Connect with us

ព័ត៌មានជាតិ

អ្នកណាខ្លះ មានតួនាទីស្ដារល្បែងប្រជាប្រិយខ្មែរ​ឱ្យ​រស់​បន្ត?

បានផុស

នៅ

“ល្បែងប្រជាប្រិយ” គេច្រើនតែគិតរួមតូចមកសំដៅតែល្បែងលេងក្នុងឱកាសចូលឆ្នាំខ្មែរ ដោយរាប់ចាំមាត់ដូចជា ចោលឈូង ទាញព្រ័ត្រ លាក់កន្សែង វាយក្អម លោតបាវ ជាដើម។ ធាតុពិតមានល្បែងច្រើនជាងនេះ ហើយក៏ពុំមែនលែងតែក្នុងឱកាសចូលឆ្នាំដែរ ប៉ុន្តែល្បែងប្រជាប្រិយទាំងនោះហាក់ថមថយយកមកលេងកម្សាន្តពីយុវជនសម័យថ្មី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ហ៊ួន សាវង ជាអនុប្រធាននាយកដ្ឋានអភិវឌ្ឍន៍វប្បធម៌ នៃក្រសួងវប្បធម៌ និងវិចិត្រសិល្បៈមាន​ប្រសាសន៍​ប្រាប់ “កម្ពុជាថ្មី” ថា ការស្តារប្រជាប្រិយភាពល្បែងប្រជាប្រិយខ្មែរឡើងវិញ ពុំមែនជាភារកិច្ចដាច់មុខរបស់ក្រសួង មន្ទីរណាឡើយ។ ពោលគឺពលរដ្ឋម្នាក់ៗអាចចូលរួមទាំងអស់គ្នាដ្បិតល្បែងប្រជាប្រិយគឺជាសម្បត្តិរួម។

លោក ហ៊ួន សាវង មានប្រសាសន៍បន្ថែមថា៖ “ឧទាហរណ៍រាល់ពេលចូលឆ្នាំ តាមសាលារៀន តាមផ្សារទំនើប តាមក្រសួងមន្ទីរ តាមស្ថាប័ន អង្គការ ត្រូវដឹកនាំលេងឱ្យផុលផុសដូចការត្រាប់តាមល្បែង ឬ វប្បធម៌បរទេសដូចជា បុណ្យណូអែល ឬហាឡូវីន។ ខ្ញុំយល់ថា នោះជាដំណោះស្រាយមួយ”។

ទាក់ទងទៅនឹងករណីល្បែងប្រជាប្រិយខ្មែរត្រូវបានធ្លាក់ការគាំទ្រ ទន្ទឹមពេលមានការនិយមល្បែងស៊ីសងទៅវិញនោះ លោក ហ៊ួន សាវង លើកឡើងថា លោកពុំអាចដឹងច្បាស់អំពីមូលហេតុនៃការធ្លាក់ចុះប្រជាប្រិយភាពល្បែងប្រជាប្រិយទាំងនោះឡើយ។

លោក ហ៊ួន សាវង មានប្រសាសន៍បន្តថា៖ “ប៉ុន្តែខ្ញុំកាត់ស្មាន ដែលអាចខុសអាចត្រូវថា ដោយសារ កង្វះការយល់ដឹងរបស់មនុស្សពីមួយជំនាន់ទៅមួយជំនាន់។ មនុស្សចាស់មិននាំលេង ហើយក្មេងៗចូលចិត្តភាពផ្ទាល់ខ្លួន ការកម្សាន្តបែបម្នាក់ៗ វីវក់នឹងល្បែងអេឡិចត្រូនិចតាមទូរសព្ទជាអាទិ…”។

អនុប្រធាននាយកដ្ឋានអភិវឌ្ឍន៍វប្បធម៌ នៃក្រសួងវប្បធម៌ និងវិចិត្រសិល្បៈ រូបនេះមានប្រសាសន៍ថា៖ “គួរនាំគ្នាយកចិត្តទុកដាក់នឹងវប្បធម៌ប្រពៃណីជាតិឱ្យបានកាន់តែខ្លាំងក្លាឡើងវិញ នោះទើបស័ក្តិសមជាអ្នកបន្តវេន។ ការបណ្តែត​បណ្តោយ​ឱ្យ​អ្វីៗដែលយើងធ្លាប់មានឱ្យវិនាសបាត់បង់ហិនហោចទៅ នោះជាកំហុសដ៏ធំរបស់យើងចំពោះជាតិ”។

