កម្មករ និយោជិតជិត ៤ ពាន់នាក់ ធ្វើតេស្តរហ័សក្នុងតំបន់សេដ្ឋកិច្ចពិសេស ខេត្តកោះកុង

កម្មករ និយោជិត ថៅកែរោងចក្រ សហគ្រាស ជិត ៤.០០០នាក់ នៅ ៤ ទីតាំងផ្សេងគ្នាស្ថិតក្នុងតំបន់សេដ្ឋកិច្ចពិសេសខេត្តកោះកុង បានចូលរួមធ្វើតេស្តរហ័សរកមេរោគកូវីដ-១៩ តាមសេចក្តីណែនាំរបស់សម្តេចតេជោ និងក្រសួងការងារ។

លោក យក់ សង្វាត ប្រធានមន្ទីរការងារ និងបណ្តុះបណ្តាលវិជ្ជាជីវៈខេត្តកោះកុង ថ្លែងនៅថ្ងៃទី១១ ខែតុលានេះថា រោងចក្រសហគ្រាសដែលអនុវត្តការធ្វើតេស្តរហ័សនៅថ្ងៃនេះ មានរោងចក្រមីកាស្សា រោងចក្រហាណា និងរោងចក្រ៩៩ ស្មើនឹងជាង ៣០០នាក់។ ចំណែករោងចក្រយ៉ាស្សាគិ ផលិតបណ្តុំគ្រឿងអគ្គិសនី មានមនុស្ស ៣.១០០ នាក់បានធ្វើតេស្តរួចរាល់ហើយ ដោយលទ្ធផលរកឃើញពុំកម្មករ និយោជិតណាមានវិជ្ជមានជំងឺកូវីដ-១៩ ទេ។

លោក យក់ សង្វាត បានឱ្យដឹងបន្ថែមថា ក្រុមហ៊ុនរោងចក្ រKKN នៅមិនទាន់បានអនុវត្តវិធានការធ្វើតេស្តរហ័សនេះនៅឡើយទេ ដោយតម្រូវកម្មករ និយោជិកចូលបម្រើការងារតែម្តង។ ទោះយ៉ាងណា វិធានការនេះចាំបាច់តែអនុវត្តព្រមគ្នា ដើម្បីធានាសុវត្ថិភាពមនុស្សនៅកន្លែងការងារ។

តំណាងរដ្ឋបាលរោងចក្ រKKN និយាយថា លោកកំពុងធ្វើដំណើរតាមផ្លូវពុំទាន់ដល់កន្លែងធ្វើការនោះទេ ដើម្បីសុំគោលការណ៍អ្នកគ្រប់គ្រងរោងចក្រថា ត្រូវធ្វើតេស្តដល់កម្មករ និយោជិត ឬយ៉ាងណា។

ទាក់ទិនបញ្ហានេះដែរ លោកវេជ្ជបណ្ឌិត ទៅ ម៉ឹង ប្រធានមន្ទីរសុខាភិបាលខេត្តកោះកុង បញ្ជាក់ថា ការធ្វើតេស្តរហ័សនេះពុំទាន់យកបានទេ ពោលគឺលុះត្រាសំណាកកម្មករ និយោជិត ដែលរកឃើញវិជ្ជមានទៅពិនិត្យលម្អិតបន្តនៅវិទ្យាស្ថានប៉ាស្ទ័រ ទើបយកជាផ្លូវការបាន។

លោកវេជ្ជបណ្ឌិត ទៅ ម៉ឹង មានប្រសាសន៍បន្តថា មកទល់ម៉ោងនេះ លោកនៅមិនទាន់ទទួលបានព័ត៌មានជាក់លាក់ពីក្រុមគ្រូពេទ្យប្រចាំការនៅតាមរោចក្រនៅឡើយពីលទ្ធផលធ្វើតេស្តកម្មករ និយោជិតក្នុងតំបន់សេដ្ឋកិច្ចពិសេសខេត្តកោះកុង។

វិធានការត្រៀមបង្ការទុកជាមុន ក្រុមកម្មករ និយោជិតណាដែលសង្ស័យផ្ទុកមេរោគកូវីដ-១៩ ត្រូវបញ្ចូនទៅអគារមណ្ឌលចត្តាឡីស័ក រង់ចាំលទ្ធផលតេស្តមកពីរាជធានីភ្នំពេញ មុននឹងបញ្ចូនទៅអគារព្យាបាលអ្នកជំងឺ៕

អត្តបទ៖ សិរីវឌ្ឍនៈ