ព័ត៌មានជាតិ

ដឹងច្បាស់ហើយ! ស្ត្រីឆ្លងកូវីដ១៩នៅរោងចក្រ«YW»ឆ្លងពីកូនប្រុសដែលជាអ្នកបើកឡានឲ្យជនជាតិចិន

Published

1 month ago

March 2, 2021

ភ្នំពេញ ៖ លោក វេជ្ជបណ្ឌិត ងី ម៉េងហេង ប្រធានមន្ទីរសុខាភិបាលរាជធានីភ្នំពេញបានឲ្យដឹងថា ស្ត្រីដែលឆ្លងកូវីដ១៩នៅរោងចក្រកាត់ដេរ«YW»នៅខណ្ឌដង្កោនោះមានអាយុ៤៨ឆ្នាំដែលបានឆ្លងពីកូនរបស់គាត់ជាអ្នកបើកឡានឲ្យជនជាតិចិន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបានបន្តថារហូតមកដល់ពេលនេះក្រុមឆ្លើយតបបន្ទាន់នៃមន្ទីរសុខាភិបាលរាជធានីភ្នំពេញ បានចុះយកសំណាក អ្នកដែលបានប៉ះពាល់ផ្ទាល់និងប្រយោលជាមួយស្ត្រីនោះប្រមាណជាង៥០០នាក់ហើយដើម្បីយកទៅធ្វើតេស្តរកមេរោគកូវីដ១៩។

បើតាមលោកស្រី គឹម ញិប អភិបាលខណ្ឌដង្កោបានឲ្យដឹងថា ស្ត្រីដែលឆ្លងជំងឺកូវីដ១៩នៅរោងចក្រ«YW»នោះជាស្ត្រីខ្មែរធ្វើការជាមួយជនជាតិចិន។

លោកស្រីបានបន្តថា ជនរងគ្រោះរួមទាំងក្រុមគ្រួសារ ត្រូវបានបញ្ជូនទៅធ្វើចត្តាឡីស័ក និងព្យាបាលនៅមណ្ឌលព្រែកព្នៅអស់ហើយ។

ចំណែក លោក ជួន វុឌ្ឍី ប្រធានមន្ទីរការងារនិងបណ្តុះបណ្តាលវិជ្ជាជីវៈរាជធានីភ្នំពេញបានមានប្រសាសន៍ថា ក្រសួងនៅមិនទាន់បិទរោងចក្រយីហោ«YW»ដែលស្ថិតនៅក្នុងខណ្ឌដង្កោរាជធានីភ្នំពេញដែលមានអ្នកពាក់ព័ន្ធស្ត្រីម្នាក់ឆ្លងជំងឺកូវីដ១៩នៅឡើយទេដោយសារការប៉ះពាល់មានកម្រិតតិចតូចនៅឡើយ។

លោកបានបន្តថា តាមព័ត៌មានដែលលោកទទួលបានជាជំហានដំបូងមានអ្នកពាក់ព័ន្ធជាមួយស្ត្រីដែលឆ្លងនោះចំនួន៧នាក់ ក្នុងនោះមានម្នាក់ប៉ះពាល់ផ្ទាល់និង៦នាក់ទៀតប៉ះពាល់ដោយប្រយោលហើយត្រូវបានក្រុមគ្រូពេទ្យយកសំណាកទៅពិនិត្យរកកូវីដ១៩រួចរាល់ហើយ។

គួរបញ្ជាក់ថា រោងចក្រ វ៉ាយ&ដាប់បាយូ ហ្គាមេន មានទីតាំងស្ថិតនៅផ្លូវលេខ២១៧ភូមិព្រែកជ្រៃសង្កាត់ស្ពានថ្មខណ្ឌដង្កោរាជធានីភ្នំពេញ៕

ដោយ ៖ សំអឿន