គួររំលឹកថា រដ្ឋាភិបាល និងក្រសួងវប្បធម៌ និងវិចិត្រសិល្បៈបានគាស់កកាយឡើងវិញនូវល្បែងប្រជាប្រិយខ្មែរជាច្រើនប្រភេទនៅក្នុងព្រឹត្តិការណ៍អង្គរសង្ក្រាន្តកន្លងមកជាបន្តបន្ទាប់។ ក្នុងឆ្នាំ១៩៦៤ ក្រុមជំនុំទំនៀមទម្លាប់ខ្មែរបានប្រមូលចងក្រង​ល្បែងដែលខ្មែរធ្លាប់លេងបានមួយចំនួនតូចមានដូចជា ស្តេចចង់ ចោលឈូង ចាប់កូនខ្លែង លោតអន្ទាក់ លាក់​កន្សែង បោះអង្គញ់ គោះត្រឡោក ទាញព្រ័ត្រ ទាត់សី រាវបង្កង លាក់ធ្យូង បាយខុំ ចត្រង្គ (អុក) ឱបត្រឡាច គ្របមាន់ បិទពួន វាយកូនគោល​ជាដើម។

ការលេងល្បែងនីមួយៗមានគុណសម្បត្តិ គឺត្រូវការមានគ្នាច្រើន ដែលនាំឱ្យយើងមានទំនាក់ទំនងល្អ មានមិត្តភាព មានអនុស្សាវរីយ៍។ ល្បែងខ្លះនាំឱ្យយើងអ្នកលេងត្រូវឈ្លាសវៃ រហ័សរហួន ពូកែគិត… ល្បែងខ្លះប្រៀបបាននឹងកីឡាប្រពៃណី ហើយល្បែងខ្លះ នៅស្រុកមួយចំនួនលេងក្នុងកិច្ចពិធីជាទំនៀមជាដើម។

គួរបញ្ជាក់ថា មិនមានឯកសារណាបញ្ជាក់ថា ល្បែងប្រជាប្រិយទាំងនោះចាប់កំណើត សតវត្សណាទេ ប៉ុន្តែគេគួរយល់ថា “ល្បែងប្រជាប្រិយ” កើតពេលមានមនុស្ស ដ្បិតវាកើតដោយសារមនុស្សលើកមកលេងកម្សាន្ត ឬលេងក្នុងកិច្ចណាមួយ។ ល្បែងខ្លះគេឃើញមានឆ្លាក់នៅលើចម្លាក់ប្រាសាទដែរ ដូចជាល្បែងវាយកូនគោល ល្បែងបោកចំបាប់ ល្បែងចត្រង្គ (អុក) ជាដើម៕

អត្ថបទ៖ ច័ន្ទ វីរៈ

Helistar Cambodia - Helicopter Charter Services
Sokimex Investment Group

ចុច Like Facebook កម្ពុជាថ្មី

ព័ត៌មានជាតិ១៣ ម៉ោង មុន

អ្នកនាំពាក្យទទូចដល់អ្នកប្រើបណ្តាញសង្គមបញ្ឈប់ចែកចាយជាបន្ទាន់ និងលុបចេញរាល់មាតិកាដែលពាក់ព័ន្ធឃាតកម្មឃោរឃៅ

សន្តិសុខសង្គម១៧ ម៉ោង មុន

ស្ដ្រីបង្ហោះវីដេអូ ភ្ជាប់សំឡេងផ្ទុះអាវុធ ត្រូវបាននគរបាលខេត្តសៀមរាប ហៅមកសួរនាំ

សេដ្ឋកិច្ច១០ ម៉ោង មុន

មន្ត្រីគយ នគរបាល ចុះផ្សព្វផ្សាយ ភាពខុសគ្នារវាងទំនិញមានពន្ធ និងទំនិញគេចពន្ធ

សន្តិសុខសង្គម៨ ម៉ោង មុន

ជនល្មើស ស្រី ស៊ីណា ជាប់សំណុំរឿង២ អាចជាប់ពន្ធនាគារ ពី ២០ ទៅ ៣០ ឆ្នាំ

ព័ត៌មានជាតិ១០ ម៉ោង មុន

តុលាការ សន្យាចាត់វិធានការច្បាប់ដោយម៉ឺងម៉ាត់លើសំណុំរឿងឃាតកម្មបង្កឡើងដោយឈ្មោះ ស្រី ស៊ីណា

Sokha Hotels

ព័ត៌មានពេញនិយម