ព្រែកកំពង់បាយនឹងប្រែក្លាយទៅជាកន្លែងឆ្នេរងូតទឹកលេងកម្សាន្តទាក់ទាញទេសចរ

លោក ម៉ៅ ធនិន អភិបាលខេត្តកំពត​ គ្រោងនឹងរៀបចំប្រែក្លាយតំបន់ឆ្នេរព្រែកកំពង់បាយ​ឱ្យទៅជា​តំបន់អេកូទេសចរណ៍ធម្មជាតិងូតទឹកកម្សាន្ត សម្រាប់សម្រាក លំហែកាយបែបប្រណីត និងមាន​បរិស្ថានល្អ ដើម្បីទាក់ទាញភ្ញៀវទេសចរជាតិ និងអន្តរជាតិ។

លោកអភិបាលខេត្តកំពត ម៉ៅ ធនិន បានបញ្ជាក់ថា កន្លងមក ក្រោយពីមានការអភិវឌ្ឍ​តំបន់​ឆ្នេរព្រែកកំពង់បាយកសាងរួចរាល់ ហើយរំពឹងថា នឹងមានភ្ញៀវទេសចរជាតិ-អន្តរជាតិ មកងូតទឹក​លេង​កម្សាន្តកាន់តែកើនឡើងនៅខេត្តកំពតជាបន្ថែមទៀត។

​លោកនាយករដ្ឋបាលបានរៀបចំសណ្តាប់ធ្នាប់ សន្តិសុខសាធារណៈល្អ ប្រជាពលរដ្ឋបាន​ចូលរួម​គោរពច្បាប់ មានក្រមសីលធម៌ឱ្យមានភាពរស់នៅថៃ្លថ្នូរជាពលរដ្ឋដ៍ល្អ។

លោក ម៉ៅ ធនិន អភិបាលខេត្តកំពត បានដឹកនាំចុះត្រួតពិនិត្យវឌ្ឍនភាពនៅកន្លែងគ្រោង​ស្ថាប​នា​ឆ្នេរព្រែកកំពង់បាយឱ្យប្រែក្លាយជាតំបន់អេកូទេសចរធម្មជាតិងូតទឹកកម្សាន្តល្អប្រណិតមួយនេះដែលស្ថិតនៅក្នុងសង្កាត់កំពង់បាយក្រុងកំពតខេត្តកំពត។

​អភិបាលខេត្តកំពត​ បានដឹកនាំមន្ត្រីជំនាញធ្វើដំណើរចុះត្រួត​ពិនិត្យវឌ្ឍនភាពនៅ​កន្លែងគម្រោង​ស្ថាបនាឆ្នេរព្រែកកំពង់បាយជាកន្លែងឆ្នេរងូតទឹកកម្សាន្តចាប់ពីកុលស្ពានថ្មីរហូតទៅដល់កុលស្ពានរថភ្លើងនាពេលថ្មីកន្លងមកនេះអភិបាលខេត្តកំពតបានជំរុញឱ្យមន្ត្រីជុំនាញដឹកនាំក្រុមការងារយកគ្រឿងចក្រមកកាយភក់ស្អុយចេញដើម្បីបង្កើតសាឡង់បូមខ្សាច់ស្ថាបនាពង្រីកឆ្នេរនេះឲ្យហើយរួចរាល់នៅមុនពេលចូលឆ្នាំថ្មីប្រពៃណីជិតខ្មែរនាពេលខាងមុខនេះ។

លោក ម៉ៅ ធនិន អភិបាលខេត្តកំពតបានបញ្ជាក់លើកឡើងថា គម្រោងស្ថាបនាការរៀបចំឆ្នេរ​ងូត​ទឹកកម្សាន្តនៅតាមបណ្ដោយព្រែកកំពង់បាយនៅក្នុងសង្កាត់កំពង់បាយ ក្រុងកំពត ខេត្តកំពតនេះដើម្បីបង្កើតឱ្យមានសុភ័ណភាពក្រុងទាក់ទាញភ្ញៀវទេសចរ។

​ជាមួយគ្នានេះដែរខេត្តកំពតបានត្រៀមខ្លួនសម្រាប់ធ្វើជាម្ចាស់ផ្ទះ រៀបចំការប្រកួតកីឡាក្នុង​ព្រឹត្តិការណ៍ស៊ីហ្គេមឆ្នាំ២០២៣ខាងមុខនេះ៕

អត្ថបទ៖ សឹង រ៉ាត់