អ៊ីស្រាអែល បញ្ជាក់ពេលវេលាដែល អ៊ីរ៉ង់ នឹងឲ្យខ្លួនភ្លក់រសជាតិវាយប្រហារ​សងសឹក

ព្រឹត្តិការណ៍បាញ់កម្ទេចស្ថានកុងស៊ុលអ៊ីរ៉ង់ប្រចាំនៅទីក្រុងដាម៉ាសក្នុងប្រទេសស៊ីរីពីសំណាក់កងកម្លាំងអ៊ីស្រាអែលដែលរួមមានទាំងការស្លាប់បាត់បង់ជីវិតមេទ័ពកំពូលមួយរូបរបស់អ៊ីរ៉ង់កាលពីដើមខែមេសា កំពុងនាំឲ្យពិភពលោកបើកភ្នែកធំៗតាមដានស្ថានភាពក្ដៅបន្ថែមទៀតក្នុងតំបន់មជ្ឈិមបូព៌ា ជាពិសេសច្បាស់ណាស់ថា អ៊ីរ៉ង់មិនទុកឲ្យអ៊ីស្រាអែលដេកលក់ស្រួលនោះឡើយ ពោលនឹងបើកការសងសឹកក្នុងពេលវេលាជាក់លាក់ណាមួយមិនខាន ។

យោងតាមមន្ត្រីយោធាអ៊ីស្រាអែលបានបញ្ជាក់ច្បាស់ៗប្រាប់ទីភ្នាក់ងារព័ត៌មានរុស្ស៊ី TASS ថា ច្បាស់ណាស់អ៊ីរ៉ង់មិនទុកឲ្យស្រាអែលជិះសេះលេងដៃនោះឡើយ ពោលរដ្ឋាភិបាលទីក្រុងតេហេរ៉ង់នឹងឲ្យរដ្ឋាភិបាលរបស់លោកនាយករដ្ឋមន្ត្រី Benjamin Netanyahu ភ្លក់ស្នាដៃសងសឹក បន្ទាប់ពីថ្ងៃទី១២ ខែមេសាខាងមុខនេះ ដើម្បីឲ្យអ៊ីស្រាអែលភ្លឺភ្នែកដែលហ៊ានបាញ់កម្ទេចស្ថានកុងស៊ុលអ៊ីរ៉ង់នៅស៊ីរី ។

អ៊ីស្រាអែលប៉ាន់ប្រមាណទៀតថា ឥឡូវនេះការសងសឹករបស់អ៊ីរ៉ង់មិនទាន់កើតមានឡើងនោះឡើយ ប៉ុន្តែអ្វីៗអាចនឹងមានការប្រែប្រួល រហូតដល់ក្រោយពិធីបុណ្យ Eid របស់ប្រជាជនមូស្លីមចប់សព្វគ្រប់នៅថ្ងៃទី១២ ខែមេសា ហើយកងទ័ពក៏គិតផងដែរថា រសជាតិវាយប្រហារណាមួយរបស់អ៊ីរ៉ង់នឹងកំណត់គោលដៅលើយោធា ឬទីតាំងយុទ្ធសាស្ត្រ មិនមែនទីតាំងស៊ីវិលនោះទេ ។

កាលពីថ្ងៃទី១ ខែមេសា កងឆ្មាំបដិវត្តន៍អ៊ីរ៉ង់ (IRGC) បានប្រកាសថា ទីប្រឹក្សាយោធាអ៊ីរ៉ង់ ៧ រូបត្រូវបានសម្លាប់នៅក្នុងការវាយប្រហារតាមអាកាសរបស់អ៊ីស្រាអែលទៅលើស្ថានកុងស៊ុលរបស់ទីក្រុងតេហេរ៉ង់នៅក្នុងទីក្រុងដាម៉ាសប្រទេសស៊ីរី រួមទាំងមេដឹកនាំកំពូលអ៊ីរ៉ង់ លោក Mohammad Reza Zahedi ផងដែរ ។ ទោះយ៉ាងណា រហូត​មក​ទល់​ពេល​នេះ អ៊ីស្រាអែល​មិនទាន់​បាន​ធ្វើ​សេចក្តី​ថ្លែងការណ៍ណាមួយ​ស្តី​ពី​ការ​ទទួល​ខុស​ត្រូវ​ចំពោះ​ការ​វាយ​ប្រហារ​តាម​អាកាស​នោះ​ទេ ។

ចំណែកឯខាងភាគីអ៊ីរ៉ង់វិញក៏មិនទាន់ចេញវោហារសាស័ព្ទណាមួយពាក់ព័ន្ធនឹងការបញ្ជាក់របស់អ៊ីស្រាអែលនោះដែរ ប៉ុន្តែបែរជាដាក់ផ្ទាំងស៊ីបទៅកាន់សហរដ្ឋអាមេរិកថាជាអ្នកបើកដៃឲ្យអ៊ីស្រាអែល ទើបកងកម្លាំងរបស់លោក Netanyahu ថ្លើមធំហ៊ានបើកការវាយប្រហារមិនខ្លាចក្រែងយ៉ាងដូច្នេះ ។

គួរបញ្ជាក់ថា នេះមិនមែនទើបលើកដំបូងនោះឡើយដែលមន្ត្រីអ្នកមុខអ្នកការរបស់អ៊ីរ៉ង់ត្រូវស្លាប់ក្រោមកណ្ដាប់ដៃអ៊ីស្រាអែលនោះ ពោលកាលពីខែធ្នូ ឆ្នាំ២០២៣ កន្លងទៅ ការ​វាយ​ប្រហារ​តាម​អាកាស​របស់​អ៊ីស្រាអែល​នៅ​ក្នុង​សង្កាត់​មួយនៃទីក្រុងដាម៉ាស​បាន​សម្លាប់​ទីប្រឹក្សា​ជើងចាស់របស់​កង​ឆ្មាំ​បដិវត្ត​​អ៊ីរ៉ង់ប្រចាំ​ប្រទេស​ស៊ីរីគឺលោក Seyed Razi Mousavi ។

ទន្ទឹមនោះ ការ​វាយ​ប្រហារ​ស្រដៀង​គ្នា​លើ​អគារ​មួយ​កន្លែងក្នុងទី​ក្រុង​ដាម៉ាស​កាល​ពី​ខែ​មករា ឆ្នាំ២០២៤ ក៏​បាន​សម្លាប់​ទីប្រឹក្សា​អ៊ីរ៉ង់​យ៉ាង​តិច ៥ ​នាក់​ផងដែរ​ ខណៈកាលពីខែមីនា ក៏មានការវាយប្រហារតាមផ្លូវអាកាសលើខេត្តយុទ្ធសាស្ត្រ Deir el-Zour ភាគខាងកើតប្រទេសស៊ីរីក្បែរព្រំដែនអ៊ីរ៉ាក់ ដោយបានសម្លាប់ទីប្រឹក្សាអ៊ីរ៉ង់ម្នាក់ទៀត ៕

ដោយ ៖ សុខ ជីវ័ន្ត

ចុចអាន ៖ អ៊ីស្រាអែល បាញ់មីស៊ីល ផ្តាច់ជីវិតកូនប្រុសនិងចៅៗ របស់មេក្រុមហាម៉ាស