ទិន្នផលគ្រាប់ស្វាយចន្ទីកម្ពុជា នឹងកើនដល់ជាង ១ លានតោន នៅក្នុងរយៈពេល ៥ ឆ្នាំខាងមុខ

ទិន្នផលគ្រាប់ស្វាយចន្ទីនៅកម្ពុជានឹងកើនឡើងដល់ជាង ១ លានតោន នៅរយៈពេល ៥ ឆ្នាំ​ខាង​​​មុខ ខណៈផ្ទៃដីដាំដុះបានកើនឡើងជារៀងរាល់ឆ្នាំ។

លោក ស៊ុយ កុកធាន អនុប្រធានសមាគមស្វាយចន្ទីកម្ពុជាមានប្រសាសន៍ថា កម្ពុជាបាន​ក្លាយ​ជាអធិរាជស្វាយចន្ទីរួចទៅ​ហើយខាងគុណភាព ពីព្រោះស្វាយចន្ទីខ្មែរ នៅលើពិភពលោក គ្មាន​​​ស្វាយចន្ទីណាមានគុណភាពដូចយើងទេ គ្រាប់ធំ រសជាតិឆ្ងាញ់ ហើយមាន​សារធាតុចិញ្ចឹម​ច្រើន​។

លោក ស៊ុយ កុកធាន បានបញ្ជាក់ថា៖ «បរិមាណ ក្នុងការផលិតនៅកម្ពុជាគឺយើងជាប់លេខ២ រួច​ហើយ បន្ទាប់ពីប្រ​ទេសកូតឌីវ័រ ខ្ញុំជឿជាក់ថា ក្នុងរយៈពេល ៥ ឆ្នាំក្រោយ បើគ្មានអ្វី​ប្រែ​ប្រួល​ទេ បរិមាណនៃការផលិតស្វាយចន្ទីកម្ពុជានឹង​លើសពី ១ លានតោន អញ្ចឹងវា​អាច​ប្រកួតប្រជែង នឹងអាចក្លាយទៅជាអ្នកដែលឈរលំដាប់លេខ ១ ហើយមានស្ថិរភាព​នៅ​ក្នុងពិភពលោក»។

លោក ស៊ុយ កុកធាន បានបន្តថា ប្រសិនបើការកែច្នៃហើយនាំចេញផលិតផលកែច្នៃ កម្ពុជា​ត្រូវ​ការ​ពេលវេលា ពីព្រោះការប្រកួតប្រជែង ដូចជាវៀតណាមគេក្លាយទៅជាប្រទេសដែលនាំចេញ ចន្ទី​​កែច្នៃលេខ១ នៅលើពិភពលោក នៅក្នុងអនុវិស័យមួយនេះ ស្ទើរតែ ២០ ឆ្នាំ ហើយ យើង​ទើបតែចាប់ផ្ដើមទេ អញ្ចឹងយើងត្រូវ​ការពេលវេលា។

បើតាមលោក ស៊ុយ កុកធាន៖ «ការដាំដុះប្រចាំឆ្នាំរបស់កម្ពុជា មានការកើនឡើង អញ្ចឹងអត់​មាន​ឆ្នាំណាមួយ ដែលប្រជាកសិករ អត់ដាំថែមទេ មានឆ្នាំខ្លះដាំ ៤ ម៉ឺនហិកតា ឆ្នាំខ្លះ ៥ ម៉ឺន​ហិកតា ដូចឆ្នាំ ២០២៤ រកកូនចន្ទីដាំអត់បានព្រោះកសិករដាំច្រើន»។

អនុប្រធានសមាគមស្វាយចន្ទីរូបនេះ បញ្ជាក់ថា ស្វាយចចន្ទីដែលដាំរួចហើយ អាយុកាន់​តែកើនឡើង ដូច្នេះទិន្នផលក៏កាន់តែខ្ពស់ ដូចជាបរិមាណនៃការដាំដុះ ដែលកម្ពុជាបាន​ព្យាករណ៍​ថា ជាង ៥៨ ម៉ឺនហិកតា គឺជាបរិមាណផ្ទៃដី​ដែលប្រមូលផល មិនគិតបញ្ចូល​ទាំង​បរិមាណផ្ទៃដី ដែលមិនទាន់ប្រមូលផលទេ ដូច្នេះ​បើយើងគិតបរិមាណផ្ទៃដី​ដែលមិនទាន់​ប្រមូល​ផលខ្ទង់ ១០ ម៉ឺនហិកតា ទៅ ២០ ម៉ឺហិកតា បន្ថែមទៀត ដែលសរុប ៧០ ហិកតា ហើយបើ​យើង​គុណនឹង ១,៥ តោន កន្លះក្នុងមួយហិកតា គឺទិន្នផល១ លានតោនហើយ។

