ជីវិតកម្សាន្ដ

តួឯកស្រីក្នុងរឿង «Marry My Husband» សារភាពត្រង់ៗថា មុខមាត់ស្អាតឆ្លងកាត់កាំបិតសុទ្ធសាធ

បានផុស

១ year មុន

នៅ

ថ្ងៃអង្គារ ៨ មេសា ២០២៥

ដោយ

នៅក្នុងឧស្សាហកម្មកម្សាន្ត ជុំវិញនីតិវិធីកែសម្ផស្សគឺជាបទដ្ឋានមួយដែលតារាសម្តែងកូរ៉េជាច្រើន តែងតែលាក់លៀមឬរក្សាភាពស្ងៀមស្ងាត់ នៅពេលគេចោទសួរសំណួរចំៗអំពីសម្រស់ពួកគេថា «ធ្លាប់ឆ្លងកាត់មុខកាំបិតឬអត់?» ហើយជារឿយៗ កម្រនឹងមានតារាណាម្នាក់មានសេចក្តីក្លាហានប្រាប់ត្រង់ៗនូវការពិតទៅកាន់មហាជនណាស់។

ផ្ទុយពីរឿងរ៉ាវខាងលើ តារាសម្តែង Park Min-young ស្រាប់តែចេញមុខទម្លាយដោយស្មោះត្រង់ថា នាងឆ្លងកាត់ការវះកាត់ភ្នែក និងច្រមុះ ដែលជាទង្វើមួយទទួលបានការកោតសរសើរពីអ្នកគាំទ្រចំពោះតម្លាភាព និងទំនុកចិត្តរបស់នាង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តួឯកស្រីកំពុងល្បីក្នុងរឿង «Marry My Husband» មិនឈប់ត្រឹមការសរសេរបង្ហាញនូវភាពស្មោះត្រង់របស់ខ្លួនត្រឹមប៉ុណ្ណឹងឡើយ ពោលគឺនាងថែមទាំងបានចែករំលែកនូវរូបថតបញ្ចប់ការសិក្សាពីថ្នាក់បឋម និងមធ្យមសិក្សាថែមទៀត ដោយបង្ហាញពីការផ្លាស់ប្តូរដ៏គួរឲ្យភ្ញាក់ផ្អើលក្នុងការផ្លាស់ប្តូរសម្រស់របស់នាង។ ទោះបីជាមានភាពខុសប្លែកគ្នាគួរឲ្យកត់សម្គាល់នៅក្នុងរូបភាពមុន និងក្រោយក៏ដោយ អ្នកលេងអ៊ីនធឺណែតជាច្រើនបានសរសើរពីឆន្ទៈក្នុងការនិយាយរបស់នាង ដោយហៅវាថាជាការផ្លាស់ប្តូរដ៏ស្មោះត្រង់មួយនៅក្នុងវិស័យកម្សាន្តកូរ៉េ។

ដំណើររបស់ Park Min-young បានចាប់ផ្ដើមដោយក្ដីស្រឡាញ់ចាក់ឫសយ៉ាងជ្រៅចំពោះរឿងភាគកូរ៉េ។ បន្ទាប់ពីចំណាយពេលមួយផ្នែកនៃយុវវ័យរបស់នាងនៅសហរដ្ឋអាមេរិក។ តារាស្រីរូបនេះ បានត្រលប់មកកាន់ទឹកដីកំណើតវិញ និងបានប្រលងជាប់ GED (ការអភិវឌ្ឍន៍អប់រំទូទៅ) ព្រមទាំងបន្តការសម្ដែងនៅនាយកដ្ឋានល្ខោនរបស់សាកលវិទ្យាល័យ Dongguk។ នាងបានចាប់ផ្តើមជាតារាបង្ហាញម៉ូដពាណិជ្ជកម្ម ប៉ុន្តែអាជីពរបស់នាងផ្ទាល់ បានចាប់ផ្ដើមជាមួយនឹងភាពយន្តក្រោមចំណងជើងថា «High Kick» ក្នុងឆ្នាំ ២០០៦ ។

មិនឈប់ត្រឹមប៉ុណ្ណឹងទេ ដើម្បីឲ្យកេរ្តិ៍ឈ្មោះកាន់តែល្បីសុះសាយក្នុងវិស័យភាពយន្ត តារាស្រីញញឹមស្រស់ Park Min-young បានចូលរួមសម្ដែងក្នុងរឿងភាគកូរ៉េជាច្រើន មានដូចជា Sungkyunkwan Scandal” ២០១០), City Hunter” (២០១១), Queen for Seven Days” (២០១៧) និងភាពយន្តដ៏ពេញនិយមពីសំណាក់ស្រទាប់យុវវ័យ «What’s Wrong with Secretary Kim (២០១៨)» ស្របពេលដែលរឿង «Marry My Husband” (២០២៤) បានក្លាយជាតួនាទីឈានមុខ និងបញ្ជាក់ពីឋានៈក្នុងនាមជាតួស្រីលេចធ្លោមួយរូប។

ទោះបីជាយាងណាក៏ដោយ មិនមែនថាអាជីពរបស់តួស្រីរលូនទៅមុខរហូតនោះទេ នាងក៏ធ្លាប់ប្រឈមមុខនឹងបញ្ហាផ្ទាល់ខ្លួន រួមទាំងរឿងអាស្រូវការណាត់ជួបឆ្នាំ ២០២២ ពាក់ព័ន្ធនឹងជនសង្ស័យលួចបន្លំផ្នែកហិរញ្ញវត្ថុ។ ប៉ុន្តែ យាងណា Park Min-young នៅតែផ្តោតលើការងារមិនឈបឈរ ហាក់់មិនអើពើលើពាក្យចចាមអារាមឡើយ។ នាងត្រូវបានគេស្គាល់ដោយសារក្រមសីលធម៌ការងារ និងភាពអត់ធន់ ជាពិសេសតែងតែប្រកាន់ខ្ជាប់នូវតួនាទីផ្សេងៗគ្នា មិនថាតួរាយរ៉ង នាងតែងបង្ហាញពីភាពរីកចម្រើនផ្ទាល់ខ្លួន ក្នុងនាមជាតារាសម្តែងដ៏មានសមត្ថភាពមួយរូប។

យ៉ាងណាមិញ ជាមួយនឹងការបើកចំហរនូវភាពស្មោះត្រង់អំពីការវះកាត់កែសម្ផស្ស និងការវិវត្តន៍អាជីពជាបន្តបន្ទាប់ Park Min-young បានបង្ហាញនូវភាពជឿជាក់ និងភាពត្រឹមត្រូវ បើទោះជាសង្គមកូរ៉េមិនបានទទួលស្គាល់យ៉ាងណាក្ដី។ មិនតែប៉ុណ្ណោះ នៅពេលដែលនាងស្វែងយល់ពីគម្រោងភាពយន្តថ្មីៗ តារារូបនេះតែងតែទទួលយកការផ្លាស់ប្តូរទាំងផ្ទាល់ខ្លួន និងវិជ្ជាជីវៈក្នុងអាជីពជានិច្ច៕