ប្រជាជនកាណាដារាប់សែននាក់ប្រឈមនឹងការដាច់ចរន្តអគ្គិសនី ដោយសារព្យុះទឹកកក

យោងតាមក្រុមហ៊ុនផ្គត់ផ្គង់អគ្គិសនី Hydro One ប្រជាជនកាណាដាជាង ៣០ម៉ឺននាក់បានប្រឈមមុខនឹងការដាច់ចរន្តអគ្គិសនីនៅក្នុងផ្នែកខ្លះនៃខេត្ត Ontario ខណៈដែលព្យុះទឹកកកបានវាយលុកតំបន់នេះកាលពីចុងសប្តាហ៍មុន។

សារព័ត៌មាន CNN បាន​ចុះ​ផ្សាយ​នៅថ្ងៃទី៣១ខែមីនានេះ​ថា នាយកដ្ឋាន​បរិស្ថាន និង​បម្រែបម្រួល​អាកាស​ធាតុ​កាណាដា បានចេញការព្រមានអំពីព្យុះរដូវរងានៅក្នុងទីក្រុង Ottawa ផ្នែកខ្លះនៃខេត្តQuebec និងខេត្ត Ontario ជាមួយនឹងហានិភ័យនៃការធ្លាក់ព្រិលលាយឡំជាមួយដុំទឹកកកដែលរំពឹងថានឹងបន្តរហូតដល់ព្រឹកថ្ងៃចន្ទនេះនៅក្នុងតំបន់មួយចំនួន។

ក្រុមហ៊ុន Hydro One បានប្រកាសនៅលើគេហទំព័ររបស់ខ្លួនថា អតិថិជនជាង ៣៥០ ០០០នាក់បានរងផលប៉ះពាល់គិតត្រឹមរសៀលថ្ងៃអាទិត្យ ខណៈ​អគ្គិសនីត្រូវបានរំពឹងថានឹងស្ដារឡើងវិញនៅថ្ងៃទី១​ខែមេសា។ ប្រជាជនដែលគ្មានអគ្គិសនីប្រើប្រាស់ច្រើនជាងគេគឺនៅក្នុងទីក្រុង Barrie ខេត្ត Ontario ។ ឯទីក្រុង Orillia ក្នុងខេត្ត Ontario ដូចគ្នាបានប្រកាសដាក់ទីក្រុងក្នុងភាពអាសន្ន ដោយសារព្យុះនេះនៅតែបន្តបណ្តាលឱ្យដាច់ចរន្តអគ្គិសនី ស្ថានភាពផ្លូវមានគ្រោះថ្នាក់ ដើមឈើ និងបង្គោលភ្លើងដួលរលំ និងបណ្ដាលឲ្យមានការខូចខាតហេដ្ឋារចនាសម្ព័ន្ធសាធារណៈ និងឯកជន និងបានធ្វើឲ្យផ្លូវមួយចំនួនត្រូវបានបិទផងដែរ។

នាយកដ្ឋាន​បរិស្ថាន និង​បម្រែបម្រួល​អាកាស​ធាតុ​កាណាដា ក៏បានជូនដំណឹងដែរថា ភ្លៀង​ទឹកកក​ទំហំ​​​​ចន្លោះពី ៥ ទៅ ១០មិល្លិម៉ែត្រ ត្រូវបានគេរំពឹងថានឹងធ្លាក់ក្នុងរយៈពេលប្រាំបីម៉ោងខាង​មុខ ហើយបានព្រមានថា ព្យុះ​ភ្លៀង​ទឹកកក​នេះអាចបង្កការខូចខាតដល់ដើមឈើ ការដាច់ចរន្តអគ្គិសនីក្នុងតំបន់ និងការរំខានដល់ការដឹកជញ្ជូនថែមទៀត៕

អត្ថបទ៖ ប៊ុន សុភាព