សម្តេចតេជោ ហ៊ុន សែន អំពាវនាវឲ្យវិនិយោគិនអាមេរិក ពិចារណាមកវិនិយោគនៅកម្ពុជា

សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា នៅព្រឹកថ្ងៃទី១៩ ខែតុលា​ ឆ្នាំ២០២១នេះ បានទទួលជួបពិភាក្សាការងារជាមួយលោក Ted Osius (ថេត អូសៀស) ប្រធានគណ:កម្មាធិការក្រុមប្រឹក្សាធុរកិច្ចអាមេរិក-អាស៊ាន តាមប្រព័ន្ធវីដេអូ។ ក្នុងជំនួបនោះសម្តេចតេជោ ហ៊ុន សែន បានអំពាវនាវឲ្យវិនិយោគិនអាមេរិក ពិចារណាមកធ្វើការវិនិយោគនៅកម្ពុជាផងដែរ។

លោក អ៊ាង សុផ្លែត ជំនួយការផ្ទាល់សម្តេចតេជោ ហ៊ុន សែន បានមានប្រសាសន៍ឲ្យដឹងក្រោយជំនួបនោះថា លោក Ted Osius (ថេត អូសៀស) ប្រធាន និងជាអគ្គនាយកប្រតិបត្តិ របស់ក្រុមប្រឹក្សាធុរកិច្ចអាមេរិកអាស៊ាន បានសាទរ​ចំពោះសម្តេចតេជោ ហ៊ុន សែន ដែលបានចាត់វិធានការទប់ស្កាត់ ការរីករាតត្បាតនៃជំងឺកូវីដ-១៩ បានជោគជ័យយ៉ាងត្រចះត្រចង់។ លោក ថេត អូសៀស បានចំណាប់អារម្មណ៍ របស់ក្រុមប្រឹក្សាធុរកិច្ចអាមេរិកអាស៊ានដែលមានបំណងចង់វិនិយោគនៅកម្ពុជា លើវិស័យថាមពល, វិស័យឧស្សាហកម្ម, វិស័យសុខាភិបាល, វិស័យបច្ចេកវិទ្យា, វិស័យហិរញ្ញវត្ថុ និងវិស័យនាំចេញនាំចូល។

ក្នុងជំនួបដដែលនេះលោក ថេត អូសៀស​ បានជម្រាបជូនសម្ដេចតេជោ ហ៊ុន សែន ថា ក្រុមប្រឹក្សាធុរកិច្ចអាមេរិក-អាស៊ាន នឹងគាំទ្រកម្ពុជា នៅពេលដែលកម្ពុជាទទួលធ្វើជាប្រធានអាស៊ាន នាពេលខាងមុខ និងជួយដល់កម្ពុជា​លើវិស័យសេដ្ឋកិច្ច នៅក្នុងអំឡុងពេលនៃការរាតត្បាតកូវីដ-១៩ ក៏ដូចជានឹងជួយដល់កម្ពុជា ក្នុងការកសាងសមត្ថភាព និងសន្តិសុខថាមពល ផងដែរ។

ជាការឆ្លើយតបសម្ដេចតេជោ ក៏បានអបអរសាទរជូនចំពោះលោក ថេត អូសៀស ដែលបានត្រូវតែងតាំងជាប្រធាននិងជាអគ្គនាយកប្រតិបត្តិ របស់ក្រុមប្រឹក្សាធុរកិច្ចអាមេរិក-អាស៊ាន។ សម្ដេចតេជោ ក៏បានថ្លែងអំណរគុណចំពោះសហរដ្ឋ អាមេរិកផងដែរ ដែលបានផ្ដល់វ៉ាក់សាំងដល់កម្ពុជា ហើយសម្ដេចបានសម្ដែងនូវសេចក្តីរីករាយ ដែលក្រុមប្រឹក្សាធុរកិច្ចអាមេរិក-អាស៊ាន បានទទួលស្គាល់ភាពជឿនលឿនរបស់កម្ពុជា ក្នុងការចាក់វ៉ាក់សាំងជូនដល់ប្រជាពលរដ្ឋ និងការទទួលបានផ្លែផ្កា ជាវិជ្ជមាន។

សម្ដេចតេជោ បានជម្រាបជូនក្រុមប្រឹក្សាធុរកិច្ចអាមេរិក-អាស៊ាន នូវផែនការចូលរួមដោះស្រាយបញ្ហាប្រែប្រួលអាកាសធាតុរបស់កម្ពុជា ក៏ដូចជាវិធានការឆ្ពោះទៅមុខរបស់កម្ពុជា ដែលរួមមាន៖ បន្តគ្រប់គ្រងជំងឺកូវីដ-១៩, ជំរុញការកែទម្រង់ផ្នែកធុរកិច្ច ឲ្យបានកាន់តែប្រសើរដើម្បី, ទាក់ទាញអ្នកវិនិយោគឲ្យបានកាន់តែច្រើន, ជំរុញការកែទម្រង់លើគ្រប់វិស័យ និងការបង្កើតសកម្មភាពធុរកិច្ច និងលើកទឹកចិត្តឲ្យវិស័យឯកជន ចូលរួមដើម្បីជំរុញសេដ្ឋកិច្ចកម្ពុជា។

ជាទីបញ្ចប់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ក៏បានជម្រាបជូនក្រុមប្រឹក្សាធុរកិច្ច នូវសក្កានុពលនៃការវិនិយោគនៅកម្ពុជា ព្រមទាំងអំពាវនាវឲ្យក្រុមប្រឹក្សាធុរកិច្ចអាមេរិក-អាស៊ាន ពិចារណាធ្វើការវិនិយោគនៅកម្ពុជា៕

អត្ថបទ៖ ណារី