រដ្ឋបាលរាជធានីភ្នំពេញ បំភ្លឺ​​បន្ថែម​ ជុំវិញការ​បែងចែក​អំណោយ​​ដល់​​ពលរដ្ឋ​នៅ​តំបន់​​បិទខ្ទប់

ភ្នំពេញ៖ រដ្ឋបាលរាជធានីភ្នំពេញបានសេចក្ដីប្រកាសព័ត៌មាន ច្រានចោលនូវការលើកឡើងក្នុងគោលបំណងបង្កចលាចលបំពុលសង្គម រារាំងដល់ដំណើរការបែងចែកអំណោយសង្គ្រោះជូនដល់ប្រជាពលរដ្ឋដែលមានតម្រូវការស្បៀងបន្ទាន់។

បើតាមការបំភ្លឺ​របស់​អាជ្ញាធរ​រាជធានី​ភ្នំពេញ ការ​បែងចែកអំណោយ​ជួយ​ដល់ពលរដ្ឋ​ក្នុង​តំបន់បិទខ្ទប់ គឺ​ឈរ​លើ​គោលការណ៍ដោយ​យកចំនួនគ្រួសារ បន្ទប់ជួល និងអ្នកមានជីវភាព​ខ្វះខាតជា​មូលដ្ឋាន។ ដោយមានការ​សម្របសម្រួលជួយ​ដឹកជញ្ជូនពី​កង​កម្លាំង​កងយោធពលខេមរភូមិន្ទ កងកម្លាំង​បញ្ជាការដ្ឋានកង​អង្គរក្ស​បានធ្វើការដឹក​ជញ្ជូន​ដល់មូលដ្ឋាន និង​បានចែកដល់​ប្រជាពលរដ្ឋ​​សរុប​បាន​ចំនួន​ ១៨៤ ៤០៦ គ្រួសារ។

ជាមួយ​គ្នានេះ រដ្ឋបាលរាជធានី​ភ្នំពេញ​ក៏​នៅ​បន្តអំពាវនាវដល់ដល់សប្បុរសជន ក្រុមហ៊ុន អង្គការសង្គមស៊ីវិលជាតិ និងអន្តរជាតិ គ្រប់មជ្ឈដ្ឋាន សូមបន្តរួមចំណែកតាមលទ្ធភាពក្នុងស្មារតីជាមហាគ្រួសារខ្មែរតែមួយ ដើម្បីរួមគ្នាប្រយុទ្ធប្រឆាំងនឹងជំងឺកូវីដ១៩ តាមរយៈរដ្ឋបាលរាជធានីភ្នំពេញ៕

អត្ថបទ៖ ស្រីរ័ត្ន