ពីរថ្ងៃទៀត អ្នកនៅតំបន់លឿងអាចធ្វើចរាចរណ៍ និងប្រកប​ការ​ងារមុខរបរឡើងវិញ លើកលែង​តែអាជីវកម្មមួយចំនួន

រាជរដ្ឋាភិបាលកម្ពុជា នៅថ្ងៃទី ២៦ ខែមេសា បានសម្រេច​បន្តការបិទ​ខ្ទប់​រាជធានី​ភ្នំពេញ និង​ក្រុង​តានៃខេត្តកណ្តាល រយៈពេល ៧ ថ្ងៃបន្តទៀត ដើម្បីប្រយុទ្ធ និងទប់​ស្កាត់​ការឆ្លង​រាល​ដាល​ នៃជំងឺកូវីដ១៩។

យោងតាមសេចក្តីសម្រេចស្តីពីការបន្តបិទខ្ទប់ រាជធានីភ្នំពេញ និងក្រុងតាខ្មៅ រយៈពេល៧ បានបង្ហាញថាភូមិសាស្ត្រដែលត្រូវបានបិទខ្ទប់ ត្រូវបានបែងចែកជាតំបន់ក្រហម (ឆ្លងរាលដាលកម្រិតធ្ងន់ធ្ងរ) តំបន់លឿងទុំ (ឆ្លងរាលដាលកម្រិតមធ្យម) និងតំបន់លឿង(ឆ្លងរាលដាលកម្រិតស្រាល)។

យោងតាមប្រការ ៥ នៃសេចក្តីសម្រេចនេះបានចែងថា ការធ្វើចរាចរណ៍គ្រប់ប្រភេទនៅក្នុង​តំបន់លឿងត្រូវបាន​អនុញ្ញាត​ឱ្យប្រព្រឹត្តទៅជាធម្មតាចាប់ពីម៉ោងសូន្យ ថ្ងៃទី ២៩ ខែមេសា ប៉ុន្តែបម្រាមគោចរនៅពេលយប់ចាប់ពីម៉ោង ៨ ដល់ម៉ោង ៥ភ្លឺ នៅតែបន្តអនុវត្តដដែល។

ហើយសកម្មភាពការងារមុខរបរ និងអាជីវកម្មគ្រប់ប្រភេទនៅក្នុងតំបន់លឿង ក៏ត្រូវបានអនុញ្ញាតឱ្យបើកដំណើរការជាធម្មតា លើកលែងតែសាលារៀនរដ្ឋ និងឯកជន ក្លឹបកម្សាន្ត ខារ៉ាអូខេ រង្គសាល រមណីយដ្ឋាន អាជីវកម្មម៉ាស្សា ជាដើម។

ពាក់ព័ន្ធនឹងបញ្ហានេះ អ្នកនាំពាក្យសាលារាជធានីភ្នំពេញ លោក ម៉េត មាសភក្តី បានប្រាប់ថា ត្រឹមយប់ថ្ងៃទី ២៦ ខែមេសា រដ្ឋបាលរាជធានីភ្នំពេញ មិនទាន់បានរៀបចំ ផែនទីបែងចែកភូមិសាស្ត្រ តំបន់ក្រហម តំបន់លឿងទុំ និងតំបន់លឿងនៅឡើយនោះទេ។

លោកថា សាលាររាជធានីភ្នំពេញទើបតែមានការកំណត់តំបន់ក្រហម ដែលអនុវត្តតាមសេចក្តីសម្រេចចំនួន ៣ កាលពីប៉ុន្មានថ្ងៃមុន ហើយបន្តអនុវត្តមកដល់ពេលនេះ ដែលបញ្ជាក់ពីតំបន់ក្រហមតែមួយគត់នៅក្នុងរាជធានីភ្នំពេញ។

លោកថា សេចក្តីសម្រេចថ្មី មានសុពលភាពចាប់ពីម៉ោងសូន្យ ថ្ងៃទី ២៩ ដូច្នេះអាជ្ញាធរនៅបន្តអនុវត្តសេចក្តីសម្រេចចាស់គឺកំណត់តែតំបន់ក្រហមតែប៉ុណ្ណោះ៕

សូមអានសេចក្តីសម្រេចពិស្តារខាងក្រោម៖

អត្ថបទ៖ ឡេង ដេត