ព័ត៌មានជាតិ
តើមានការធ្វើតេស្តកូវីដ-១៩ ចំពោះគ្រូបង្រៀនជាប្រចាំសប្ដាហ៍ ដែរ ឬទេ?
គ្រឹះស្ថានសិក្សាសាធារណៈ និងឯកជននៅរាជធានីភ្នំពេញ បានចាប់ផ្ដើមបើកដំណើរការឡើងវិញ កាលពីថ្ងៃពុធ ទី១៥ ខែកញ្ញា សប្ដាហ៍មុន។ មុននោះមួយថ្ងៃ រដ្ឋបាលរាជធានីភ្នំពេញ បានចេញសេចក្តីប្រកាសព័ត៌មាន ដោយបានបង្ហាញថា ក្នុងយុទ្ធនាការប្រើប្រាស់ឧបករណ៍តេស្តរហ័សរកអង់ទីហ្សែនកូវីដ-១៩ មុនពេលបើកដំណើរការសាលារៀនឡើងវិញ ចំពោះគ្រូបង្រៀន និងបុគ្គលិកអប់រំចំនួន ១០,៤៤៣ នាក់ ក្នុងនោះគ្រូបង្រៀន និងបុគ្គលិកអប់រំចំនួន ២៤ នាក់ ស្មើនឹង ០.២៣% ទទួលបានលទ្ធផលតេស្តវិជ្ជមានជំងឺកូវីដ-១៩។
ទាក់ទងនឹងការធ្វើតេស្តសំណាក់រកមេរោគកូវីដ-១៩ចំពោះគ្រូបង្រៀន ក្នុងការបើកគ្រឹះស្ថានសិក្សាឡើងវិញនេះ តើនឹងមានធ្វើតេស្តសំណាកចំពោះគ្រូបង្រៀនជាប្រចាំសប្ដាហ៍ ឬយ៉ាងណា?
លោក ហែម ស៊ីណារ៉េត ប្រធានមន្ទីរអប់រំយុវជននិងកីឡារាជធានីភ្នំពេញ បានមានប្រសាសន៍ប្រាប់ “កម្ពុជាថ្មី” នៅថ្ងៃទី២០ ខែកញ្ញានេះថា ពាក់ព័ន្ធករណីខាងលើនេះ មន្ទីរមិនទាន់ទទួលបានការណែនាំផ្សេងទៀតទេ។
លោក ហែម ស៊ីណារ៉េត មានប្រសាសន៍ថា៖ “ការធ្វើតេស្តប្រចាំសប្ដាហ៍សម្រាប់គ្រូបង្រៀន ពុំទាន់មានការណែនាំនៅឡើយ ហើយពួកគាត់ (គ្រូបង្រៀន) ដែលបានចូលមកសាលានេះ សុទ្ធតែបានយកសំណាករួចរាល់ហើយ និងបានទទួលការចាក់វ៉ាក់សាំងចំនួន៣ដូសរួចមកហើយ”។
ប្រធានមន្ទីរអប់រំ យុវជន និងកីឡារាជធានីភ្នំពេញខាងលើ លើកឡើងបន្តថា ការដាក់ឱ្យដំណើរការគ្រឹះស្ថានសិក្សាឡើងវិញនេះ សម្រាប់រាជធានីភ្នំពេញ ចាប់ពីអនុវិទ្យាល័យដល់វិទ្យាល័យ គឺជាការបើកជាដំណាក់ៗ ដោយមានការគិតគូរ ដោយប្រុងប្រយ័ត្ន ជាពិសេសតាមការណែនាំពីអភិបាលរាជធានីភ្នំពេញ។
លោក ហែម ស៊ីណារ៉េត មានប្រសាសន៍បញ្ជាក់ថា៖ “ដោយឈរលើមូលដ្ឋានសំខាន់ៗរួមមាន៖ លោកគ្រូអ្នកគ្រូចំនួន៩៨% បានទទួលវ៉ាក់សាំងចំនួន៣ដូសរួចហើយ ចំណែកកុមារ និងយុវជនដែលមានអាយុពី១២ឆ្នាំដល់ក្រោម១៨ឆ្នាំ បានទទួលវ៉ាក់សាំងចំនួន២ដូសរួចហើយ។ ការចូលរៀនត្រូវបានកម្រិតសិស្សមិនលើសពី១៥នាក់ក្នុង១ថ្នាក់ ទន្ទឹមពេលវិធានការផ្សេងៗទៀតត្រូវបានដាក់ឱ្យអនុវត្តតាមគ្រឹះស្ថានសិក្សា”។
ប្រធានមន្ទីរអប់រំដដែលនេះ មានប្រសាសន៍ថា យើងត្រូវតែរៀនរស់នៅជាមួយកូវីដ-១៩ ដូច្នេះគ្រប់ៗគ្នាត្រូវមានកាតព្វកិច្ចចូលរួម អនុវត្តនូវវិធានការការពាររបស់ក្រសួងសុខាភិបាល គោលការណ៍ប្រតិបត្តិស្ដង់ដារ (SOP) របស់ក្រសួងអប់រំ លិខិតណែនាំស្តីពីវិធានការការពាររបស់រដ្ឋបាលរាជធានីភ្នំពេញ ជាពិសេសវិធានការ ៣កុំ៣ការពាររបស់ប្រមុខរាជរដ្ឋាភិបាល។
លោក ហែម ស៊ីណារ៉េត មានប្រសាសន៍បន្តថា៖ “ការបើកគ្រឹះស្ថានសិក្សាជាដំណាក់ៗនេះ ដោយគោរពនូវវិធានការការពាររបស់ក្រសួងសុខាភិបាលជាមូលដ្ឋានសំខាន់ សម្រាប់់ជាគំរូដល់វិស័យដទៃទៀតអនុវត្ត ក្នុងការត្រៀមបើកឡើងវិញ ស្របពេលរាជរដ្ឋាភិបាលមានគម្រោងបន្តការសម្រេចដាក់ឱ្យដំណើរការសេវាផ្សេងៗទៀត ដើម្បីជួយស្ដារកំណើនសេដ្ឋកិច្ចជាតិឡើងវិញ”។
គួររំលឹកថា គ្រឹះស្ថានអប់រំសាធារណៈ និងឯកជននៅរាជធានីភ្នំពេញ ចំនួន១៤២សាលាបានបើកដំណើរការឡើងវិញ នៅព្រឹកថ្ងៃទី១៥ ខែកញ្ញា ឆ្នាំ២០២១នេះ ក្នុងនោះគ្រឹះស្ថានសិក្សាសាធារណៈដែលដាក់ឱ្យដំណើរការនៅថ្ងៃនេះមានចំនួន៦២ លើ៦៨សាលា ចំណែកគ្រឹះស្ថានសិក្សាឯកជន មានចំនួន៨០ លើ១៥៩សាលា។
ចំណែកខេត្តផ្សេងៗទៀតកំពុងរៀបចំបើកដំណើរការជាបន្តបន្ទាប់ទៀតដោយសារត្រូវបោសសំអាត និងបាញ់ថ្នាំសម្លាប់មេរោគ បន្ទាប់ពីសាលារៀនទាំងនោះត្រូវយកធ្វើជាមណ្ឌលព្យាបាលជំងឺកូវីដ-១៩ ឬធ្វើជាមណ្ឌលចត្តាឡីស័ក។ ក្នុងនោះសាលាបើកមុនគេមានខេត្តព្រះសីហនុ បន្ទាប់មកទៀតរាជធានីភ្នំពេញ កណ្តាល ប៉ៃលិន បន្ទាយមានជ័យ ពោធិសាត់ បើកនៅថ្ងៃទី១៥ ខែកញ្ញា និងខេត្តកំពង់ចាម បើកនៅថ្ងៃទី២០ ខែកញ្ញា និងខេត្តស្វាយរៀងបើកនៅថ្ងៃទី២៧ ខែកញ្ញាខាងមុខ៕
អត្ថបទ៖ ច័ន្ទ វីរៈ
-
កីឡា៥ ថ្ងៃ ago
ឈ្នះខ្សែក្រវាត់ថ្ងៃជាមួយ ឈឿង ល្វៃ កីឡាករ Erdene ក៏មានរថយន្តទទួល
-
ព័ត៌មានជាតិ៤ ថ្ងៃ ago
ម្ចាស់សំណង់របងថ្មនៅរមណីយដ្ឋានឆ្នេរនេសាទ នៅតែរឹងទទឹងមិនព្រមវាយកម្ទេចរបងចេញ
-
សន្តិសុខសង្គម៦ ថ្ងៃ ago
ដកហូតមុខតំណែង មេបញ្ជាការរងស្រុកស្វាយជ្រុំ៣នាក់ ពាក់ព័ន្ធករណីទារប្រាក់ពីអ្នកប្រើប្រាស់គ្រឿងញៀនជាង១ពាន់ដុល្លារ
-
ជីវិតកម្សាន្ដ៧ ថ្ងៃ ago
មនុស្សស្និទ្ធស្នាលទម្លាយពីស្ថានភាព Ngoc Trinh ក្រោយចេញពីពន្ធនាគារជាង៣ខែ
-
ព័ត៌មានជាតិ៥ ថ្ងៃ ago
ដើម្បីកុំឱ្យភោជនីយដ្ឋានដួលរលំបះជើងទាន់ សម្ដេចធិបតី បញ្ជាឱ្យកែម៉ោងពិនិត្យជាតិអាល់កុល
-
ជីវិតកម្សាន្ដ៥ ថ្ងៃ ago
តួជនទី៣ Benz ត្រលប់មកតំណែងស្រីស្អាតម្ដងទៀត ទោះឈានដល់អាយុ៤៣ឆ្នាំ
-
ព័ត៌មានអន្ដរជាតិ៤ ថ្ងៃ ago
អ្នកវិទ្យាសាស្ត្រស្កុតឡែនរកឃើញហ្វូស៊ីលចម្លែករូបរាងដូចសត្វនាគចិនអាយុកាល ២៤០ លានឆ្នាំ
-
ព័ត៌មានអន្ដរជាតិ៦ ថ្ងៃ ago
នាវាចម្បាំងថៃ ច្រឡំដៃបាញ់កាំភ្លើងធំ ចំនាវាគ្នាឯង