ឃាត់ខ្លួនជនសង្ស័យរក្សាទុកដោយខុសច្បាប់នូវសារធាតុញៀន២ប្រភេទ

ខេត្តបាត់ដំបង៖ ​សមត្ថកិច្ចនៃអធិការស្រុកកំរៀងបានឃាត់ខ្លួនជនសង្ស័យម្នាក់ក្រោយរកឃើញថាជនសង្ស័យរូបនេះជាមុខសញ្ញាពាក់ព័ន្ធគ្រឿងញៀនដើម្បីយកទៅផ្តន្ទាទោសតាមច្បាប់។ សមត្ថកិច្ចប្រាប់ថាករណីខាងលើសមត្ថកិច្ចបានធ្វើការបង្ក្រាបកាលពីថ្ងៃទី២៧ ខែកក្កដា ឆ្នាំ២០២១ វេលាម៉ោង១២:០០នាទីនៅចំណុចក្រុមទី១៤ ភូមិដូង ឃុំបឹងរាំង ស្រុកកំរៀង ខេត្តបាត់ដំបង។

ជនសង្ស័យដែលត្រូវឃាត់ខ្លួនមានឈ្មោះ ផល ទ្រូ ភេទប្រុស អាយុ២៧ឆ្នាំ មានទីលំនៅភូមិដូង ឃុំបឹងរាំង ស្រុកកំរៀង ខេត្តបាត់ដំបង។ ក្រោយឃាត់ខ្លួនជនសង្ស័យរូបនេះ សមត្ថកិច្ចបានឆែកឆេររកឃើញវត្ថុតាងមានដូចជា ថ្នាំញៀនប្រភេទមេតំហ្វេតាមីន (ម៉ាទឹកកកICE) ចំនួន០៦ថង់ ទម្ងន់ ១.៦៣ក្រាម (ទាំងសំបក) ថ្នាំញៀនប្រភេទមេតំហ្វេតាមីន (យ៉ាម៉ាWY) ចំនួន០៣គ្រាប់កន្លះ ទម្ងន់០,៣៣ក្រាម។

ក្រោយសមត្ថកិច្ចជំនាញធ្វើការសាកសួរ ជនសង្ស័យបានសារភាពថា សារធាតុញៀនខាងលើនេះពិតជារបស់ខ្លួនពិតប្រាកដមែន ដើម្បីចែកចាយ និងលក់ដូរបន្តរសម្រាប់អ្នកនិយមប្រើប្រាស់។ ជនល្មើស និងវត្ថុតាង បច្ចុប្បន្នសមត្ថកិច្ចនៃអធិការស្រុកបានរៀបចំសំណុំរឿងបញ្ជូនទៅការរិយាល័យជំនាញនៃស្នងការខេត្តរួចរាល់ហើយដើម្បីចាត់ការបន្តតាមនីតិវិធី៕

អត្ថបទ៖ សៅ សារិទ្ធ