អ៊ីស្រាអែល និងលីបង់ ព្រមចរចាគ្នា​ដោយផ្ទាល់ ក្រោយ​កិច្ច​ប្រជុំ​នៅ​វ៉ាស៊ីនតោន

អ៊ីស្រាអែល និងលីបង់ បានព្រមព្រៀងគ្នាចាប់ផ្តើមការចរចាដោយផ្ទាល់ បន្ទាប់ពីកិច្ចពិភាក្សានៅទីក្រុងវ៉ាស៊ីនតោនកាលពីថ្ងៃអង្គារ​ទី​១៤​ខែមេសា​ឆ្នាំ​២០២៦ ដែលរដ្ឋមន្ត្រីការបរទេសអាមេរិក លោក Marco Rubio បានហៅថាជា «ឱកាសប្រវត្តិសាស្ត្រ» សម្រាប់សន្តិភាព។

យោង​តាម​ការ​ផ្សាយ​របស់ Korea Times កិច្ចប្រជុំដែលរាប់បញ្ចូលទាំងឯកអគ្គរដ្ឋទូតនៃប្រទេសទាំងពីរនេះ គឺជាកិច្ចពិភាក្សាជាន់ខ្ពស់ដោយផ្ទាល់លើកដំបូងចាប់តាំងពីឆ្នាំ១៩៩៣មក។ ក្រសួងការបរទេសអាមេរិកបានពិពណ៌នាថា ការចរចានេះ «ទទួលបានលទ្ធផលល្អ» តែ​ក្រុមសកម្មប្រយុទ្ធហេសបូឡាហ ដែលជំទាស់នឹងការចរចានេះ នៅតែ​បន្ត​បាញ់រ៉ុក្កែតចូលក្នុងភាគខាងជើងប្រទេសអ៊ីស្រាអែល នៅពេលដែលកិច្ចប្រជុំបានចាប់ផ្តើម។

សហរដ្ឋអាមេរិកកំពុងជំរុញឲ្យ​មានការបញ្ឈប់ជម្លោះរវាងអ៊ីស្រាអែល និងក្រុមហេសបូឡា ដោយព្រួយបារម្ភថា វាអាចប៉ះពាល់ដល់បទឈប់បាញ់រយៈពេលពីសប្ដាហ៍​រវាងវ៉ាស៊ីនតោន និងអ៊ីរ៉ង់។ អ៊ីស្រាអែល ដែលកងកម្លាំងរបស់ខ្លួនកំពុងកាន់កាប់ផ្នែកខ្លះនៃភាគខាងត្បូងលីបង់ បានទាមទារឲ្យ​មានការរំលាយក្រុមហេសបូឡា ខណៈដែលឯកអគ្គរដ្ឋទូតលីបង់ អ្នកស្រី Nada Hamadeh Moawad ទោះបីជាបានហៅកិច្ចប្រជុំនេះថា «មានលក្ខណៈស្ថាបនា» ក៏ដោយ ក៏បានទទូចឲ្យ​មានបទឈប់បាញ់ និងអធិបតេយ្យភាពពេញលេញរបស់រដ្ឋលើទឹកដីលីបង់ទាំងអស់។ ទន្ទឹមនោះ សហរដ្ឋអាមេរិកនៅតែបន្តការបិទផ្លូវសមុទ្រទៅកាន់កំពង់ផែអ៊ីរ៉ង់ ដ្បិត​វ៉ាស៊ីនតោន និងទីក្រុងតេហេរ៉ង់ នៅតែរក្សាបទឈប់បាញ់ដ៏ផុយស្រួយរបស់ពួកគេ៕

ប្រែសម្រួល៖ ឈាង