ទិន្នន័យ​ថ្មី​បំផុត​នៅភ្នំពេញ ខណ្ឌ​ពោធិ៍សែនជ័យ និង​​មាន​ជ័យ​មានអ្នក​ឆ្លង​ធ្ងន់ជាងគេ

បើ​​យោ​ង​តាម​របាយការណ៍​របស់អនុគណៈកម្មការស្រាវជ្រាវកូវីដ ១៩ ខណ្ឌ​ពោពិ៍សែនជ័យ និងមានជ័យ នៅតែជា​តំបន់ផ្ទុះ​ការ​ឆ្លង​ច្រើនជាង​គេ​នៅ​រាជធានី​ភ្នំពេញ។

ក្នុង​ក្រាហ្វិក​បង្ហាញ​ថា ខណ្ឌពោធិ៍សែនជ័យ អត្រាភាគរយរកឃើញអ្នក​ឆ្លង​ជាង ២១ ភាគរយ បន្ទាប់​មកខណ្ឌមានជ័យ ១៥ ភាគរយ។

ខណ្ឌពោធិសែនជ័យ និងមានជ័យ​ជា​ខណ្ឌ​ស្ថិតនៅតំបន់​ហានិភ័យខ្ពស់ ដោយសារ​ទីនោះ​កកកុញដោយ​រោងចក្រ​មានកម្មកររាប់ម៉ឺននាក់បម្រើការងារ ហើយ​ជា​តំបន់ស្មុគស្មាញ​ពិបាក​គ្រប់គ្រង​អ្នក​ចេញចូល។

ថ្លែងក្នុង​សន្និសីទ​ព្រឹកនេះ​ថា លោកកើត ឆែ អភិបាលរង​រាជធានី​ភ្នំពេញ​បាន​ឲ្យ​ដឹង​ថា នៅ​រាជធានី​ភ្នំពេញ​មួយ​ថ្ងៃ​មាន​អត្រា​អ្នក​ឆ្លង​ចន្លោះ​ពី ១០០ ទៅ ៣០០ នាក់។ ជាមួយ​​គ្នានេះ អត្រា​ស្លាប់​ក៏​ខ្ពស់​ដែរ​នៅរាជធានី​ភ្នំពេញ ​សម្រាប់អ្នក​ដែលមាន​បញ្ហា​សុខភាព និង​ស្ថិត​ក្នុង​វ័យ​ចាស់​ជរា។

ក្នុងថ្ងៃនេះ​ដែរ ​ក្រសួង​សុខាភិបាល​បាន​ចេញ​របាយការណ៍​បង្ហាញ​តួលេខអ្នក​ឆ្លង​ថ្មី ៩១១ នាក់ អ្នក​ជា​សះស្បើយ ១០០២ នាក់ និង​ស្លាប់ ២៣ នាក់។

សរុប​តួលេខអ្នក​ឆ្ល​ង​កូវីដ​នៅប្រទេសកម្ពុជា​គិត​ត្រឹមព្រឹកថ្ងៃ ១២ កក្កដា ២០២១​ឡើង​ដល់ ៦១ ៨៧០ នាក់ អ្នក​ជាសះស្បើយ ៥៣ ៤៧៧ នាក់ និង​ស្លាប់ ៩២៥ នាក់៕