បុរសម្នាក់ត្រូវរថយន្តបុកស្លាប់ភ្លាមៗពេលកំពុងឆ្លងផ្លូវ

បុរសម្នាក់បានស្លាប់បាត់បង់ជីវិតភ្លាមៗនៅនិងកន្លែង ក្នុងហេតុការណ៍គ្រោះថ្នាក់ចរាចរណ៍ រថយន្តបើកបុកពេញទំហឹង ខណៈកំពុងឆ្លងផ្លូវជាតិលេខ១ ស្ថិតនៅភូមិស្វាយតឿ សង្កាត់ស្វាយតឿ ក្រុងស្វាយរៀង។

ក្រោយកើតហេតុជនបង្កដែលជាម្ចាស់រថយន្តម៉ាក CAMRY ពណ៌ស ពាក់ផ្លាកលេខ នគរបាល២.១៤៦៣ បានគេចខ្លួនពីកន្លែងកើតហេតុ បន្សល់ទុករថយន្ដនៅកន្លែងកើតហេតុ។

ប្រភពពីសមត្ថកិច្ច បានឲ្យដឹងថា មុនពេលកើតហេតុគេឃើញជនរងគ្រោះបើកម៉ូតូ១គ្រឿងម៉ាកហុងដាសេ១២៥ ពណ៌ខ្មៅ ពាក់ផ្លាកលេខស្វាយរៀង ១J-១៤៦៣ បើកបរដោយឈ្មោះ ជា សុភាស់មុន្នីរ័ត្ន ភេទប្រុស អាយុ៣៨ឆ្នាំ មុខរបរកម្មករ​រោងចក្រ រស់នៅភូមិរមាំងថ្កោល ស្រុកស្វាយទាបខេត្តស្វាយរៀង បើកបរឆ្លងផ្លូវ ពីជើងទៅត្បូង ស្របពេលនោះក៏មានរថយន្ត១គ្រឿងពាក់ស្លាកលេខ ន.បម បើកពីលិចទៅកើត យ៉ាងលឿនក៏បុកម៉ូតូជនរងគ្រោះចំពាក់កណ្តាលម៉ូតូលាន់ដូចរន្ទះ ប៉ើងទាំងម៉ូតូខ្ទាតទៅដល់របងផ្ទះអ្នកស្រុកមចម្ងាយជិត២០ម៉ែត្រ រីឯជនរងគ្រោះផ្លោងឡើងលើធ្លាក់​មកបោកក្បាលនិងថ្នល់ ស្លាប់ភ្លាមៗនៅកន្លែងកើតហេតុ។

ក្រោយពីសមត្ថកិច្ចធ្វើការវាស់វែងរួច យកមធ្យោបាយរក្សាទុកនៅការិយាល័យនគបាលចរាចរណ៍ នៃស្នងការដ្ឋានន​គបា​ល​ខេត្តស្វាយរៀង រង់ចាំដោះស្រាយនៅពេលក្រោយ។ ចំណែកសពជនរងគ្រោះ បានប្រគល់អោយក្រុមគ្រួសារធ្វើបុណ្យ​តាមប្រពៃណីនៅផ្ទះ៕

អត្ថបទ៖ ភក្ដី