បុរសម្នាក់ទៀតស្លាប់ ហើយតេស្តឃើញវិជ្ជមានកូវីដ១៩ ឆ្លងដល់កូន២នាក់ប្តីប្រពន្ធ

អាជ្ញាធរខេត្តសៀមរាប បានឲ្យដឹងថា បុរសឈ្មោះ ឃន់ ឃៀន អាយុ៥៦ឆ្នាំ បានទទួលមរណៈភាពកាលពីថ្ងៃទី ១០ ខែ មិថុនាឆ្នាំ២០២១ នៅភូមិព្រៃធំ សង្កាត់ស្រង៉ែ ក្រុងសៀមរាប ដោយសារជំងឺប្រចាំកាយរ៉ាំរ៉ៃ និងរកឃើញ វិជ្ជមាន​កូវីដ-១៩ ។

ប្រភពព័ត៌មានបានឲ្យដឹងថា ករណីបុរសវ័យចំណាស់បានស្លាប់ដោយសារជំងឺប្រចាំកាយរាំរ៉ៃ និងរកឃើញ វិជ្ជមាន​កូវីត-១៩ នេះបានឆ្លងពីកូនរបស់គាត់ដែលធ្វើការខាងធនាគារនៅស្រុកសូទ្រនិគម រួចមកលេងផ្ទះ ជួបជុំជាមួយគ្រួសារនិងញាតិមិត្តនៅភូមិព្រៃធំ សង្កាត់ស្រង៉ែ ក្រុងសៀមរាប។បច្ចុប្បន្នកម្លាំងសមត្ថកិច្ចកំពុងស្រាវជ្រាវបន្ថែមលើករណីនេះយ៉ាងល្អិតល្អន់។

លោកក្រុស​ សារ៉ាត់ ប្រធានមន្ទីរសុខាភិបាលខេត្តសៀមរាប បានឲ្យដឹងនៅព្រឹកថ្ងៃទី១១នេះថា​ ករណីអ្នកជំងឺនៅសង្កាត់ស្រង៉ែ ឈឺរ៉ាំរ៉ៃ ស្លាប់នៅផ្ទះ តេស្តទៅវិជ្ជមាន ហើយកូនគាត់២នាក់ប្តីប្រពន្ធវិជ្ជមាន និងមានឆ្លងទៅអ្នកដទៃទៀតក្នុងភូមិ។

លោកបន្តថា នៅក្នុងខេត្តសៀមរាប មានករណីស្លាប់ដោយសារជំងឺប្រចាំកាយរាំរ៉ៃ និងរកឃើញ វិជ្ជមានកូវីត-១៩ មានចំនួន៣នាក់។ 

 អាជ្ញាធរខេត្តសៀមរាប សំណូមពរដល់បងប្អូនប្រជាពលរដ្ឋទាំងអស់ត្រូវបង្កើនការប្រុងប្រយ័ត្ន ដោយបន្តអនុវត្តតាមការណែនាំ របស់ក្រសួងសុខាភិបាល និងវិធានការ ៣កុំ ៣ការពារ ដែលណែនាំដោយប្រមុខរាជរដ្ឋាភិបាលកម្ពុជា ដើម្បីរួមគ្នាកាត់ផ្តាច់ ការចម្លង និងបង្ការខ្លួនយើង ពីមេរោគកូវីដ-១៩ដ៏ចង្រៃនេះ ព្រោះវាមិនទាន់រលាយបាត់ ទៅណាឆ្ងាយនៅឡើយ ហើយក៏កំពុងបន្តការចម្លងយ៉ាងសកម្ម ផងដែរ៕ អត្ថបទ៖ កុសល