អភិបាលរាជធានីឱ្យកងកម្លាំង និងអាជ្ញាធរយកចិត្តទុកដាក់ការពារសន្តិសុខ សុវត្ថិភាពថ្ងៃបុណ្យចូលឆ្នាំថ្មី

ដើម្បីឱ្យរាជធានីភ្នំពេញ រក្សាបាននូវសន្តិសុខ សុវត្ថិភាព របៀបរៀបរយល្អ លោកឃួង ស្រេង អភិបាលនៃគណៈអភិបាលរាជធានីភ្នំពេញ បានណែនាំឱ្យកងកម្លាំងសមត្ថកិច្ច មន្ទីរពាក់ព័ន្ធនិងអាជ្ញាធរខណ្ឌទាំង១៤ យកចិត្តទុកដាក់ការពារសន្តិសុខ សុវត្ថិភាពក្នុងឱកាសបុណ្យចូលឆ្នាំថ្មីខាងមុខនេះឱ្យបានល្អប្រសើរ។ការណែនាំនេះបានធ្វើឡើងក្នុងកិច្ចប្រជុំមួយនារសៀលថ្ងៃទី០៨មេសាឆ្នាំ២០២៥នេះ នៅសាលារាជធានីភ្នំពេញ។

លោកឃួង ស្រេង លើកឡើងថា៖” ការរក្សានូវសន្តិសុខ សុវត្ថិភាព ជូនប្រជាពលរដ្ឋក្នុងឱកាសបុណ្យចូលឆ្នាំខ្មែរឆ្នាំម្សាញ់២០២៥ខាងមុខ នេះជារឿងសំខាន់ ដែលកងកម្លាំងនិងអាជ្ញាធរខណ្ឌទាំង១៤ត្រូវតែយកចិត្តទុកដាក់ ការពារសន្តិសុខឱ្យបានល្អបំផុត។បន្ថែមពីនេះ ការរៀបចំសណ្តាប់ធ្នាប់សាធារណៈ អនាម័យ បរិស្ថានក៏ជារឿងសំខាន់ដែរ ដែលយើងត្រូវយកចិត្តទុកដាក់ឱ្យបានល្អផងដែរ”។

លោកឃួង ស្រេង ណែនាំឱ្យ រដ្ឋបាលខណ្ឌទាំង១៤ ត្រូវចុះពិនិត្យរដ្ឋបាលនៅតំបន់មានហានិភ័យ មើលទាំងទីតាំងអាជីវកម្ម ចុះពិនិត្យដល់គោលដៅសំខាន់ៗមួយចំនួនទៀត ហើយអ្វីដែលទើសត្រូវធ្វើឱ្យស្អាត ចំពោះអនាម័យ បរិស្ថាន សំរាម ត្រូវតែស្អាត៕

អត្ថបទ÷ស្រីរ័ត្ន