កើតក្តីបារម្ភបាក់ទំនប់វារីអគ្គិសនីនៅថៃ ក្រោយរញ្ជួយដី

គ្រោះរញ្ជួយដីកម្រិតធ្ងន់នៅប្រទេសមីយ៉ាន់ម៉ា បានជះឥទ្ធិពលខ្លាំងដល់ប្រទេសថៃនៅក្បែរខាង ដោយបណ្តាលឲ្យបាក់អគារស្លាប់មនុស្ស និងបង្កការខូចខាតដល់សំណង់ផ្សេងៗច្រើនទៀត ហើយក៏មានការភ័យខ្លាចផងដែរថា ទំនប់វារីអគ្គិសនីនៅក្នុងតំបន់មួយចំនួន កំពុងប្រឈមហានិភ័យនៃការបាក់ធ្លាយ ព្រោះតែស្នាមប្រេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មានសេចក្តីរាយការណ៍ថា គេប្រទះឃើញស្នាមប្រេះនៅតាមទំនប់ក្នុងខេត្តភាគពាយព្យ ព្រោះតែការរញ្ជួយ ហើយពាក់ព័ន្ធបញ្ហានេះ នាយកដ្ឋានធារាសាស្ត្រថៃ (RID) បានបញ្ជូនមន្ត្រីទៅពិនិត្យនិងវាយតម្លៃ។

យ៉ាងណា ក្រោយការត្រួតពិនិត្យ RID បញ្ជាក់ថា គ្រោះរញ្ជួយដីនៅមីយ៉ាន់ម៉ា មិនបង្កផលប៉ះពាល់ដល់ទំនប់នៅប្រទេសថៃទេ ព្រោះទំនប់ទាំងអស់សុទ្ធតែត្រូវបានសាងសង់ឡើងធន់នឹងការរំញ័រ ប៉ុន្តែនាយកដ្ឋាននឹងបន្តតាមដានស្ថានភាពនិងពិនិត្យទំនប់ ជាបន្តបន្ទាប់។

សូមជម្រាបជាថ្មី កាលពីថ្ងៃសុក្រទី២៨ខែមីនាឆ្នាំ២០២៥ គ្រោះរញ្ជួយដីកម្រិត ៧.៧រ៉ិចទ័រ បានវាយប្រហារប្រទេសមីយ៉ាន់ម៉ា ដោយទីក្រុង Mandalay រងគ្រោះខ្លាំងជាងគេ ហើយឥទ្ធិពលរបស់វា​ក៏ជះដល់រាជធានី​បាងកកនៃប្រទេសថៃ ដែលបង្កឲ្យមានការបំផ្លិចបំផ្លាញធ្ងន់ធ្ងរផងដែរ។

គិតត្រឹមព្រឹកថ្ងៃអាទិត្យ តួលេខមនុស្សស្លាប់នៅមីយ៉ាន់ម៉ា ​ បានកើនឡើងដល់ ១ ៦៤៤នាក់និងជាង ៣ ៤០០នាក់រងរបួស ចំណែកនៅថៃឯណោះ មនុស្សស្លាប់កើនដល់១៧នាក់និងរបួស៣២នាក់៕

អត្ថបទ៖ សុខ សុវណ្ណ

ចុចអាន៖ ថៃ បញ្ជូនទ័ព ១ ០០០នាក់ទៅជួយមីយ៉ាន់ម៉ា ទោះប្រទេសខ្លួន ក៏រងគ្រោះខ្លាំងដោយរញ្ជួយដី