ព័ត៌មានអន្ដរជាតិ

ណេ តាន់យ៉ាហ៊ូ សន្យាឲ្យមេដឹកនាំហាម៉ាសរួចជីវិតដោយសុវត្ថិភាព ក្រោមលក្ខខណ្ឌនៃការរំសាយអាវុធ

បានផុស

១ year មុន

នៅ

ថ្ងៃចន្ទ ៣១ មីនា ២០២៥

ដោយ

Chheang

នាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ បានដាក់ចេញនូវសំណើមួយ ដែលអនុញ្ញាតឲ្យមេដឹកនាំក្រុមហាម៉ាសចាកចេញពីតំបន់ហ្គាហ្សាដោយសុវត្ថិភាព ប៉ុន្តែលុះត្រាតែក្រុមសកម្មប្រយុទ្ធនេះយល់ព្រមទម្លាក់អាវុធចុះចាញ់។

លោក បេនចាមីន ណេតាន់យ៉ាហ៊ូ (រូបថត៖ Reuters)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងនៅពេលចាប់ផ្តើមកិច្ចប្រជុំគណៈរដ្ឋមន្ត្រីប្រចាំសប្តាហ៍កាលពីថ្ងៃអាទិត្យទី៣០ខែមីនា លោក ណេតាន់យ៉ាហ៊ូ បាននិយាយថា អ៊ីស្រាអែលបានត្រៀមខ្លួនរួចជាស្រេច ដើម្បីពិភាក្សាអំពីដំណោះស្រាយចុងក្រោយមួយ ដែល«មេដឹកនាំក្រុមហាម៉ាស នឹងត្រូវបានអនុញ្ញាតឲ្យចាកចេញ យើងនឹងធានាបាននូវសន្តិសុខទូទៅនៅក្នុងតំបន់ហ្គាហ្សាស្ទ្រីប ហើយយើងនឹងអនុញ្ញាតឲ្យអនុវត្តផែនការលោក ត្រាំ (ប្រធានាធិបតីអាមេរិក) សម្រាប់អន្តោប្រវេសន៍ដោយស្ម័គ្រចិត្ត»។

រដ្ឋាភិបាលអ៊ីស្រាអែល បានទទូចជាយូរមកហើយថា ក្រុមហាម៉ាសដែលជាអង្គការភេរវជនដែលមានការគាំទ្រដោយអ៊ីរ៉ង់ ត្រូវតែរំសាយអាវុធដើម្បីឲ្យកិច្ចប្រឹងប្រែងសន្តិភាពសម្រេចទៅមុខបាន។ ទោះជាយ៉ាងណាក៏ដោយ លោក ណេតាន់យ៉ាហ៊ូ បានលើកឡើងថា សម្ពាធយោធាលើក្រុមហាម៉ាសកំពុងបង្ហាញប្រសិទ្ធភាព ដោយធ្វើឲ្យសមត្ថភាពយោធា និងអភិបាលកិច្ចរបស់ក្រុមសកម្មប្រយុទ្ធចុះខ្សោយ ខណៈបង្កើតលក្ខខណ្ឌសម្រាប់ការដោះលែងចំណាប់ខ្មាំងអ៊ីស្រាអែល។

មេដឹកនាំអ៊ីស្រាអែល បានបញ្ជាក់ទៀតថា គណៈរដ្ឋមន្ត្រីសន្តិសុខបានសម្រេចចិត្តទាំងយប់ ដើម្បីបង្កើនសម្ពាធយោធា បើទោះជាមានការរិះគន់ខ្លាំងពីមជ្ឈដ្ឋានខាងក្រៅក៏ដោយ។

ដោយបដិសេធការចោទប្រកាន់ថារដ្ឋាភិបាលមិនផ្តល់អាទិភាពដល់ការវិលត្រឡប់របស់ចំណាប់ខ្មាំង លោក ណេតាន់យ៉ាហ៊ូ បាននិយាយថា៖ «យើងកំពុងធ្វើការ និងមានបំណងនាំយកពួកគេមកវិញ។ រហូតមកដល់ពេលនេះ ការរួមបញ្ចូលគ្នានៃសម្ពាធយោធា និងនយោបាយ គឺជាកត្តាតែមួយគត់ដែលធានាការដោះលែងចំណាប់ខ្មាំង»។

កងកម្លាំងអ៊ីស្រាអែល បានបន្តការវាយប្រហារនៅតំបន់ហ្កាហ្សាវិញចាប់តាំងពីថ្ងៃទី១៨ខែមីនា ដោយបានបញ្ចប់បទឈប់បាញ់ជាមួយក្រុមហាម៉ាសដែលត្រូវបានអនុម័តកាលពីថ្ងៃទី១៩ខែមករា។

ស្ថានការណ៍នៅហ្គាហ្សាបានបង្កការព្រួយបារម្ភជាអន្តរជាតិ ដោយមេដឹកនាំពិភពលោកបានអំពាវនាវឲ្យភាគីទាំងពីរចូលរួមក្នុងការសន្ទនា។ យ៉ាងណាមិញ វិបត្តិមនុស្សធម៌នៅតែបន្តកាន់តែអាក្រក់ទៅៗ ដោយជនស៊ីវិលរាប់ម៉ឺននាក់កំពុងរងគ្រោះព្រោះការបាញ់បោះគ្នារវាងអ៊ីស្រាអែល-ហាម៉ាស។ អ៊ីស្រាអែលបានអះអាងថា ខ្លួននឹងមិនបញ្ឈប់ប្រតិបត្តិការយោធាឡើយ រហូតទាល់តែក្រុមហាម៉ាសត្រូវបានកម្ចាត់ចោល ខណៈក្រុមហាម៉ាសវិញបានប្តេជ្ញាបន្តការតស៊ូប្រឆាំងនឹងកម្លាំងអ៊ីស្រាអែលដល់ទីបំផុត៕

ដោយ៖ ឈាង