ប៉ូលិសក្រុងបាងកក ថា អ្នកជាប់ក្រោមអគារបាក់ នៅសល់ឱកាសរស់មិនដល់ ១%ផង

កាលពីថ្ងៃអាទិត្យទី៣០ខែមីនាឆ្នាំ២០២៥ ប៉ូលិសក្រុងបាងកក បានបញ្ជាក់ថា ភាគច្រើននៃជនរងគ្រោះដែលជាប់ក្នុងគំនរអគារបាក់ដោយការរញ្ជួយដី នៅសល់ឱកាសរស់មិនដល់ ១%ផង។ នេះបើតាមការចុះផ្សាយរបស់ Kenh14។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅថ្ងៃសុក្រទី២៨ គ្រោះរញ្ជួយដីកម្រិត៧.៧រ៉ិចទ័របានវាយប្រហារប្រទេសមីយ៉ាន់ម៉ា ហើយវាជះឥទ្ធិពលយ៉ាងខ្លាំងដល់រាជធានីបាងកក នៃប្រទេសថៃ ដោយបណ្តាលឲ្យបាក់រលំអគារសវនកម្មរដ្ឋកម្ពស់៣៣ជាន់ ដែលកំពុងសាងសង់ សង្កត់កម្មករសំណង់ជិត១០០នាក់ ក្នុងខណ្ឌ ចតុចក្រ។

យោងតាមតួលេខដែលផ្សាយដោយ Khaosod នៅថ្ងៃចន្ទ, ចំនួនមនុស្សស្លាប់ក្នុងការដ្ឋានសំណង់នោះ កើនដល់១២នាក់ហើយ ដោយមានបុរស៨នាក់និងស្រ្តី៤នាក់ខណៈ៧៦នាក់បាត់ខ្លួន។

ជុំវិញរឿងនេះ ប៉ូលិសក្រុងបាងកកនិយាយថា «ជនរងគ្រោះភាគច្រើនប្រហែលជាស្លាប់ ហើយមានឱកាសមិនដល់១% ផងដែរដែលអាចរកឃើញអ្នកនៅរស់។ មកទល់ពេលនេះ យើងមិនទាន់ជួយអ្នកនៅរស់ឲ្យចេញពីនោះបានសូម្បីតែម្នាក់ ដ្បិតមានឧបករណ៍ចាំបាច់សម្រាប់ប្រតិបត្តិការជួយសង្គ្រោះក៏ដោយ។ យើងរំពឹងថា យ៉ាងតិចក៏ត្រូវចំណាយពេល២ខែដែរ ក្នុងការយកគំនរបាក់បែកទាំងនោះចេញ»។

ការលើកឡើងនេះ ធ្វើឲ្យសាច់ញាតិអ្នកជាប់នៅក្រោមគំនរថ្ម អស់សង្ឃឹមយ៉ាងខ្លាំង ប៉ុន្តែពួកគេនៅតែរង់ចាំទទួលដំណឹង និងរក្សាក្តីសង្ឃឹមជានិច្ច។ មិនត្រឹមប៉ុណ្ណឹង សាច់ញាតិអ្នកទាំងនោះ ថែមទាំងធ្វើពិធីសាសនា បន់ស្រន់សុំឲ្យទេវតាជួយ ហើយសង្ឃឹមថា នឹងមាន អព្ភូតហេតុកើតឡើងផងដែរ៕

អត្ថបទ៖ សុខ សុវណ្ណ

ចុចអាន៖ មីយ៉ាន់ម៉ា៖ ទឹក៤ដប​​ជួយ​ក្មេងស្រី​​ឲ្យរស់​ ទោះ​ជាប់ក្រោម​គំនរបាក់បែករហូត​៥០ម៉ោង