ព័ត៌មានអន្ដរជាតិ

ហ្សេលេស្គី៖ រុស្ស៊ីកំពុងបង្រៀនកុមារអ៊ុយក្រែនដែលចាប់ទៅ ឱ្យស្អប់និងសម្លាប់ប្រជាជនខ្លួនឯង

បានផុស

១ ខែ មុន

នៅ

ថ្ងៃពុធ ៣ មិថុនា ២០២៦

ដោយ

ប្រធានាធិបតីអ៊ុយក្រែន លោក វ៉ូឡូឌីមៀរ ហ្សេលេនស្គី លើកឡើងថា រុស្ស៊ីកំពុងបណ្តុះបណ្តាលកុមារអ៊ុយក្រែនដែលត្រូវចាប់ទៅនោះ ឱ្យចូលរួមប្រយុទ្ធ ដើម្បីទីក្រុងមូស្គូនិងបង្រៀនឱ្យស្អប់ប្រទេសកំណើត។

លោក ហ្សេលេនស្គី និយាយបែបនេះក្នុងបទសម្ភាសន៍កាលពីថ្ងៃអាទិត្យនៅលើកម្មវិធី «Face the Nation» របស់សារព័ត៌មាន CBS ហើយលោកឆ្លើយតបថា៖ « ពិតជាមានភស្តុតាង»។

លោកបន្ថែមថា៖ « បាទ! ពួកគេ[រុស្ស៊ី] បានបង្រៀនកុមារទាំងនោះឱ្យស្អប់ប្រទេសកំណើតខ្លួន ស្អប់ជនជាតិដើម។ ជនជាតិអ៊ុយក្រែន! អ្នកអាចស្រមៃឃើញ យុវជនអ៊ុយក្រែនទាំងនោះ រួមទាំងក្មេងប្រុសតូចៗ មកសមរភូមិ ដើម្បីសម្លាប់ជនជាតិអ៊ុយក្រែន»។

ប្រធានាធិបតីអ៊ុយក្រែន លោក ហ្សេលេនស្គី។ រូបភាព៖ Reuters

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមសារព័ត៌មានអាមេរិក The Hill ផ្សាយថ្ងៃទី០២ ខែមិថុនា ឆ្នាំ២០២៦ តាមរយៈកម្មវិធីតាមដានគ្រប់គ្រងដោយរដ្ឋាភិបាលអ៊ុយក្រែនបង្ហាញថា កុមារអ៊ុយក្រែនចំនួន ១.៦លាននាក់ នៅតែស្ថិតក្រោមការគ្រប់គ្រងរបស់រុស្ស៊ី ក្មេងទាំងនោះត្រូវបាននិរទេស ផ្ទេរដោយបង្ខំ ឬជាប់គាំងនៅក្នុងទឹកដីដែលកាន់កាប់ដោយរុស្ស៊ីជាបណ្តោះអាសន្ន។

ប្រធានាធិបតីអ៊ុយក្រែននិយាយថា៖ « រដ្ឋាភិបាលមានឈ្មោះក្មេងជំទង់ចំនួន ២០ ០០០នាក់ ពួកគេប្រឈមនឹងការនិរទេស ឬផ្ទេរដោយបង្ខំដោយរុស្ស៊ី។ មកដល់ពេលនេះ មាន ២ ២០០នាក់ ត្រូវបានបញ្ជូនត្រឡប់មកវិញ ហើយទីក្រុងកៀវកំពុងជំរុញឱ្យរុស្ស៊ីធានាថាអ្នកផ្សេងទៀតត្រូវបានដោះលែង»។

លោក ហ្សេលេនស្គី ថា៖ « ទីក្រុងមូស្គូបានស្នើឱ្យដោះដូរកុមារជាមួយកងទ័ពអ៊ុយក្រែន។ យើងមិនអាចដោះដូរជនស៊ីវិលបានទេ។ អ្នកអាចប្រគល់ជនស៊ីវិលមកវិញបាន។ ហើយវាជារបៀបដែលអ្នកអាចដោះដូរបាន! មែនហើយ សំខាន់ណាស់ក្នុងការយកអ្នកចម្បាំងរបស់យើង អ្នកទោសសង្គ្រាមមកវិញ[…] ប៉ុន្តែយើងមិនអាចដោះដូរពួកគេជាមួយកុមារបានទេ»។

លោក បន្ត ថា៖ « ប៉ុន្តែការពិតប្រទេសរុស្ស៊ីបានស្នើឱ្យដោះដូរកុមារ! នេះជាចម្លើយ ថាពួកគេបានលួចកុមារ។ ហើយខ្ញុំសង្ឃឹមថាសភានឹងរកឃើញ[…] លទ្ធភាពម្តងទៀត ដើម្បីដាក់ទណ្ឌកម្មលើរុស្ស៊ី ដោយសារកុមារ។ យើងនិយាយជាមួយសមាជិកសភា។ យើងបាននិយាយច្រើនដងអំពីរឿងនេះ។ ខ្ញុំសង្ឃឹមថាពួកគេនឹងបន្តគិតគូរលើបញ្ហានេះ »។

យ៉ាងណាមិញ រដ្ឋបាល លោក ដូណាល់ ត្រាំ បានពន្យារពេលផ្អាកទណ្ឌកម្មលើរុស្ស៊ី តាមការស្នើសុំរបស់ប្រទេសនៅអាស៊ីដែលត្រូវការប្រេង អំឡុងពេលសង្គ្រាមអ៊ីរ៉ង់បច្ចុប្បន្ន៕

សម្រួល៖ ណឺ មិនា