ព័ត៌មានអន្ដរជាតិ
តុលាការកំពូលថៃ លើកទោសលោកស្រី យីងឡាក់ មួយករណី
កាលពីថ្ងៃអង្គារទី២៦ខែធ្នូ នាយកដ្ឋានព្រហ្មទណ្ឌនៃតុលាការកំពូលសម្រាប់អ្នកកាន់មុខតំណែងនយោបាយថៃ បានលើកទោសអតីតនាយករដ្ឋមន្ត្រី លោកស្រី យីងឡាក់ ស៊ីណាវ៉ាត្រា ពីបទប្រព្រឹត្តអំពើពុករលួយ ពាក់ព័ន្ធការផ្ទេរតំណែងអគ្គលេខាធិការក្រុមប្រឹក្សាសន្តិសុខជាតិ (NSC) លោក Thawil Pliensri ក្នុងឆ្នាំ២០១១។
តុលាការសម្រេចថា លោកស្រី យីងឡាក់ គ្មានចេតនាបង្កការខូចខាតអ្វីទេ ហើយវាជាការផ្ទេរធម្មតា ពោលគឺមិនមែនជាផែនការដកតំណែងមេប៉ូលិសជាតិ និងតែងតាំងសាច់ញាតិសម្រាប់ការងារអ្វីឡើយ។
តុលាការក៏ដកហូតដីកាចាប់ខ្លួនលោកស្រី យីងឡាក់ ដែលចេញនៅពេលលោកស្រី ខកខានចូលខ្លួនក្នុងតុលាការកាលពីខែវិច្ឆិកាឆ្នាំមុន សម្រាប់ការកាត់ទោសក្នុងសំណុំរឿងនេះ ផងដែរ។
ការចោទប្រកាន់ពីបទរំលោភអំណាចនេះ កើតឡើងនៅថ្ងៃទី៣០ខែកញ្ញាឆ្នាំ២០១១ ពេលលោកស្រី យីងឡាក់ ក្នុងនាមជានាយករដ្ឋមន្ត្រី បានចុះហត្ថលេខាលើបញ្ជាផ្ទេរលោក Thawil Pliensri ចេញពីតំណែងអគ្គលេខាធិការ NSC ទៅធ្វើការជាទីប្រឹក្សានាយករដ្ឋមន្ត្រី។ ពេលនោះ ខុទ្ទកាល័យ ក៏បានអនុម័តតែងតាំងលោក Wichean Potephosree ដែលកាលនោះជាអគ្គស្នងការនគរបាលជាតិ ឲ្យទៅជំនួសលោក Thawil នៅ NSC វិញ។
បន្ទាប់មក លោកស្រី យីងឡាក់ បានស្នើឲ្យ ឧត្តមសេនីយ៍ឯក Priewphan Damapong ដែលជាអគ្គស្នងការរងនគរបាលជាតិនិងជាសាច់ញាតិជិតស្និទ្ធរបស់លោកស្រី ត្រូវតែងតាំងជាអគ្គស្នងការនគរបាលជាតិ ដើម្បីបំពេញតួនាទីទំនេរដែលបន្សល់ទុកដោយលោក Potephosree។
លោក Priewphan ត្រូវជាបងប្អូនរបស់អតីតភរិយាលោកថាក់ស៊ីន ស៊ីណាវ៉ាត្រា គឺលោកស្រី Potjaman Na Pombejra ហើយត្រូវចូលនិវត្តន៍នៅថ្ងៃទី ៣០ខែកញ្ញា ឆ្នាំ២០១២។
លោក Thawil បានដាក់ញត្តិទៅតុលាការរដ្ឋបាលកំពូល ឲ្យរំសាយសេចក្តីសម្រេចពាក់ព័ន្ធការផ្ទេរតំណែងនោះ។ យ៉ាងណា តុលាការធម្មនុញ្ញ បានសម្រេចជាឯកច្ឆ័ន្ទថា លោកស្រី យីងឡាក់ ពិតជារំលោភអំណាចមែន ដោយជ្រៀតជ្រែកក្នុងការផ្ទេរមន្ត្រីរដ្ឋាភិបាល។ បន្ទាប់មក លោកស្រីត្រូវបានដកចេញពីតំណែងនាយករដ្ឋមន្ត្រី។
