ខណៈស្ងាត់ភ្ញៀវទេសចរ តើអាជ្ញាធរអប្សរាបានថវិកាពីណា ជួសជុលកែលម្អរមណីដ្ឋានអង្គររហូត?

បញ្ហាការរីករាលដាល​ជំងឺ​កូវីដ​-១៩ រយៈពេល​ ២​ ឆ្នាំ​ចុង​ក្រោយនេះ បានធ្វើឱ្យ​ប៉ះពាល់​ខ្លាំង​ដល់​វិស័យ​ទេសចរណ៍​ ជាក់ស្តែងនៅឆ្នាំ២០២១ ​ចំនួន​ភ្ញៀវទេសចរ​បរទេស​ធ្វើដំណើរ​មក​កម្ពុជា​ ​បាន​ធ្លាក់ចុះ​ប្រមាណ ៨៥ ​ភាគរយ​បើ​ធៀប​នឹង​ឆ្នាំ​ ២០២០​ ដែលមាន​ចំនួន ១,៣ ​លាន​នាក់​។ ទោះជាយ៉ាងនេះក្ដី យើងសង្កេតឃើញថា អាជ្ញាធរជាតិអប្សរា តែងសកម្ម អភិរក្សជួលជុលប្រាសាទនានា ព្រមទាំងកែលម្អហេដ្ឋារចនាសម្ព័ន្ធនៅតំបន់រមណីដ្ឋានអង្គរជាបន្តបន្ទាប់។

តើ អាជ្ញាធរជាតិអប្សរា បានថវិកាពីប្រភពណា ទើបអាចចំណាយលើកកិច្ចការទាំងនោះ?

លោក ឡុង កុសល អ្នកនាំពាក្យរបស់អាជ្ញាធរជាតិអប្សរា មានប្រសាសន៍ប្រាប់ “កម្ពុជាថ្មី” ថាកំលុងពេលស្ងាត់ភ្ញៀវទេសចរ ប៉ុន្តែ អាជ្ញាធរជាតិអប្សរា តែងបាន និងបន្តការកែលម្អហេដ្ឋារចនាសម្ព័ន្ធ និងជួសជុលប្រាសាទបានយ៉ាងច្រើន ដោយប្រភពថវិការបស់អាជ្ញាធរជាតិអប្សរា មានចំនួនបី។

លោក ឡុង កុសល បញ្ជាក់ថា៖ “ទី១ ថវិកាផ្គត់ផ្គង់ពីរាជរដ្ឋាភិបាលកម្ពុជា ទី២ ថវិកាផ្គត់ផ្គង់ដោយវិស័យឯកជន និងទី៣ ជាថវិកាបានពីបដិភាគតាមរយៈយន្តការ ឯកភាពអង្គរ។ ថវិកានោះមិនបានគ្រប់គ្រងដោយអាជ្ញាធរជាតិអប្សរាទេ គឺគ្រប់គ្រងដោយប្រទេសជាមិត្តដែលអនុវត្តគម្រោងនោះដោយខ្លួនឯង ហើយថវិកាខ្លះទៀតអនុវត្តក្រោមឆត្រអង្គការយូនីស្កូ ដូច្នេះ គឺស្ថិតនៅក្រោមការគ្រប់គ្រងរបស់ យូនីស្កូ”។

ចំពោះថវិកាចំណាយកន្លងមក លោក ឡុង កុសល មិនមានតួលេខចំណាយនោះទេ លោកគ្រាន់ប៉ាន់ស្មានថា មានចំនួនច្រើនរយលានដុល្លារ ដោយលោកបញ្ជាក់ថា ការងារអភិរក្សជួសជុល ត្រូវការប្រើពេលយូរ មិនមែនធ្វើ ១ ឆ្នាំ ឬ ២ ឆ្នាំចប់នោះទេ ពោលគឺគម្រោងនៅតែបន្តរហូត និងមានតម្លាភាពចាយវាយច្បាស់លាស់។

លោក ឡុង កុសល មានប្រសាសន៍ថា៖ “ចំពោះតម្លាភាពនៃការចំណាយ ធម្មតាទេ គឺតែងមានអង្គភាពការត្រួតពិនិត្យលើការចំណាយតាមនីតិវធីហិរញ្ញវត្ថុ។ បើគម្រោងស្ថិតក្រោម យូនីស្កូ គឺក្រុមការងារយូនីស្កូជាអ្នកត្រួតពិនិត្យ បើគម្រោងប្រើប្រាស់ថវិការបស់រដ្ឋ គឺមានស្ថាប័នគ្រប់គ្រងថវិកា មានទាំងសវនកម្មជាតិ ជំនាញមកពីក្រសួងហិរញ្ញវត្ថុ ព្រមទាំងសវនកម្មផ្ទៃក្នុងជាដើម ដែលការងារទាក់ទងហិរញ្ញវត្ថុនេះ មិនអាចលេងសើចបានទេ ហើយត្រូវប្រុងប្រយ័ត្នខ្ពស់ ជាពិសេសរាល់ចំណូលចំណាយត្រូវកត់ត្រាយ៉ាងច្បាស់លាស់”។

គួរបញ្ជាក់ថា រយៈពេលវិបត្តិកូវីដ-១៩ ដែលស្ងប់ស្ងាត់ភ្ញៀវទេសចរនេះ អាជ្ញាធរបានជួសជុលប្រាង្គប្រាសាទដូចជា ប្រាសាទនៅកណ្ដាលស្រះស្រង់, ខ្លោងទា្វរតាកាវ, កស្សិនស្ពានហាល, កំពង់ទឹកស្ពានហាល ប្រាសាទអង្គរវត្ត, ជួលជុលប្រាសាទបាយន្ត ព្រលានជល់ដំរី នៅតំបន់បន្ទាយស្រី ​និងកិច្ចការជាច្រើនទៀត ក៏ដូចជាបានរៀបចំឱ្យមានការអភិវឌ្ឍប្រកបដោយចេរភាពនូវហេដ្ឋារចនាសម្ព័ន្ធ ក៏ដូចជាបរិស្ថាន ទេសភាព នៅប្រាសាទ និងតំបន់រមណីដ្ឋានអង្គរ។

ក្នុងរយៈពេល៧ខែដើម ឆ្នាំ២០២២នេះ នៅទូទាំងប្រទេសកម្ពុជា ទទួលបានទេសចរអន្តរជាតិជាង ៧៤ ម៉ឺននាក់ កើនឡើង ៥៦០% ធៀបនឹងរយៈពេលដូចគ្នា ឆ្នាំ២០២១ ក្នុងដំណាក់កាលវិបត្តិកន្លងទៅ៕

អត្ថបទ៖ ច័ន្ទ ​វីរៈ