Szczęsny ត្រឡប់ពីចូលនិវត្តន៍ បង្ហាញទម្រង់លេងល្អ Barca ត្រៀមបន្តកុងត្រាថ្មី

ក្លិបអ្នកមានបុណ្យ FC Barcelona ត្រៀមបន្តកិច្ចសន្យាថ្មីជូនអ្នកចាំទីសញ្ជាតិ ប៉ូឡូញ Wojciech Szczesny នៅទីផ្សារដោះដូរកីឡាកររដូវក្តៅខាងមុខ។

យោងតាមការចុះផ្សាយដោយអ្នកកាសែត អ៉ីតាលី លោក Fabrizio Romano បានឱ្យដឹងថា ក្លិបអ្នកមានបុណ្យ FC Barcelona និង Wojciech Szczesny កាន់តែខិតជិត ក្នុងការការបន្តកិច្ចសន្យាថ្មីជាមួយគ្នាបន្តទៀត។

ប្រភពដដែលបានអះអាងថា Barcelona ឥឡូវនេះកំពុងតែរៀបចំឯកសារបន្តកិច្ចសន្យាថ្មីជូន​អ្នក​ចាំទី Szczesny រយៈពេលរដូវកាល ដល់ខែ មិថុនា ឆ្នាំ ២០២៦ បូកជាមួយនឹងជម្រើសបន្តកិច្ចសន្យាថ្មីថែមមួយរដូវកាលទៀត។ ជាមួយគ្នានេះ អ្នកចាំទីវ័យ ៣៤ ឆ្នាំក៏បានយល់ព្រម ក្នុងការស្នាក់នៅបន្តផងដែរ។

រម្លឹកថា មុនមកចូលរួមជាមួយ Barcelona អ្នកចាំទី Szczesny ធ្លាប់បានប្រកាសចូលនិវត្តន៍ពីបាល់ទាត់រួចម្តងហើយ កាលពីខែ តុលា ឆ្នាំ ២០២៤ បន្ទាប់ពីបញ្ចប់ភារៈកិច្ចជាមួយក្រុមជម្រើសជាតិ ប៉ូឡូញ នៅព្រឹត្តិការណ៍ Euro ប៉ុន្តែការត្រឡប់មកកាន់បាល់ទាត់វិញលើកនេះ អ្នកចាំទីសញ្ជាតិ ប៉ូឡូញ ពិតជាបង្ហាញសមត្ថភាពអស្ចារ្យមែនទែនជាមួយក្រុមអ្នកមានបុណ្យ ដោយការបង្ហាញខ្លួនកន្លងមក រូបគេមិនទាន់ចាញ់សូម្បីមួយប្រកួត និងបានបិទមិនឱ្យគូប្រកួតស៊ុតបញ្ចូលទីបានចំនួន ៩ ប្រកួតផងដែរ៕

ប្រែសម្រួលអត្ថបទ៖ សេម កុសល
ប្រភព៖ Fabrizio Romano