ព័ត៌មានជាតិ

ពិធីអុំទូក នៅក្នុងខេត្តកំពង់ធំ នៅរសៀលថ្ងៃទី៤ បានល្អប្រសើរ និងមានប្រជាពលរដ្ឋចូលរួមច្រើនកុះករ

បានផុស

២ years មុន

នៅ

ថ្ងៃសុក្រ ៤ វិច្ឆិកា ២០២២

ដោយ

កំពង់ធំ ៖ នៅរសៀលថ្ងៃទី៤ ខែវិច្ឆិកា ឆ្នាំ២០២២, អាជ្ញាធរខេត្តកំពង់ធំ រៀបចំកម្មវិធីអុំទូកថ្នាក់ខេត្ត ក្រោមអធិបតីភាព លោក ងួន រតនៈ អភិបាលខេត្តកំពង់ធំ និងលោក ឈុន ឈន់ ប្រធានក្រុមប្រឹក្សាខេត្ត។ ក្នុងឱកាសនោះដែរ លោក ងួន រតនៈ អភិបាលខេត្តកំពង់ធំ លើកឡើងថា ក្រោមការដឹកនាំរបស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជាដែលតែងតែទទួលបានការទុកចិត្ត និងគាំទ្រយ៉ាងច្រើនលើសលប់ពីប្រជាពលរដ្ឋ។ ពិធីអុំទូកថ្ងៃនេះ មិនមែនជាការចង់ឈ្នះ ចង់ចាញ់ យករង្វាន់ពេកនោះទេ ប៉ុន្តែជាការចូលរួមថែរក្សា វប្បធម៌ប្រពៃណីជាតិ ដ៏ល្អរបស់យើងឲ្យគង់វង្សស្ថិតស្ថេរជានិច្ចនិរន្តរ៍។ ដូចដែលយើងទាំង អស់គ្នាបានដឹងមកហើយ ពិធីបុណ្យអុំទូក បណ្ដែតប្រទីប សំពះព្រះខែ និងអកអំបុក ជាប្រពៃណី ទំនៀមទម្លាប់ខ្មែរដែលជាមរតកវប្បធម៌ដូនតាបានបន្សល់ទុកតាំងពីសម័យបុរាណយូរលង់ណាស់មកហើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សព្វថ្ងៃពិធីបុណ្យដ៏មានសារៈសំខាន់នេះ ត្រូវបានពលរដ្ឋប្រតិបត្តិបន្តរៀងរាល់ឆ្នាំ និងចាត់ ទុកថាជាបុណ្យប្រពៃណីវប្បធម៌ជាតិដ៏ធំមួយ ក្នុងចំណោមពិធីបុណ្យសំខាន់ៗជាច្រើនទៀត។

លោកអភិបាលខេត្តបន្តថា តាមទំនៀមទម្លាប់ខ្មែរ ពិធីបុណ្យអុំទូកតែងតែប្រព្រឹត្តទៅនៅថ្ងៃពេញបូណ៌មី ខែកត្តិក ស្របទៅ នឹងរដូវទឹកសម្រក បន្ទាប់ពីទឹកជំនន់ជនលិចក្នុងរយៈពេលប៉ុន្មានខែកន្លងទៅ។

លោកអភិបាលខេត្តកំពង់ធំ សំណូមពរដល់កីឡាករ កីឡាការិនីចំណុះទូកទាំងអស់ សូមយកចិត្តទុកដាក់គោរពតាមបទបញ្ជាផ្ទៃក្នុងរបស់គណៈកម្មការបច្ចេកទេស ក្នុងន័យចូលរួមចំណែក ធ្វើឲ្យពិធីអុំទូករបស់យើងទទួលបានជោគជ័យ ភាពថ្លៃថ្នូរ ថែរក្សាបាននូវប្រពៃណីដ៏ល្អផូរផង់របស់ ជាតិយើង និងសូមសម្តែងនូវការថ្លែងអំណរគុណយ៉ាងជ្រាលជ្រៅចំពោះ លោក លោកជំទាវ លោកឧកញ៉ា លោក លោកស្រី មន្ត្រីរាជការ កងកម្លាំងប្រដាប់អាវុធ ប្រជាពលរដ្ឋ ក្រុមហ៊ុន អាជីវករ អង្គការសង្គមស៊ីវិល ព្រមទាំងសប្បុរសជនទាំងអស់ដែលបានជួយឧបត្ថម្ភគាំទ្រទាំងស្មារតី សម្ភារៈ និងថវិកា រួមចំណែកជាមួយយើងខ្ញុំ ក្នុងការរៀបចំពិធីនេះឡើង និងសូមគោរពជូនពរសូមមាន សុខ ភាពល្អ និងទទួលបានជោគជ័យគ្រប់ភារកិច្ច។

សូមបញ្ជាក់ផងដែរចំនួនទូកដែល ចូលរួមប្រកួតរួមមានចំនួន ៤១ទូកក្នុងនោះ ទូក « ង » មាន ចំនួន៤ ទូក ទូកខ្នាតអន្តរជាតិមានចំនួន ១៦ទូក និងទូកផ្កាចារមានចំនួន ២១ទូក និងកីឡាករកីឡាការិនីចំណុះឲ្យទូកចំនួនប្រមាណ ១,១៧៥នាក់៕

អត្ថបទ ៖ ឈាង មករា