អត្ថាធិប្បាយ
១៧ មេសា ឆ្នាំនេះ ខ្មែរសប្បាយក្រោមម្លប់សន្តិភាព តែ១៧ មេសា ៤៩ឆ្នាំមុន ខ្មែរកំពុងធ្លាក់ក្នុងឋាននរក
ខែមេសា គឺជាពេលវេលាមួយដែលប្រជាជាតិខ្មែរ រៀបចំពិធីបុណ្យចូលឆ្នាំថ្មី តាមគន្លងទំនៀមទម្លាប់ប្រពៃណីជាតិដ៏ល្អផូរផង់របស់ដូនតា។ តួយ៉ាង ឆ្នាំ២០២៤នេះ ចាប់ពីថ្ងៃទី១៣ ដល់ថ្ងៃទី១៦ ខែមេសា ពិធីបុណ្យចូលឆ្នាំខ្មែរ បានប្រព្រឹត្តទៅដោយភាពសប្បាយរីករាយ ប្រជាជនសើចក្អាកក្អាយ ជួបជុំក្រុមគ្រួសារ ប្រកបដោយស្នាមញញឹម និងមោទកភាពជាតិ។ តែបើរម្លឹកដល់ខែមេសា កាលពី៤៩ឆ្នាំមុន គឺខ្មែរកំពុងឈានជើងធ្លាក់ជ្រោះដ៏សែនជ្រៅ ប្រៀបបានជាឋាននរក គឺរបបវាលពិឃាតខ្មែរក្រហម។
![](https://www.kampucheathmey.com/wp-content/uploads/2024/04/image-1090-1024x767.png)
ថ្ងៃទី១៧ ខែមេសា ឆ្នាំ២០២៤នេះ គឺជាខួប៤៩ឆ្នាំ នៃការចូលកាន់អំណាចរបស់ពួកខ្មែរក្រហម។ ភាពជ្រួលច្របល់ បានចាប់ផ្ដើមឡើងនៅព្រឹកព្រលឹមថ្ងៃទី១៧ ខែមេសា ឆ្នាំ១៩៧៥ នៅពេលដែលកងទ័ពខ្មែរក្រហមស្លៀកពាក់ខ្មៅ បានសម្រុកចូលទីក្រុងភ្នំពេញពីគ្រប់ច្រក។ ១៧ មេសា ៤៩ឆ្នាំមុន គឺថ្ងៃដែលធ្វើឱ្យប្រជាពលរដ្ឋនៅភ្នំពេញ ជួបភាពវឹកវរខ្លាំង ដោយត្រូវបានជម្លៀសដោយបង្ខំចេញពីលំនៅដ្ឋានឱ្យទៅកាន់ទីជនបទ។
ក្រៅពីជម្លៀសមនុស្សចេញពីភ្នំពេញ ពួកខ្មែរក្រហមបានលុបចោលរាល់កម្មសិទ្ធិឯកជន គ្រប់យ៉ាងត្រូវបោះបង់ចោលមិនប្រើប្រាស់ ហើយរងការបំផ្លិចបំផ្លាញខ្ទេចខ្ទីគ្មានសល់។ ដោយឡែក ទីវត្តអារាម ដែលធ្លាប់ជាកន្លែងសក្ការៈបូជាតាមបែបព្រះពុទ្ធសាសនា បានប្រែក្លាយទៅជាកន្លែងចិញ្ចឹមជ្រូក ហើយព្រះសង្ឃ ត្រូវខ្មែរក្រហមចាប់ផ្សឹក គ្មានសិទ្ធិសេរីភាពក្នុងការប្រារព្ធពិធីទំនៀមទម្លាប់ ប្រពៃណី សាសនា រួមទាំងពិធីចូលឆ្នាំក៏គ្មានដែរ។
![](https://www.kampucheathmey.com/wp-content/uploads/2024/04/image-1091.png)
ក្រោមកណ្តាប់ដៃខ្មែរក្រហម បានធ្វើឱ្យប្រជាជនខ្មែររងទុក្ខវេទនា និរាសព្រាត់ប្រាស់យ៉ាងឈឺចាប់ខ្លោចផ្សារជាទីបំផុត និងគ្មានអ្វីប្រៀបផ្ទឹមបាននោះឡើយ រហូតធ្វើឱ្យពលរដ្ឋខ្មែរជាច្រើនលាននាក់ បានបាត់បង់ជីវិត ដោយការសម្លាប់ ការបង្អត់អាហារ អំពើអមនុស្សធម៌ដ៏យង់ឃ្នង់ និងការធ្វើទុកបុកម្នេញផ្សេងៗទៀតពីសំណាក់ពួកខ្មែរក្រហម។
