កីឡា

អគ្គនាយកដ្ឋានកីឡា «វគ្គផែនការហាត់ហ្វឹកហ្វឺនពង្រឹងគ្រូបង្វឹកជម្រើសជាតិ» បានបញ្ចប់ក្រោយរៀបចំរយៈពេល ២ថ្ងៃ

បានផុស

១ ខែ មុន

នៅ

ថ្ងៃពុធ ៣ មិថុនា ២០២៦

ដោយ

សិក្ខាសាលាស្តីពី «ការរៀបចំទ្រឹស្ដី ផែនការហាត់ហ្វឹកហ្វឺន ដើម្បីពង្រឹងសមត្ថភាពគ្រូបង្វឹក គ្រូជំនួយក្រុមកីឡាថ្នាល និងក្រុមកីឡាជម្រើសជាតិ ឆ្នាំ២០២៦ បានបិទបញ្ចប់ទៅហើយកាលពីល្ងាចថ្ងៃទី០២ ខែមិថុនា ឆ្នាំ២០២៦ ក្រោមអធិបតីភាពលោក ប៊ូ ជុំសេរី អនុរដ្ឋលេខាធិការ ក្រសួងអប់រំ យុវជន និងកីឡា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទិដ្ឋភាពបិទវគ្គ

លោក ប៊ូ ជុំសេរី អនុរដ្ឋលេខាធិការក្រសួងអប់រំ និងជាអ្នកជំនាញកីឡាជើងចាស់មួយរូបនៅកម្ពុជា បានលើកឡើងពីបទពិសោធ និងប្រវត្តិខ្លះៗនៃការវិវឌ្ឍន៍កីឡានៅកម្ពុជាចែករំលែកដល់សិក្ខាកាមដែលជាគ្រូៗមកចូលរួមក្នុងពិធីបិទសិក្ខាសាលាម្សិលមិញនេះ។

ថ្នាក់ដឹកនាំរូបនេះលើកទឹកចិត្តដល់សិក្ខាកាមដែលបានចូលរួមវគ្គសិក្ខាសាលា និងទទួលបាននូវចំណេះដឹងទាំងទ្រឹស្ដី និងការអនុវត្តន៍ផ្សេងៗអំឡុងពេលនេះសូមយកទៅអនុវត្តន៍ជាក់ស្ដែងលើការបង្ហាត់បង្រៀនដល់កីឡាករ កីឡាការិនីឲ្យមានភាពរីកចម្រើន និងមានសមត្ថភាពកាន់តែប្រសើរឡើងប្រកបដោយប្រសិទ្ធភាពខ្ពស់។

ទិដ្ឋភាពបិទវគ្គ

បញ្ជាក់ដែរថា វគ្គសិក្ខាសាលាខាងលើនេះផ្តោតសំខាន់លើការចែករំលែកចំណេះដឹង នៃចិត្តសាស្ត្រកីឡា ការព្យាបាលដោយចលនា និងស្តារយុវនិតិសម្បទា ការផ្សព្វផ្សាយឯកសារគតិយុត្ត ការរៀបចំទ្រឹស្តី និងផែនការហាត់ហ្វឹកហ្វឺន ការសង្គ្រោះបឋម ព្រមទាំងចែករំលែកពីមេរៀននៃផលវិបាកនៃការប្រើប្រាស់សារធាតុហាមឃាត់ ក្នុងវិស័យកីឡា (ដូប៉ា ឬដូពីង) ផងដែរ។ សក្ខាកាមជាគ្រូបង្វឹក ក្រុមកីឡាជម្រើសជាតិ ក្រុមកីឡាថ្នាល និងក្រុមកីឡាជនពិការចំនួន ៧៤នាក់ ក្នុងនោះគណៈកម្មការគ្រប់គ្រងវគ្គ ៥នាក់ គ្រូឧទ្ទេស ៥នាក់ អនុគណៈកម្មការសម្របសម្រួល ៣នាក់ អនុគណៈកម្មាការជំនួយការ ៣នាក់។ វគ្គនេះសិក្សារយៈពេល ២ថ្ងៃចាប់ពីថ្ងៃទី១ ដល់ ២ ខែមិថុនា ឆ្នាំ២០២៦ នៅសាលនៃមជ្ឈមណ្ឌលជាតិហ្វឹកហ្វឺនកីឡា៕