ប្រាង្គប្រាសាទសង្កែសឹង្ហ ផ្នែកខាងត្បូង ត្រូវបានជួសជុលរួចរាល់

បើតាមអាជ្ញាធរជាតិអប្សរា បានឱ្យដឹងថា ប្រាង្គរបស់ប្រាសាទសង្កែសឹង្ហ នៅផ្នែកខាងត្បូង ត្រូវបានអ្នកជំនាញជួសជុលរួចរាល់ឱ្យមានភាពរឹងមាំឡើងវិញ បន្ទាប់ពីចំណាយពេលជាច្រើនខែ ក្នុងការជួសជុលនេះប្រាសាទនេះ។

ប្រាសាទសង្កែសឹង្ហ ស្ថិតនៅភូមិត្រពាំងខ្ទះ ស្រុកស្វាយលើ ខេត្តសៀមរាប ធ្លាប់រងការខូចខាតខ្លាំងលើរចនាសម្ពន្ធជាច្រើនផ្នែក ដូចជា ខឿនផ្នែកខាងក្រោម ខ្លោងទ្វារខាងមុខ ជញ្ជាំងបានពុកនិងប្រេះហែកចេញពីគ្នាខុសពីសភាពដើម។ ចំពោះការជួសជុល អ្នកជំនាញចាប់ផ្តើមជួសជុលតាំងពីដើមឆ្នាំ២០២៥ និងត្រូវបញ្ចប់ជាស្ថាពរ នាពេលនេះ។

លោក ពុទ្ធ សុទ្ធ មន្ត្រីទទួលបន្ទុកការដ្ឋានជួសជុល ថា ក្រុមការងារបានជួសជុលប្រាសាទសង្កែសឹង្ហ  បានពង្រឹងខឿនផ្នែកខាងក្រោម ខ្លោងទ្វារខាងមុខ ពង្រឹងជញ្ជាំងដែលពុកផុយ ដំបូលរបស់រួតទី១ដល់រួតទី២ ជួសជុលស្នាមប្រេះ និងសម្អាតដកយកកូនរុក្ខជាតិដែលដុះទាំងអស់ចេញពីលើប្រាសាទ។ នេះបើតាមអាជ្ញាធរជាតិអប្សរា។

ប្រភពដដែលបញ្ជាក់ថា ប្រាសាទសង្កែសឹង្ហ មានប្រាង្គចំនួនបួន ប្រាង្គបីសាងពីឥដ្ឋតម្រៀបគ្នាបីខាងមុខ មានការឆ្លាក់ក្បាច់ហោជាងយ៉ាងស្អាតគ្រប់ជ្រុងនីមួយៗ សសរពេជ្រ ផ្តែរ ចម្លាក់ក្បាលសសរក៏មានការតុបតែងបានល្អប្រពៃដែរ។ ចំណែកប្រាង្គមួយទៀត នៅខាងក្រោយសាងពីថ្មភក់ ថ្មបាយក្រៀម និងឥដ្ឋ។ ប្រាង្គកណ្តាលបានតភ្ជាប់និងបន្តុបថ្មភក់មួយដែលបានរចនាយ៉ាងល្អឯក។ ប្រាសាទនេះ កសាងនៅពាក់កណ្តាលសតវត្សរ៍ទី១០ និងដើមសតវត្សរ៍ទី១១នៃគ្រិស្ដសករាជ ដើម្បីឧទ្ទិសថ្វាយដល់សាសនាហិណ្ឌូ៕

ដោយ៖ ជុន កុសល