ថៃនឹងទទួលបានវ៉ាក់សាំងកូវីដរបស់ក្រុមហ៊ុនចិននៅខែក្រោយ

យោងតាមក្រសួងសុខាភិបាលសាធារណៈថៃបានឲ្យដឹងថា ប្រទេសថៃនឹងទទួលបាននូវវ៉ាក់សាំងកូវីដចំនួន ២ លានដូសពីក្រុមហ៊ុន Sinovac Biotech របស់ប្រទេសចិន ។

កញ្ចប់ដំបូងនៃវ៉ាក់សាំងចំនួន ២០០,០០០ ដូសនឹងមកដល់នៅខែក្រោយ ខណៈ ៨០០,០០០ ដូសទៀតនឹងមកដល់ក្នុងមីនា ហើយការបញ្ជាទិញចុងក្រោយចំនួន ១ លានដូសនឹងមកដល់នៅខែមេសា ។

ចាប់តាំងពីមានការផ្ទុះឡើងកាលពីខែមុននៅឯផ្សារអាហារសមុទ្រខេត្ត សាមុត សាខន មន្ត្រីសុខាភិបាលថៃបានព្យាយាមដើម្បីទប់ស្កាត់ការរីករាលដាលនៃវីរុសនេះ ។ រលកនៃការឆ្លងខ្ពស់បំផុតរបស់ប្រទេសថៃបានកើនឡើងដល់ ១,៤៥១ ករណីដែលបានកើតឡើងកាលពីខែមេសា នៅពេលដែលមានវិធានការទប់ស្កាត់យ៉ាងតឹងរ៉ឹង និងការរឹតត្បិតការធ្វើដំណើរបានកើតមាននៅទូទាំងប្រទេស ។

ទន្ទឹមនោះក្រុមហ៊ុនថៃ Siam Bioscience ក៏កំពុងស្ថិតក្នុងដំណើរការផលិតវ៉ាក់សាំងកូវីដរបស់ក្រុមហ៊ុន AstraZeneca/Oxford ផងដែរ។ វ៉ាក់សាំងនោះត្រូវបានគ្រោងនឹងដាក់ឲ្យប្រើប្រាស់ជាសាធារណៈនៅខែឧសភា ខណៈដែលរដ្ឋាភិបាលថៃបានកំណត់គោលដៅដើម្បីចាក់វ៉ាក់សាំងនេះដល់ប្រជាជនពាក់កណ្តាលនៃប្រជាជនប្រមាណ ៣៣ លាននាក់នៅចុងឆ្នាំនេះ ។

គួរបញ្ជាក់ថា គិតត្រឹមពេលនេះប្រទេសថៃមានករណីឆ្លងជំងឺកូវីដ ១៩ ចំនួន ៨,៤៣៩ ករណី និងមានអ្នកស្លាប់ចំនួន ៦៥ នាក់ ៕

ប្រែសម្រួលដោយ ៖ ជីវ័ន្ត

ប្រភព ៖ The Thaiger

ចុចអាន ៖ ក្រោយមានអ្នកឆ្លងកូវីដច្រើនឡើងៗ នាយករដ្ឋមន្រ្តីថៃជំរុញឲ្យប្រជាជនកុំចេញទៅណា

ចុចអាន ៖ ក្រុង បាងកក លែងឲ្យញ៉ាំអាហារនៅតាមភោជនីយដ្ឋានក្រោយម៉ោង៧យប់