សេដ្ឋកិច្ច

ការចរចាកិច្ចព្រមព្រៀងការចៀសវាងការយកពន្ធត្រួតគ្នារវាងកម្ពុជា-បារាំងរំពឹងថាបិទបញ្ចប់ឆាប់ៗ

បានផុស

២ years មុន

នៅ

ថ្ងៃចន្ទ ២៩ មេសា ២០២៤

ដោយ

ភ្នំពេញ៖ កម្ពុជា-បារាំងរំពឹងថា ការចរចាលើកិច្ចព្រមព្រៀងស្តីពីការចៀសវាងការយកពន្ធត្រួតគ្នា(DTA) នឹងបញ្ចប់នាពេលឆាប់ៗនេះដែលជាការបើកផ្លូវដើម្បីកម្ពស់ការធ្វើធុរកិច្ច និងលំហូរវិនិយោគរវាងប្រទេសទាំងពីរឱ្យកាន់តែមានកំណើនបន្ថែមទៀត។

លោកស្រី ប៊ុន នារី អគ្គនាយរងនៃអគ្គនាយដ្ឋានពន្ធដារ(GDT) បានដឹកនាំគណៈប្រតិភូទៅ ចូលរួមកិច្ចប្រជុំចរចាលើកិច្ចព្រមព្រៀងស្តីពិការចៀសវាងការយកពន្ធត្រួតគ្នាជុំទី២ រវាងប្រទេសកម្ពុជានិងប្រទេសបារាំងនៅទីក្រុងបារីសប្រទេសបារាំងកាលពីថ្ងៃទី២៣-២៥ ខែមេសាកន្លងទៅនេះ។ នេះបើយោងតាមសេចក្តីប្រកាសព័ត៌មានរបស់GDT។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកស្រីធ្លាប់បានលើកឡើងថា ការបើកផ្លូវចរចាលើ DTA រវាងប្រទេសទាំងពីរ ដែលជាដំណើរវិវត្តន៍ថ្មីមួយទៀតដើម្បីចូលរួមចំណែកដល់កិច្ចសហប្រតិបត្តិការផ្នែកពន្ធដារ ជាពិសេសដើម្បីលើកកម្ពស់ការវិនិយោគ។

លោកស្រីបានថ្លែងថា កន្លងមកប្រទេសទាំងពីបានរៀបចំកិច្ចចរចាកិច្ចព្រមព្រៀង DTA ជុំទី១ម្តងរួចមក ដោយផ្តើមចេញពីលទ្ធផលនៃដំណើរទស្សនកិច្ចរបស់គណៈប្រតិភូនៃក្រសួងហិរញ្ញវត្ថុនៃសាធារណរដ្ឋបារាំងមកកាន់អគ្គនាយកដ្ឋានពន្ធដារកាលពីខែមេសាឆ្នាំ២០២២កន្លងមក និងក្រោមការសម្របសម្រួលពីតំណាងស្ថានទូត បារាំងប្រចាំ នៅកម្ពុជា។

លោកស្រីបានថ្លែងថា៖«យើងមានជំនឿដ៏មុតមាំថាកិច្ចព្រមព្រៀង DTA កម្ពុជា-បារាំងនឹងក្លាយជាឧបករណ៍ថ្មីបន្ថែមទៀតក្នុងការបង្កើនកិច្ចសហប្រតិបត្តិការទ្វេភាគីផ្នែកពន្ធដារ ព្រមទាំងជំរុញការវិនិយោគរវាងប្រទេសទាំងពីរផងដែរ»។

នៅក្នុងកិច្ចប្រជុំចរចាជុំទី២នោះដែរ លោក Martin Klam ប្រធាននាយកដ្ឋានកិច្ចការអន្តរជាតិនិងអឺរ៉ុប នៃក្រសួងហិរញ្ញវត្ថុបារាំង បានលើកឡើងថា សាទរជាមួយនឹងវឌ្ឍនៈភាពនិងឆន្ទៈនៃការចរចាកិច្ចព្រមប្រៀងរវាងប្រទេសទាំងពីរ ដែលលោករំពឹងការចរចាលើកិច្ចព្រមព្រៀងនេះនឹងបញ្ចប់នាពេលឆាប់ៗខាងមុខនេះ។

លោកស្រី ប៊ុន នារី បានវាយតម្លៃខ្ពស់អំពីការខិតខំប្រឹងប្រែងរបស់ភាគីបារាំង ក្នុងការរៀបចំឱ្យមានកិច្ចចរចាលើកិច្ចព្រមព្រៀងនេះជុំទី២។

យោងតាមអគ្គនាយកដ្ឋានគយ និងរដ្ឋាករកម្ពុជា ពាណិជ្ជកម្មរវាងកម្ពុជា និងបារាំង ក្នុងត្រីមាសទី១ឆ្នាំ២០២៤ ការដោះដូរទំនិញរវាងប្រទេសទាំងពីរ មានតម្លៃជាង ១១៦លានដុល្លារ ថយចុះ ៦,៨ភាគរយបើធៀបនឹងរយៈពេលដូចគ្នាក្នុងឆ្នាំ២០២៣ ដែលមានចំនួនជាង១២៤ ដុល្លារ។ ក្នុងនោះការនាំចេញរបស់កម្ពុជាទៅប្រទេសបារាំងសម្រេចបាន ៩០,៧៥១លានដុលារថយចុះ៣ភាគរយ និងការនាំចូលមានចំនួនជាង២៥ លានដុល្លារ ថយចុះជាង១៨ភាគរយ៕

Related Topics: