អ្នក​ភូមិ ប្រទះ​​សាកសពនៅក្រោម​​ដើម​ត្នោត​ មាន​ស្នាម​ចាក់ជាច្រើនកាំបិត

កណ្តាល៖ ប្រជាពលរដ្ឋបានប្រទះឃើញសាកសពបុរសម្នាក់ដែលជនមិនស្គាល់មុខ សម្លាប់ចាក់ជាច្រើនកន្លែង
រួចបានយកមកទម្លាក់ចោល ក្រោមដើមត្នោតក្នុងស្រុកមុខកំពូល ដែលសមត្ថកិច្ចដាក់ការសង្ស័យជាករណីឃាតកម្ម។

សាក្សីនៅក្បែរកន្លែងកើតហេតុបានអោយដឹងថា នៅព្រឹកថ្ងៃទី១៤ ខែតុលា ឆ្នាំ២០២១ នៅចំណុចក្រោមដើមត្នោត ភូមិអំពិលទឹក ឃុំសំបួរមាស ស្រុកមុខកំពូល ខេត្តកណ្ដាល ពេល​អ្នក​ភូមិ​ធ្វើដំណើរឆ្លងកាត់បានប្រទះឃើញសាកសពអង្គុយ​អោន​មុខចុះ ក្នុងស្ថានភាពឈាមជាប់អាវ និងមានស្នាមចាក់ជាច្រើនកន្លែង ទើបបាន​រាយការណ៌ជូនសមត្ថកិច្ចប៉ុស្តិរដ្ឋបាលតែម្តង។

ក្រោយពីមានហេតុការណ៍ កម្លាំងនគរបាលខេត្តកណ្ដាល និងនគរបាលស្រុកមុខកំពូល បានចុះពិនិត្យដល់កន្លែងទើបដឹងថា ជនរងគ្រោះជាជនជាតិវៀតណាម។

ជនរងគ្រោះមានឈ្មោះ ង្វៀង ដាំងជុង ភេទប្រុស អាយុ៤០ឆ្នាំ ជនជាតិវៀតណាម ទីលំនៅឃុំព្រែកខ្សាយ ខ ស្រុកពាមរក៍ ខេត្តព្រៃវែង។ ប្រភពព័ត៌មានពីសមត្ថកិច្ចបានបង្ហើបថា  ករណីនេះទំនងជាចាក់សម្លាប់នៅក្នុងទឹកដីខេត្តផ្សេង ហើយ​យកសព​មកទម្លាក់​ចោល​ក្នុងខេត្តកណ្ដាល។

បច្ចុប្បន្នសមត្ថកិច្ចជំនាញកំពុងពិនិត្យនិងធ្វើកោសល្យវិនិច្ឆ័យ ដើម្បីកសាងសំណុំរឿងស្រាវជ្រាវរកជនសង្ស័យយកមកចាត់ការតាមផ្លូវច្បាប់៕

អត្ថបទ៖ ឆៃ យ៉ា