែតុលានេះ មានចំនួន ៥៦៥ ៣៣.៣៧ ដុល្លារ(ប្រាំម៉ឺន ប្រាំមួយពាន់ ប្រាំរយ សាមសិបបីដុល្លារនិងសាមសិបប្រាំពីរសេន) ខណ:ដែលលុយនេះ គឺជាការជួយពីសប្បុរសជនទាំងអស់៕

អត្ថបទ៖ ចាន់រ៉ា