តែដោយសារការខិតខំតស៊ូរបស់យុទ្ធជន អ្នកស្នេហាជាតិ និងអ្នកនយោបាយនៃគណបក្សប្រជាជនកម្ពុជា បានប្រមូលផ្ដុំបង្កើតបានជាកម្លាំងរណសិរ្យសាមគ្គីសង្គ្រោះជាតិកម្ពុជា នៅថ្ងៃ២ ធ្នូ ១៩៧៨ ដោយបានយកអាយុជីវិតធ្វើជាដើមទុន ក្នុងការវាយផ្ដួលរលំរបបដ៏ខ្មៅងងឹតខ្មែរក្រហម ហើយបានរំដោះប្រទេសជាតិ និងប្រជាជនឱ្យមានសិទ្ធិសេរីភាពឡើងវិញ នៅថ្ងៃទី៧ ខែមករា ឆ្នាំ១៩៧៩។ ក្រោយថ្ងៃរំដោះ ៧ មករា បាននាំនាវាកម្ពុជា ទៅកាន់សករាជថ្មីមួយ ជាពិសេសតាមរយៈនយោបាយឈ្នះ-ឈ្នះ ដែលស្ថិតក្រោមការដឹកនាំដោយសម្តេចតេជោ ហ៊ុន សែន បាននាំយកសុខសន្តិភាព ការបង្រួបបង្រួមជាតិ ការផ្សះផ្សាជាតិ ឯកភាពជាតិ និងឯកភាពទឹកដីជូនជាតិ និងប្រជាជនកម្ពុជាយ៉ាងពេញលេញ។
![](https://www.kampucheathmey.com/wp-content/uploads/2024/04/image-1095.png)
ប្រមាណ៤០ឆ្នាំ ក្រោមការដឹកនាំរបស់សម្ដេចតេជោ ហ៊ុន សែន អតីតនាយករដ្ឋមន្ត្រីនៃកម្ពុជា និងបន្តដោយនាយករដ្ឋមន្ត្រីវ័យក្មេងរបស់កម្ពុជា សម្ដេចធិបតី ហ៊ុន ម៉ាណែត ក្នុងអាណត្តិទី៧នេះ រាជរដ្ឋាភិបាលកម្ពុជា នៅតែរក្សាស្មារតី និងប្រកាសប្ដេជ្ញាការពារឱ្យបានសុខសន្តិភាព ដើម្បីជាការធានាដល់ស្ថេរភាព និងការអភិវឌ្ឍជាតិឱ្យមានការរីកចម្រើនលើគ្រប់វិស័យ ជាពិសេសការផ្ដល់ស្នាមញញឹម ភាពសុខក្សេមក្សាន្ត ភាពជឿទុកចិត្ត និងក្ដីសង្ឃឹមចំពោះអនាគតប្រទេសជាតិ និងប្រជាជនខ្មែរឱ្យបាននិរន្តរតទៅ។
![](https://www.kampucheathmey.com/wp-content/uploads/2024/04/image-1096-edited.png)
ជាក់ស្ដែង ពិធីបុណ្យចូលឆ្នាំថ្មីប្រពៃណីជាតិខ្មែរ នាឆ្នាំ២០២៤នេះ បានប្រារព្វឡើងប្រកបដោយភាពឱឡារិកជាមួយភាពសប្បាយរីករាយ ស្នាមញញឹម និងសំឡេងហ៊ោកញ្ជ្រៀវនៅគ្រប់មូលដ្ឋានទូទាំង ២៥រាជធានី-ខេត្ត។ ប្រជាពលរដ្ឋ បានចូលរួមកម្មវិធីនានាដែលរដ្ឋបាលរាជធានី-ខេត្ត បានរៀបចំសង្ក្រាន្តនៅតាមទីតាំងនានា ក៏ដូចជាតាមបណ្ដាទីវត្តអារាម និងតាមរមណីយដ្ឋាននៅទូទាំងប្រទេសកម្ពុជាប្រកបដោយសោភ័ណភាព សេចក្តីថ្លៃថ្នូរ សុខសុវត្ថិភាព របៀបរៀបរយល្អ និងទឹកមុខសើចក្អាកក្អាយ។ ជាពិសេសប្រជាពលរដ្ឋ រួមទាំងភ្ញៀវបរទេសទាំងអស់បានចូលរួមលេងកម្សាន្តប្រកបដោយភាពរីករាយនូវល្បែងប្រជាប្រិយខ្មែរ ដែលចូលរួមថែរក្សាបានប្រពៃណីវប្បធម៌ដ៏ផូរផង់របស់ដូនតា។
