ព័ត៌មានជាតិ

ក្រសួងសុខាភិបាលកម្ពុជា កំពុងតាមដានវ៉ាក់សាំងបង្ការជំងឺអុតស្វា

បានផុស

១ ខែ មុន

នៅ

ថ្ងៃអង្គារ ២៤ ឧសភា ២០២២

ដោយ

លោកស្រី ឱ វណ្ណឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាល បានឱ្យដឹងតាម ក្រុមតេឡេក្រាមរបស់លោកស្រី នៅរសៀលថ្ងៃទី២៤ ខែឧសភានេះថា ក្រសួងសុខាភិបាលកំពុងតាមដានជាបន្តលើវ៉ាក់សាំងបង្ការជំងឺអុតស្វា ខណៈលោកស្រីធ្លាប់បានបញ្ជាក់ថា ការចាក់វាក់សាំងប្រឆាំងនឹងជំងឺអុតស្វាយកន្លងមក បានបង្ហាញថា ជាការការពារប្រឆាំងនឹងជំងឺនេះផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកស្រីវេជ្ជបណ្ឌិត បានឱ្យដឹងថា វ៉ាក់សាំងថ្មីប្រឆាំងនឹងជំងឺអុតស្វាយ (Smallpox) និងជំងឺអុតស្វា (Monkeypox) ត្រូវបានអនុម័តឱ្យប្រើប្រាស់ ប៉ុន្តែមិនទាន់មានប្រើប្រាស់យ៉ាងទូលំទូលាយនៅតាមបណ្តាប្រទេសនៅឡើយទេ។

លោកស្រី ឱ វណ្ណឌីន មានប្រសាសន៍ មកដល់ពេលនេះកម្ពុជាមិនទាន់មានករណីសង្ស័យ ឬករណីវិជ្ជមានជំងឺនេះនៅឡើយ តែពលរដ្ឋក៏ត្រូវតែមានការប្រុងប្រយ័ត្នខ្ពស់ជាប់ជានិច្ច ដោយបុគ្គល គ្រួសារ និងសហគមន៍ ត្រូវបន្តអនុវត្តវិធានការបង្ការជំងឺផ្ទាល់ខ្លួនដូចជា៖ មន្ទីរពេទ្យ និងមណ្ឌលសុខភាព ត្រូវតាមដាននិងរាយការណ៍ករណីសង្ស័យណាមួយដែលកើតមានឡើងដើម្បីបន្តការស៊ើបអង្កេត។

លោកស្រីវេជ្ជបណ្ឌិត បានជំរុញឱ្យយកចិត្តទុកដាក់ពិនិត្យមើលឱ្យបានហ្មត់ចត់ នូវអ្នកដំណើរចូលមកកម្ពុជា ដែលមានកន្ទួលរមាស់នៅលើខ្លួន អមដោយមានគ្រុនក្តៅ និងមានប្រវត្តិធ្វើដំណើរមកពីបណ្តាប្រទេសប៉ែកខាងអាហ្វ្រិក (ប្រមាណជា ១០ប្រទេស) ដែលមានការកើតឡើងនូវជំងឺអុតស្វា (Monkeypox) បែបជាអង់ដេមី ហើយត្រូវរាយការណ៍ទៅអាជ្ញាធរសុខាភិបាលភ្លាមៗ ឬទៅលេខ ១១៥។

លោកស្រី ឱ វណ្ណឌីន បញ្ជាក់ថា បច្ចុប្បន្ន ជំងឺអុតស្វានេះ គឺជាជំងឺដែលឆ្លងដោយវីរុស (ចម្លងពីសត្វទៅមនុស្ស) នៅតំបន់ត្រូពិចដែលមានភ្លៀង នៃអាហ្វ្រិកកណ្ដាល និងអាហ្វ្រិកខាងលិច។ ការចម្លងជំងឺអុតស្វា កើតមានឡើងតាមរយៈការប៉ះពាល់រាងកាយផ្ទាល់ ឬប៉ះពាល់ជិតស្និទ្ធជាមួយអ្នកដែលមានរោគសញ្ញា រួមទាំងទំនាក់ទំនងផ្លូវភេទផងដែរ។ ការប្រើសម្លៀកបំពាក់ សម្ភារៈប្រើប្រាស់របស់អ្នកជំងឺអុតស្វា ឡូកឡំចូលគ្នាក៏អាចឆ្លងទៅអ្នកដទៃបានដែរ។ ក្រៅពីនេះ វីរុសនេះក៏អាចចម្លងតាមរយៈទឹកមាត់ និងអ្នកមានផ្ទៃពោះចម្លងទៅទារកតាមរយៈទងសុក ឬពីឪពុកម្ដាយដែលមានវីរុសឆ្លងទៅដល់កូន អំឡុងពេល ឬក្រោយពេលឆ្លងទន្លេតាមរយៈការប៉ះនឹងស្បែក។

គួររំលឹកថា ជំងឺអុតស្វា (Mokeypox) បានផ្ទុះឡើងជាបន្តបន្ទាប់ និងត្រូវបានបញ្ជាក់កាលពីនៅថ្ងៃទី៦ ខែឧសភា ឆ្នាំ ២០២២ នៅចក្រភពអង់គ្លេស ដោយចាប់ផ្ដើមនៅលើអ្នកដំណើរអង់គ្លេសម្នាក់ ដែលបានធ្វើដំណើរទៅប្រទេសនីហ្សេរីយ៉ា។ នៅពាក់កណ្តាលខែឧសភា អ្នកជំនាញតាមដាន បានសង្កេតឃើញថា មានការឆ្លងនៅក្នុងសហគមន៍នៃ ចក្រភពអង់គ្លេស ហើយមិនទាន់មានអ្នកស្លាប់នៅឡើយដែរ គិតត្រឹមថ្ងៃទី២១ ខែឧសភា ឆ្នាំ២០២២។ បច្ចុប្បន្នអង្គការសុខភាពពិភពលោក ចាត់ទុកការចម្លងវីរុសនេះនៅមានហានិភ័យទាប តែក៏លើកឡើងពីលទ្ធភាព ហានិភ័យដែលអាចគំរាមកំហែងដល់សុខភាពសកល៕

អត្ថបទ៖ ច័ន្ទ វីរៈ