មកដល់ថ្ងៃទី១ខែកក្កដា ឆ្នាំ២០២០ គណៈកម្មាធិការជាតិប្រឆាំងអំពើពុករលួយ បានចេញសេចក្តីសម្រេចថា មានហេតុផលដែលរកឃើញថា លោកស្រី យីងឡាក់ មានភាពមិនស្មោះត្រង់ក្នុងការបំពេញភារកិច្ច ហើយជំរុញឲ្យអគ្គមេធាវីដាក់ប្តឹងលោកស្រី នៅក្នុងផ្នែកព្រហ្មទណ្ឌនៃតុលាការកំពូលសម្រាប់អ្នកកាន់មុខតំណែងនយោបាយ។
តុលាការបានចេញដីកាចាប់ខ្លួនលោកស្រី នៅពេលលោកស្រីមិនបង្ហាញខ្លួនចំពោះមុខតុលាការ សម្រាប់សវនាការលើកដំបូងក្នុងខែវិច្ឆិកាឆ្នាំ២០២២។ លោកស្រី យីងឡាក់ បានរត់គេចខ្លួនតាំងពីខែសីហា ឆ្នាំ២០១៧មក នៅពេលលោកស្រី ខកខានបង្ហាញខ្លួននៅតុលាការ ក្នុងសំណុំរឿងពាក់ព័ន្ធកម្មវិធីសន្យាទិញស្រូវ ដែលខាតបង់ប្រាក់យ៉ាងតិច៥០០ពាន់លានបាត។ ករណីនេះលោកស្រីត្រូវបានកាត់ទោសឲ្យជាប់ពន្ធនាគាររយៈពេលប្រាំឆ្នាំ។
សូមបញ្ជាក់ លោកស្រី យីងឡាក់ មកពីគណបក្សភឿថៃ បានក្លាយជានាយករដ្ឋមន្ត្រីថៃ ក្រោយការបោះឆ្នោតឆ្នាំ ២០១១។ លោកស្រី គឺជានាយករដ្ឋមន្ត្រីស្ត្រីដំបូងគេនិងក្មេងជាងគេបំផុតរបស់ប្រទេសថៃ ក្នុងរយៈពេលជាង៦០ឆ្នាំ។ លោកស្រីត្រូវបានតុលាការធម្មនុញ្ញដកចេញពីតំណែងនៅថ្ងៃទី ៧ ខែឧសភា ឆ្នាំ ២០១៤៕
ប្រែសម្រួល៖ Vann Vann
ប្រភព៖ Bangkok Post
-
កីឡា៥ ថ្ងៃ ago
ឈ្នះខ្សែក្រវាត់ថ្ងៃជាមួយ ឈឿង ល្វៃ កីឡាករ Erdene ក៏មានរថយន្តទទួល
-
ព័ត៌មានជាតិ៤ ថ្ងៃ ago
ម្ចាស់សំណង់របងថ្មនៅរមណីយដ្ឋានឆ្នេរនេសាទ នៅតែរឹងទទឹងមិនព្រមវាយកម្ទេចរបងចេញ
-
សេដ្ឋកិច្ច១ សប្តាហ៍ ago
តាសក់ផ្អែម ៥ តោន របស់ កសិករម្នាក់ លក់ចេញអស់ ក្រោយសហគមន៍កសិកម្មជួយរកទីផ្សារ
-
ព័ត៌មានអន្ដរជាតិ១ សប្តាហ៍ ago
នាឡិកា ៦ គ្រឿងរបស់កូនពៅសេដ្ឋី ឥណ្ឌា ដែលខំសន្សំទុក មានមួយមេ Facebook ទាក់ចិត្តខ្លាំង
-
សន្តិសុខសង្គម៦ ថ្ងៃ ago
ដកហូតមុខតំណែង មេបញ្ជាការរងស្រុកស្វាយជ្រុំ៣នាក់ ពាក់ព័ន្ធករណីទារប្រាក់ពីអ្នកប្រើប្រាស់គ្រឿងញៀនជាង១ពាន់ដុល្លារ
-
ជីវិតកម្សាន្ដ៧ ថ្ងៃ ago
មនុស្សស្និទ្ធស្នាលទម្លាយពីស្ថានភាព Ngoc Trinh ក្រោយចេញពីពន្ធនាគារជាង៣ខែ
-
ព័ត៌មានជាតិ៥ ថ្ងៃ ago
ដើម្បីកុំឱ្យភោជនីយដ្ឋានដួលរលំបះជើងទាន់ សម្ដេចធិបតី បញ្ជាឱ្យកែម៉ោងពិនិត្យជាតិអាល់កុល
-
ជីវិតកម្សាន្ដ៥ ថ្ងៃ ago
តួជនទី៣ Benz ត្រលប់មកតំណែងស្រីស្អាតម្ដងទៀត ទោះឈានដល់អាយុ៤៣ឆ្នាំ