Update ៖ អ្នកស្លាប់ក្នុងគ្រោះរញ្ជួយដីនៅឥណ្ឌូនេស៊ីកើនដល់ ៣៤ នាក់

យ៉ាងហោចណាស់មនុស្ស ៣៤ នាក់បានស្លាប់ បន្ទាប់ពីគ្រោះរញ្ជួយដីកម្រិត ៦.២ រ៉ិចទ័របានវាយប្រហារកោះ Sulawesi របស់ប្រទេសឥណ្ឌូណេស៊ីកាលពីព្រឹកថ្ងៃសុក្រ ទី១៥ ខែមករា នេះ ។

មនុស្សរាប់រយនាក់ទៀតបានរងរបួសនៅពេលដែលការរញ្ជួយដីបានកើតឡើងនៅព្រឹកព្រលឹមដែលបង្កឲ្យមានការភ័យស្លន់ស្លោក្នុងចំណោមប្រជាជននៅកោះនេះ ។

លោក Ali Rahman ប្រធានទីភ្នាក់ងារកាត់បន្ថយគ្រោះមហន្តរាយក្នុងតំបន់បាននិយាយថា “ព័ត៌មានចុងក្រោយដែលយើងទទួលបានគឺថាមនុស្សចំនួន ២៦ នាក់បានស្លាប់នៅក្នុងទីក្រុង Mamuju ខណៈដែលអ្នកស្លាប់ជាច្រើនត្រូវបានកប់នៅក្រោមគំនរបាក់បែក” ។

ដោយឡែកទីភ្នាក់ងារគ្រោះមហន្តរាយជាតិបាននិយាយថា ក្រោយមកមនុស្ស ៨ នាក់បន្ថែមបានស្លាប់នៅក្នុងតំបន់មួយនៅភាគខាងត្បូងនៃទីក្រុង Mamuju ជាទីក្រុងដែលមានប្រជាជនចំនួន ១១០,០០០ នាក់នៅខេត្ត West Sulawesi ដែលធ្វើឲ្យចំនួនអ្នកស្លាប់សរុបឡើងដល់ ៣៤ នាក់ ។

ចំណុចកណ្តាលនៃការរញ្ជួយដីនេះមានចម្ងាយ ៦ គីឡូម៉ែត្រភាគឦសានក្រុង Majene ជាមួយជម្រៅ ១០ គីឡូម៉ែត្រ។ សេចក្តីថ្លែងការណ៍បាននិយាយថា ប្រជាពលរដ្ឋរាប់ពាន់នាក់បានភៀសខ្លួនចេញពីផ្ទះរបស់ពួកគេ ដើម្បីស្វែងរកសុវត្ថិភាពបន្ទាប់ពីការរញ្ជួយដីនេះ ។

ទោះបីជាយ៉ាងណាក៏ដោយ វាមិនបានបង្កឲ្យមានការព្រមានពីរលកយក្សស៊ូណាមិទេ ប៉ុន្តែវាមានការរង្គើខ្លាំងក្លារយៈពេលប្រហែល ៧ វិនាទី ។

ទីភ្នាក់ងារកាត់បន្ថយគ្រោះមហន្តរាយបាននិយាយថា សណ្ឋាគារមួយនិងការិយាល័យអភិបាលខេត្ត West Sulwesi ត្រូវរងការខូចខាតយ៉ាងធ្ងន់ធ្ងរហើយអគ្គិសនីក៏ត្រូវបានកាត់ផ្តាច់ផងដែរ ។

គួរបញ្ជាក់ថា ដោយសារតែមានទីតាំងស្ថិតនៅលើខ្សែក្រវ៉ាត់ភ្នំភ្លើងប៉ាស៊ីហ្វិក ប្រទេសឥណ្ឌូនេស៊ីតែងតែរងការវាយប្រហារដោយការរញ្ជួយដី ៕

សូមទស្សនាវីដេអូ!

A child who is still alive trapped under rubble after the earthquake in West Sulawesi. pic.twitter.com/mrBskAZcRv

— Saifulbahri Ismail (@saifulCNA) January 15, 2021

ប្រែសម្រួលដោយ ៖ ជីវ័ន្ត

ប្រភព ៖ CNA

ចុចអាន ៖ តាមពិតយន្តហោះ Boeing ដែលធ្លាក់ក្នុងឥណ្ឌូនេស៊ីអាក់ខានហោះហើរជិតមួយឆ្នាំមកហើយ

ចុចអាន ៖ រញ្ជួយដីខ្លាំងក្លានៅ ឥណ្ឌូនេស៊ី បណ្តាលឲ្យមានអ្នកស្លាប់និងការខូចខាតធ្ងន់ធ្ងរ