ព័ត៌មានជាតិ

អាស៊ី ៤៤ ប្រទេស កម្ពុជាជាប្រទេសមួយអាចរកចំណូលបានពីការលក់ឥណទានកាបូនពីព្រៃឈើ

បានផុស

១ year មុន

នៅ

ថ្ងៃចន្ទ ២៣ មករា ២០២៣

ដោយ

Dy Bunnara

មន្រ្តីក្រសួងបរិស្ថានបានបញ្ជាក់ឲ្យដឹងថា កម្ពុជាជាប្រទេសមួយដែលអាចលក់ឥណទានកាបូនពីធនធានព្រៃឈើ។

លោកជួប ប៉ារីស៍ អនុរដ្ឋលេខាធិការក្រសួងបរិស្ថាន និងជាជនបង្គោលគម្រោងរ៉េដបូកជាតិបានថ្លែងក្នុងពិធីសម្ពោធអណ្តូងទឹកខ្នាតធំនិងផ្លូវ ៣ ខ្សែនៅសហគមន៍ទេសចរណ៍ជីផាតថា ការអនុវត្តគម្រោងរ៉េដបូកជាច្រើនឆ្នាំនេះបានផ្តល់ប្រយោជន៍ជាច្រើនសម្រាប់ប្រទេសកម្ពុជា ជាពិសេសការទាញបានចំណូលពីការលក់កាបូនពីក្រុមហ៊ុននៅក្រៅប្រទេស។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកថា កម្ពុជាបានចាប់ផ្តើមទាញចំណូលពីការលក់ឥណទានកាបូនពីព្រៃឈើនៅឆ្នាំ ២០១៩។

ក្នុងចំណោមប្រទេសអាស៊ី ៤៤ ប្រទេស កម្ពុជាជាប្រទេសមួយដែលអាចរកចំណូលពីការលក់ឥណទានកាបូន។ លោកថា មានប្រទេសខ្លះបានមកសុំសិក្សាបទពិសោធន៍ពីការលក់ឥណទានកាបូនពីប្រទេសកម្ពុជា។ កម្ពុជាអាចទាញចំណូលពីការលក់ឥណទានកាបូនពីព្រៃឈើ បញ្ជាក់បានន័យថាធនធានព្រៃឈើរបស់កម្ពុជាត្រូវបានការពារមិនដូចការចោទប្រកាន់នោះទេ។

លោកបានលើកពាក្យស្លោកថា ឲ្យតែមានព្រៃ មិនខ្វះការអភិវឌ្ឍ។ គម្រោងរេដបូកធ្វើឲ្យកម្ពុជាមានភាពល្បីល្បាញ ដែលបានរួមចំណែកក្នុងការការពារពីការបំពុលបរិស្ថាននិងការបម្រែបម្រួលអាកាសធាតុ។

កញ្ញា ស៊ូវណ្ណា ហ្គោនឡែត ស្ថាបនិកនិងជានាយិកាប្រតិបត្តិ នៃអង្គការសម្ព័ន្ធមិត្តសត្វព្រៃឲ្យដឹងដែរថា ចំណូលពីការលក់ឥណទានកាបូន បានយកទៅប្រើប្រាស់អភិវឌ្ឍដល់សហគមន៍មូលដ្ឋានជាក់ស្តែងដូចជាការសាងសង់អណ្តូងទឹក និងផ្លូវដែលដាក់ឲ្យប្រើប្រាស់នៅសហគមន៍ជីផាត។

កញ្ញា ហ្គោនឡែត បានបន្តថា គម្រោងរេដបូកជួរភ្នំក្រវាញខាងត្បូងមានក្រសួងបរិស្ថានជាម្ចាស់គម្រោង និងអនុវត្តដោយអង្គការសម្ព័ន្ធមិត្តសត្វព្រៃ។ គម្រោងរេដបូកបានចាប់ផ្តើមអនុវត្តតាំងពីឆ្នាំ ២០១៥ ដែលមានសហគមន៍ចំនួន ២៩ បានចូលរួម។

លោកស្រីលើកពីប្រភពថវិកាដែលបានយកមកអភិវឌ្ឍដល់សហគមន៍ គឺបានមកពីការលក់ឥណទានកាបូនទៅក្រុមហ៊ុននៅក្រៅប្រទេស។ ក្រុមហ៊ុនទាំងនោះបានបញ្ចេញឧស្ម័នកាបូនិកបំពុលបរិយាកាស ហើយដើម្បីដោះដូរឲ្យមានតុល្យភាព ក្រុមហ៊ុនទាំងនោះត្រូវរកទីតាំងសមស្របដែលមានព្រៃឈើ ដើម្បីស្រូបឧស្ម័យផ្ទះកញ្ចក់កាត់បន្ថយផលប៉ះពាល់ដល់បរិយាកាសភពផែនដី។

គិតតាំងពីការអនុវត្តគម្រោងរ៉េតបូកជួរភ្នំក្រវាញខាងត្បូង បានជួយការពារនិងរក្សាបានការបំពុលឧស្ម័នបាន ១១០ លានតោនក្នុងរយៈពេល ១០ ឆ្នាំ។ កញ្ញា ហ្គោនឡែត បានបន្ថែមថា គម្រោងរ៉េដបូកនឹងបន្តចាប់ដៃគ្នាប្រកៀកស្មាគ្នាប្រយុទ្ធប្រឆាំងការបម្រែបម្រួលអាកាសធាតុ ដោយមានការចូលរួមពីដៃគូពាក់ព័ន្ធ រួមទាំងការគាំទ្រពីសហគមន៍មូលដ្ឋាន៕