ថៃ រកឃើញអ្នកឆ្លងកូវីដ ៦៥ករណីទៀត

ប្រទេសថៃ បានកត់ត្រាករណីឆ្លងវីរុសកូរ៉ូណាថ្មីចំនួន៦៥ករណីទៀត ដោយក្នុងនោះជាការឆ្លងក្នុងសហគមន៍ចំនួន៦០ករណីនិងនាំចូល ៥ករណី។ 

ចំនួននេះនាំឲ្យការឆ្លងសរុបកើនដល់២៦,៣៧០ករណី។ គ្មានការស្លាប់ថ្មីត្រូវបានរាយការណ៍ទេ ដោយធ្វើឲ្យចំនួនអ្នកស្លាប់នៅតែមាន៨៥នាក់។

ខេត្ត សាមុត សាខន ដែលជាចំណុចកណ្តាលនៃជំងឺកូវីដ១៩រលកទី២ បានកត់ត្រា៣៨ករណី ខណៈខេត្ត Pathum Thani រកឃើញ២ករណី។

ក្នុងចំណោម៥ករណីដែលនាំចូលពីបរទេស មាន២នាក់ជាជនជាតិមីយ៉ាន់ម៉ាដែលបានឆ្លងដែនម៉ាឡេស៊ីចូលស្រុក Sungai Kolok ក្នុងខេត្ត Narathiwat និង៣ករណីទៀតគឺជាជនជាតិថៃដែលបានជិះយន្តហោះមកពីប្រទេសអារ៉ាប៊ីសាអូឌីត ចក្រភពអង់គ្លេសនិងស៊ុយអែត។

ប្រទេសថៃបានកត់ត្រាការឆ្លងតិចជាង១០០ករណីក្នុងមួយថ្ងៃ ចាប់តាំងពីថ្ងៃទី១៩ខែកុម្ភៈមក។ ទោះបីស្ថានភាពកាន់តែប្រសើរឡើងក៏ដោយ អាជ្ញាធរបានព្រមានប្រឆាំងនឹងភាពរីករាយភ្លេចខ្លួន។

ក្រសួងសុខាភិបាលបាននិយាយនៅថ្ងៃអាទិត្យនេះថា មានអ្នកស្ម័គ្រចិត្តផ្នែកសុខភាពប្រមាណ១លាននាក់ ត្រូវបានចាត់តាំងឲ្យទៅកាន់សហគមន៍នានានៅទូទាំងប្រទេសដើម្បីជំរុញឲ្យប្រជាជនកុំភ្លេចខ្លួន និងត្រៀមចាក់វ៉ាក់សាំង៕

ប្រែសម្រួលដោយ៖ Vann Vann

ប្រភព៖ Bankgkok Post

ចុចអាន៖ កូវីដនៅ ប៉ារ៉ាហ្គាយ កាន់តែធ្ងន់ធ្ងរ ដល់ថ្នាក់អស់ថ្នាំព្យាបាលអ្នកជំងឺ

ចុចអាន៖ អ្នកពាក់ព័ន្ធ​ជាមួយ​ស្ត្រី​វៀតណាម​២​នាក់​ឆ្លង​កូ​វីដ​១៩​នៅ​ស្វាយរៀង​ជិត​៤០​នាក់​លទ្ធផលតេស្ត​លើក​ទី​១​អវិជ្ជមាន​ទាំងអស់​