កាលពីឆ្នាំ ២០២១ កម្ពុជាធ្លាប់ជាប្រទេសលេខ១ លើពិភពលោក កម្ពុជាផលិតបានជាង ១ លានតោន ព្រោះដោយសារនៅពេលនោះ អាកាសធាតុល្អ អំណោយផល ធ្វើឱ្យទិន្នផល​ស្វាយ​ចន្ទីកម្ពុជាកើនឡើង។

លោក តូច ប៊ុនហួរ រដ្ឋលេខាធិការ ក្រសួងកសិកម្ម រុក្ខាប្រមាញ់ និងនេសាទ បានអះអាងថា កម្ពុជានឹងក្លាយជាប្រទេសដែលនាំចេញគ្រាប់ស្វាយចន្ទីច្រើនជាង​គេលើពិភពលោកនៅក្នុងឆ្នាំ ២០៣០។

លោក តូច ប៊ុនហួរ បានបញ្ជាក់ថា ប្រសិនបើទីផ្សារល្អ មិនមានឧបសគ្គអ្វី មិនយូរទេ យើង​អាចឈាន​ទៅរកអធិរាជស្វាយ​ចន្ទីពិតប្រាកដ ដោយសារថា យើងប្រៀបធៀបនឹងប្រទេស ដែលមានដំណាំស្វាយន្ទី​ច្រើន​ជាងគេ គឺប្រទេស កូតឌីវ័រ មានដល់ជាង ១ លានហិកតា  ហើ​យបន្ទាប់មកប្រទេសឥណ្ឌា ប៉ុន្តែបើនិយាយពីរសជាតិ និងគ្រាប់ គឺស្វាយចន្ទីយើងល្អលើសគេ ចំណុចនេះហើយ​ដែលយើងអាចក្លាយទៅជាអធិរាជស្វាយចន្ទីបាន។

យោងតាមសមាគមស្វាយចន្ទីកម្ពុជា នៅក្នុងឆ្នាំ ២០២៤ កម្ពុជា​សម្រេច​​បានការ​ប្រមូលទិន្នផលគ្រាប់ស្វាយចន្ទីចំនួន ៨៥ ម៉ឺនតោន ក្នុង​នោះ​នាំចេញ​គ្រាប់ឆៅ​បាន​ចំនួន ៨១ ម៉ឺន ៥ ពាន់តោន កើនឡើង ២១ ភាគរយ ធៀបនឹងឆ្នាំ ២០២៣ គិត​ជា​ទឹក​ប្រាក់​​ ១,១៥០ ពាន់លាន​ដុល្លារ កើន ២៦,១៥ ភាគរយ។ ក្នុងនោះនាំចេញទៅវៀតណាម មានចំនួន ៧៩ ម៉ឺន ៥ ពាន់​តោន។

កម្ពុជាមានផ្ទៃដីប្រមូលផលស្វាយចន្ទីសរុបចំនួនជាង ៥៨ ម៉ឺនហិកតា (៥៨០ ១១៧) ក្នុងនោះ​ខេត្ត​ចំនួន ១០ របស់កម្ពុជា មានផ្ទៃដី​ដាំដុះ​ស្វាយ​​​​​ចន្ទីច្រើនជាងគេរួមាន ខេត្តកំពង់ធំជិត ១៥ ម៉ឺន​ហិកតា (១៤៧ ៧០៣) ខេត្តក្រចេះ ជាង ១០ ម៉ឺនហិកតា (១០២ ៥២០) រតនគិរី ៩៧ ២៥៨ ហិកតា កំពង់ចាម ៤៦ ៥៨២ ហិកតា ស្ទឹងត្រែង ៤៤ ២៥០ ហិកតា ខេត្ត​ត្បូងឃ្មុំ ៣៦ ៤០៣ ហិកតា ខេត្តសៀមរាប ៣៥ ៩១៤ ហិកតា ខេត្តព្រះវិហារ ២៨ ៩៦៥ ហិកតា ឧត្តរមានជ័យ ១៣ ៨១៨ ហិកតា និងមណ្ឌលគិរី ៩ ៨៥៨ ហិកតា៕

អត្ថបទ៖ ឡេង ដេត