លោក ហ៊ុន ម៉ានី​៖ ​សន្តិភាពរកបានដោយលំបាក តែងាយនឹងបាត់បង់

ក្នុងពិធីបិទមហាសន្និបាតលើកទី០១ ​ស្ដីពីលទ្ធផលការងារឆ្នាំ២០២១ ​ផ្សព្វផ្សាយទិសដៅការងារ​ និង​ផែនការសកម្មភាពឆ្នាំ២០២២-២០២៣ របស់វេទិកាសន្តិភាពកម្ពុជា នារសៀលថ្ងៃទី០៧ ខែកក្កដា ឆ្នាំ២០២២ នៅក្នុងខេត្តសៀមរាប លោក ហ៊ុន ម៉ានី ប្រធានគណៈកម្មការទី០៧ នៃរដ្ឋសភា និងជាប្រធានសហភាពសហព័ន្ធយុវជនកម្ពុជាបានមានប្រសាសន៍ថា សន្តិភាពរកបាន​ដោយលំ​បាក តែងាយនឹងបាត់បង់។

​ការថ្លែងបែបនេះក្នុងពេលដែលលោកបានចែករំលែកនូវគុណតម្លៃនៃសុខសន្តិភាព​ជូនអ្នក​ចូល​រួមពិធីបិទមហាសន្និបាតលើកទី០១ របស់វេទិកាសន្តិភាពកម្ពុជា។ ក្នុ្ងងនោះលោក ហ៊ុន ម៉ានី បានថ្លែងថា សន្តិភាពគឺជាមូលដ្ឋានគ្រឹះដែលបានប្រែក្លាយប្រទេសដែលធ្លាប់តែរងទុក្ខវេទនា បែកបាក់គ្នា ឈានមកមានការឯកភាពគ្នា និងមានសុខដុមរមនីយកម្មគ្នាក្នុងភាពជាគ្រួសារខ្មែរតែមួយ។ ហើយថា យើងបានបន្តឲ្យមានគំនិតរួម ទស្សនៈជាតិរួម និងមធ្យោបាយរួម ដើម្បីដើរ​ស្របគ្នាឆ្ពោះទៅការរីកចម្រើនប្រទេសជាតិជាបន្តទៀត។

​ក្រៅពីការចែករំលែកនូវចំណុចសំខាន់ៗខាងលើ លោក ហ៊ុន ម៉ានី ក៏បានគូសបញ្ជាក់បន្ថែមថា​ “កម្ពុជាបានប្រែ​មុខប្រែមាត់ជាបន្តបន្ទាប់លើឆាកអន្តរជាតិ ព្រោះកម្ពុជាដែលគេធ្លាប់​ស្គាល់ថាជាប្រទេស​ដែលស្ថិត​ក្នុង​ភ្លើងសង្គ្រាម ក្លាយជាប្រទេសដែលមានសុខសន្តិភាពពេញលេញ និងជាប្រទេសដែល​មាន​កិត្តិយស ដើម្បីចូលរួមដោះស្រាយបញ្ហាអន្តរជាតិស្មើរមុខស្មើរមាត់ដូចគ្នា”។​

​សូមជម្រាបថា ​អង្គការវេទិកាសន្តិភាពកម្ពុជា ត្រូវបានបង្កើតឡើង ​និងប្រកាសជាផ្លូវការនៅថ្ងៃទី២៣​ ខែកុម្ភៈ ឆ្នាំ២០២១ ​ដោយក្រសួងមហាផ្ទៃក្នុងគោលបំណងចូលរួមជាមួយរាជរដ្ឋាភិបាល ដើម្បី​ផ្សព្វ​ផ្សាយដល់ សិស្ស និស្សិត និងប្រជាពលរដ្ឋឱ្យយល់កាន់តែច្បាស់ពីគុណតម្លៃ និងគុណ​ប្រយោជន៍​នានាដែលទទួលបានមកពីសន្តិភាព៕

អត្ថបទ៖ កុសល