ព័ត៌មានជាតិ

រដ្ឋបាលជលផលអំពាវនាវដល់ពលរដ្ឋរួសរាន់ទិញត្រីធ្វើប្រហុកផ្អក

Published

2 months ago

December 17, 2020

រដ្ឋបាលជលផល នៃក្រសួងកសិកម្ម រុក្ខាប្រមាញ់ និងនេសាទ បានអំពាវនាវដល់ ប្រជាពលរដ្ឋដែលមានបំណងធ្វើប្រហុក ផ្អក ត្រីឆ្អើរ សម្រាប់ទុកបរិភោគប្រចាំឆ្នាំ សូមរួសរាន់ទិញត្រីក្នុងខែបុស្សនេះ ឱ្យបានទាន់ពេលវេលា។

យោងតាមសេចក្តីជូនដំណឹង ស្ដីពីរដូវធ្វើប្រហុកផ្អករបស់រដ្ឋបាលជលផល ដែលទើបទទួលបាននៅថ្ងៃនេះ បានឲ្យដឹងថា ក្នុងរដូវនេសាទ ឆ្នាំ២០២០-២០២១នេះ បន្ទាប់ពីបានធ្វើការសង្កេតតាមដានកម្ពស់ទឹកដែលហូរចេញពីបឹងទន្លេសាបរួចមក ឃើញថា គន្លងដាយនៅតាមដងទន្លេសាបក្នុងភូមិសាស្ត្ររាជធានីភ្នំពេញ និងខេត្តកណ្ដាល អាចនេសាទត្រី បានច្រើននៅក្នុងខែបុស្សនេះ គឺចាប់ពីថ្ងៃទី៦កើត ដល់ថ្ងៃ១២កើត ត្រូវនឹងថ្ងៃទី២០ រហូតដល់ថ្ងៃទី២៦ ខែធ្នូ ឆ្នាំ២០២០ខាងមុខនេះ ប្រសិនបើផ្ទៃមេឃស្រឡះល្អគ្មានភ្លៀងកក់ខែ ឬទទួលរងឥទ្ធិពលព្យុះ។

រដ្ឋបាលជលផលបានបន្តថា «យោងលើស្ថានភាពដូចបានជម្រាបខាងលើរដ្ឋបាលជលផលស្នើសុំអញ្ជើញបងប្អូនប្រជាពលរដ្ឋដែលមានបំណងធ្វើប្រហុក ផ្អក ត្រីឆ្អើរ។ល។ សម្រាប់ទុកបរិភោគប្រចាំឆ្នាំ មេត្តាអញ្ជើញមកទិញត្រីក្នុងខែបុស្សនេះឱ្យបានរួសរាន់តាមពេលវេលានិងទីកន្លែងដែលបានជម្រាបជូនខាងលើ»។

ជាមួយគ្នានេះដែរ រដ្ឋបាលជលផលសូមសំណូមពរដល់អាជ្ញាធរមូលដ្ឋានសមត្ថកិច្ចគ្រប់ជាន់ថ្នាក់ មេត្តាបង្កលក្ខណៈងាយស្រួលជូនដល់ប្រជាពលរដ្ឋឱ្យបានធ្វើដំណើរទៅមកស្នាក់នៅនៅនិងដឹកជញ្ជូនផលិតផលត្រីកុំឱ្យមានការរាំងស្ទះតាមការគួរ៕

អត្ថបទ ៖ សំអឿន

Related Topics:ការធ្វើត្រីប្រហុក