ប្រែក្លាយពីការរងទុក្ខវេទនា និរាសព្រាត់ប្រាស់គ្រួសារ និងមិនមានសិទ្ធិសេរីភាពក្នុងការប្រារព្ធពិធីទំនៀមទម្លាប់ ប្រពៃណី និងសាសនានោះ គឺប្រជាជនខ្មែរ បានប្រារព្វពិធីតាមបែបទំនៀមទម្លាប់ ប្រពៃណីជាតិ ពិសេសក្នុងឱកាសបុណ្យចូលឆ្នាំថ្មីនេះ ប្រជាជនបានម្នីម្នានាំគ្នាទៅធ្វើបុណ្យធ្វើទានដោយយ៉ាងក្ដីមោទន និងមានពេលវេលាជួបជុំក្រុមគ្រួសារ សាច់ញាតិប្រកបដោយភាពស្និទ្ធស្នាល។
![](https://www.kampucheathmey.com/wp-content/uploads/2024/04/image-1097-1024x682.png)
ភាពសប្បាយរីករាយទាំងនេះ គឺកើតចេញពីកត្តាចម្បងបំផុត គឺម្លប់នៃសុខសន្តិភាព ដែលបានផ្តល់ឱកាសឱ្យប្រជាជនខ្មែរគ្រប់រូបអាចរួមរស់ជាមួយគ្នាប្រកបដោយភាតរភាព និងសាមគ្គីភាព ក្នុងធ្លុងជាមហាគ្រួសារខ្មែរតែមួយលើទឹកដីមាតុភូមិអង្គរ និងក្នុងសេចក្តីសុខក្សេមក្សាន្ត កិត្តិយស និងសេចក្តីថ្លៃថ្នូរ ជាដរាបតរៀងទៅ។
កម្ពុជាមានសន្តិភាពពេញលេញ ទើបអាចមានព្រឹត្តការណ៍ទាំងនេះបាន ហើយលើសពីនេះ មិនថាតែប្រជាពលរដ្ឋខ្មែរទេ គឺមានភ្ញៀវបរទេសច្រើនកុះករលេងកម្សាន្តផងដែរ ប្រកបដោយភាពសប្បាយរីករាយ និងមានទំនុកចិត្តលើសុវត្ថិភាពរបស់ខ្លួន ដោយមិនមានការភ័យខ្លាចអ្វីទាំងអស់។ នេះហើយ គឺជាគុណតម្លៃនៃសុខសន្តិភាព ដែលត្រូវរួមគ្នាថែរក្សា និងការពារឱ្យបានជាដាច់ខាត៕
![](https://www.kampucheathmey.com/wp-content/uploads/2024/04/image-1098-1024x767.png)
អត្ថបទ៖ ធឿន វ៉ាន់សុង
![](https://kampucheathmey.com/wp-content/uploads/2020/12/1-01-2-01-1.png)
-
ព័ត៌មានជាតិ១ សប្តាហ៍ ago
ក្រុងបាត់ដំបង កំពុងប្រឈមនឹងភក់ជ្រាំ មិនខុសពីទសវត្សរ៍ទី ៨០
-
ព័ត៌មានអន្ដរជាតិ៦ ថ្ងៃ ago
ស្លាប់១១នាក់ បាត់ខ្លួន៣០នាក់ ក្នុងហេតុការណ៍បាក់ស្ពាននៅចិនព្រោះភ្លៀងធ្លាក់ខ្លាំង
-
ព័ត៌មានជាតិ៦ ថ្ងៃ ago
អស់រយៈពេល៨ថ្ងៃហើយ ឧទ្ធម្ភាគចក្រដែលបាត់ដាន ពុំទាន់មានតម្រុយនៅឡើយទេ
-
ព័ត៌មានអន្ដរជាតិ១ សប្តាហ៍ ago
កំណើនកម្តៅផែនដីធ្វើឲ្យពេលថ្ងៃ អូសបន្លាយពេលយូរជាងពេលយប់
-
កីឡា៤ ថ្ងៃ ago
ភរិយាលោកគ្រូ អេ ភូថង ចេញសារសុំទោសរឿងតវ៉ាម្សិលមិញ
-
ព័ត៌មានអន្ដរជាតិ៣ ថ្ងៃ ago
មនុស្ស១៤៦នាក់ កប់ស្លាប់ក្រោមបំណាក់ដីភក់ នៅប្រទេស អេត្យូពី
-
ព័ត៌មានជាតិ១ ថ្ងៃ ago
តុលាការឱ្យឃុំខ្លួនបណ្ដោះអាសន្នលើ លោក ស្រ៊ុន ស៊្រន និងបក្សពួក ពីបទញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម
-
សន្តិសុខសង្គម២០ ម៉ោង ago
ផ្លូវបេតុងជិត៦០០ម៉ែត្រ ដែលមិនប្រកាសដេញថ្លៃជាសាធារណៈ ចាប់ផ្តើមលួចសាងសង់