បាក់ផ្លូវហាយវ៉េ នៅចិន ស្លាប់មនុស្ស ១៩នាក់

តាមសេចក្តីរាយការណ៍របស់ Xinhua នៅថ្ងៃពុធទី១ខែឧសភា, មនុស្សចំនួន១៩នាក់ ត្រូវបាត់​បង់ជីវិត ក្នុងហេតុការណ៍បាក់ផ្លូវហាយវ៉េមួយនៅខេត្តក្វាងទុង ភាគខាងត្បូងប្រទេសចិន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ផ្លូវដែលតភ្ជាប់ពីទីក្រុង Meizhou និងតំបន់ Dabu ក្នុងខេត្ត ក្វាងទុង បានបាក់នៅម៉ោងប្រហែល២:១០នាទីទាបភ្លឺ ខណៈឧបទ្ទវហេតុនេះ ក៏បណ្តាលឲ្យរថយន្តចំនួន១៨គ្រឿង ត្រូវជាប់គាំងជាមួយមនុស្សសរុប៤៩នាក់ផងដែរ។

តាមការបញ្ជាក់ពីប្រព័ន្ធផ្សព្វផ្សាយរដ្ឋ គិតត្រឹមម៉ោង១១ព្រឹកថ្ងៃពុធ ក្រៅពីមនុស្សបាត់បង់ជីវិត១៩នាក់, នៅមានមនុស្ស៣០នាក់ទៀត ត្រូវរបួស កំពុងទទួលការព្យាបាលនៅមន្ទីរពេទ្យ។

ភ្លាមៗក្រោយគ្រោះថ្នាក់នេះ អាជ្ញាធរបានបញ្ជូនក្រុមការងារមានគ្នាប្រហែល៥០០នាក់ ទៅកាន់កន្លែងកើតហេតុដើម្បីជួយសង្គ្រោះ។

ទោះបីជាយ៉ាងណាក៏ដោយ មូល​ហេតុ​នៃ​ការបាក់ផ្លូវនៅ​មិន​ទាន់ត្រូវ​បាន​បញ្ជាក់ច្បាស់ឡើយ ប៉ុន្តែគេបានចង្អុលទៅបញ្ហាអាកាសធាតុ ព្រោះថា ខេត្តក្វាងទុង ​ត្រូវ​រង​ការ​វាយ​ប្រហារ​ដោយ​ព្រឹត្តិការណ៍​អាកាសធាតុកាចសាហាវ ​ក្នុង​រយៈពេលប៉ុន្មាន​សប្តាហ៍​ថ្មីៗ​នេះ ដូចជាគ្រោះ​ទឹក​ជំនន់និង​ខ្យល់​ព្យុះ​កំបុតត្បូងជាដើម៕

អត្ថបទ៖ សុខ​ សុវណ្ណ

ចុចអាន៖ ផ្លូវហាយវ៉េបែលហ្ស៊ិក រាប់គីឡូម៉ែត្រ ក្លាយជាភ្នំសំរាម