ផ្ទុះកូវីដចេញពីកាស៊ីណូ សុខ គីមម៉េង នៅច្រកទ្វារព្រំដែន​តន់ហន់ពីរថ្ងៃ​រកឃើញអ្នកវិជ្ជមាន ១១១ នាក់

អាជ្ញាធរខេត្ត​កំពត បាន​ប្រកាសរកឃើញ ចំនួន​អ្នកវិជ្ជមាន​ជំងឺ​កូវីដ​១៩ ចំនួន ១១១ នាក់ ត្រឹមតែ​រយៈ​ពេល​២ថ្ងៃ ដែលបានផ្ទុះ​ចេញ​ពី​កាស៊ីណូ សុខ គីមម៉េង​ នៅ​ច្រក​ទ្វារ​ព្រំដែន​ទ្វេភាគី​តន់ហន់ ខេត្តកំពត។

រដ្ឋបាលខេត្តកំពតបញ្ជាក់ថា នៅថ្ងៃទី ៣០ ខែ​សភា រកឃើញ​អ្នកវិជ្ជមាន ៥៦ នាក់ សុទ្ធសឹងជាបុគ្គលិក បម្រើការងារនៅ​កាស៊ីណូ សុខ គីមម៉េង ហើយការបន្តធ្វើតេស្ត និងយកសំណាក ដល់រសៀលថ្ងៃទី៣១ ខែឧសភា បានរកឃើញអ្នកវិជ្ជមាន​​កូវីដ-១៩ ចំនួន​៥៥នាក់ បន្ថែមទៀត។

ក្រុមគ្រូពេទ្យអះអាងថា អ្នកពាក់ព័ន្ធផ្ទាល់ និងប្រយោលដែលកំពុងសម្រាកព្យាបាល និងកំពុងធ្វើចត្តាឡីស័ក ត្រូវចែកជា​២មណ្ឌល គឺមណ្ឌលទី១ ស្ថិតនៅវិទ្យាល័យព្រះបិតា ថវិកាជាតិ ស្រុកកំពង់ត្រាច ដែលមានអ្នកពាក់ព័ន្ធសរុប ១០៤​នាក់ កំពុងព្យាលបាល និងធ្វើចត្តាឡីស័ក​រយៈពេល១៤ថ្ងៃ។

ដោយឡែក មណ្ឌលទី២ ស្ថិតក្នុងកាស៊ីណូ សុខគីមម៉េង ច្រកទ្វារព្រំដែនតន់ហន់ ក្នុងឃុំព្រែកក្រឹស ស្រុកកំពង់ត្រាច ខេត្តកំពត មានអ្នកពាក់ព័ន្ធ ចំនួន១១៤នាក់ កំពុងសម្រាកព្យាបាល និងធ្វើចត្តា​ឡីស័ករយៈពេល១៤ថ្ងៃ៕

អត្ថបទ៖សេង ណារិទ្ធ