កីឡា

តំណាងអង្គភាពប្រដាល់៤នៅកម្ពុជាសុទ្ធតែមិនបានចរចាជាមួយ WKN

បានផុស

១ year មុន

នៅ

ថ្ងៃអង្គារ ៨ មេសា ២០២៥

ដោយ

ថ្នាក់ដឹកនាំស្ថាប័នកីឡាប្រដាល់ចំនួន៤នៅកម្ពុជាសុទ្ធតែមិនបានចរចាជាមួយ សម័្ពន្ធកីឡាប្រដាល់ឃីកបុកស៊ីងពិភពលោក (World Kickboxing Network) ដែលបានអះអាងពីខ្លួនកំពុងស្ថិតនៅផ្លូវចរចាជាមួយស្ថាប័នប្រដាល់គុនខ្មែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ខូវ ឆាយ ប្រធានសហព័ន្ធប្រដាល់គុនខ្មែរបានចេញមុខបំភ្លឺថា សហព័ន្ធកីឡាប្រដាល់គុនខ្មែរពុំធ្លាប់បានចរចាជាមួយ WKN ឡើយ ហើយក៏មិនអនុញ្ញាតឲ្យមានការប្រកួតដណ្តើមខ្សែក្រវាត់ដោយប្រើឈ្មោះ WKN Kun Khmer នៅលើទឹកដីនៃប្រទេសកម្ពុជាដែរ ប្រសិនបើគ្មានកិច្ចព្រមព្រៀងណាមួយ។

ចំពោះ លោក មាម រ៉ា ប្រធានសហព័ន្ធគុនខ្មែរអន្តរជាតិបានប្រាប់សារព័ត៌មាន«កម្ពុជាថ្មី»ថា អង្គភាពប្រដាល់គុនខ្មែរអន្តរជាតិរបស់លោកមិនបានចារណាមួយជាមួយ WKN ទេ ហើយស្ថាប័នរបស់លោកក៏មិនត្រូវទៅចរចាជាមួយស្ថាប័នប្រដាល់នេះដែរ។

រាប់ឆ្វេង លោក មាម រ៉ា (ទី១) លោក សំណព្វ (ទី២) លោក ខូវ ឆាយ (ទី៣) និង លោក ហេង សុឃន (ទី៤)

ចំណែក លោក ហេង សុឃន ប្រធានសហព័ន្ធកីឡាប្រដាល់ឃីកបុកស៊ីងកម្ពុជា បានឆ្លើយតបនឹងសំណួររបស់«កម្ពុជាថ្មី»ដោយបានបញ្ជាក់ថា អត់បានចរចាជាមួយ WKN ឡើយ។

ចំណែក លោក សំណព្វ ដែលជាតំណាងស្ថាប័នប្រដាល់ ISKA ប្រចាំនៅប្រទេសកម្ពុជាក៏បានបញ្ជាក់ដល់«កម្ពុជាថ្មី»ដែរថា លោកពុំបានចារចាណាមួយជាមួយ WKN ដែរ។

សូមបញ្ជាក់ថា កាលពីថ្ងៃទី៧ ខែមេសា ឆ្នាំ២០២៥ ស្ថាប័ន WKN បានប្រកាសថា ខ្លួនកំពុងស្ថិតនៅលើផ្លូវចរចាជាមួយគុនខ្មែរដើម្បីបោះជំហានដ៏ធំមួយសម្រាប់ការវិវត្ត និងការទទួលស្គាល់គុនខ្មែរលើឆាកអន្តរជាតិ។ នេះមិនមែនជាលើកទី១ទេដែលប្រកាសបែបនេះ កាលពីថ្ងៃទី២ ខែមេសា WKN ក៏បានប្រកាសលើផេករបស់ខ្លួនពីដំណើរការកំពុងចរចាជាមួយគុនខ្មែរដែរ។

សូមបញ្ជាក់ថា WKN ដែលត្រូវបានបង្កើតឡើងជាផ្លូវការកាលពីឆ្នាំ១៩៩៤ ដោយលោក Stephane Cabrera មានកីឡាករ កីឡាការិនីជាម្ចាស់ផ្ទះខ្សែក្រវាត់ជាច្រើនទៅតាមប្រភេទទម្ងន់ និងប្រភេទវិញ្ញាសា ដូចជា ប្រភេទ Full Contact, Kickboxing, Orientaal Rules, K-1 Rules និង មួយថៃ៕

អត្ថបទ៖ វីរបុត្រ

Related Topics:កីឡាប្រដាល់គុនខ្មែរ